مش عايزة أعمل حاجة غلط

أنا فتاة.. ومشكلتي ببساطة إني مش عايزة أعمل حاجة غلط ولا عايزة أصاحب، وعايزة ألاقي الشخص اللي رسماه في خيالي، وإنه يحبني ويتقي ربنا فيّ وفي نفسه وربنا يكون راضي عننا.
المشكلة إن أي حد يعرفني يعجب بيّ ونظراته ليّ تتغير، وأنا باتخنق أوي من كده وباحس إنه طمعان فيّ، عشان كل الناس يقولوا لي إني جميلة وخفيفة الظل وحبوبة.
أنا طبيعتي كده، ومش باعرف أتعامل بغير طبيعتي دي، والحمد لله أنا إنسانة واثقة في نفسي جدا وليّ شخصية قوية ومستقلة، يعني مش محتاجة أسمع كلمة حلوة من حد عشان أحس إني جميلة ولا أزوّد ثقتي في نفسي، وده مش غرور والله، دي ثقة مش أكتر.
لكن لما حد يحاول يقرب مني باتخنق جدا، وباحس إنه عايز ياخد مني حاجة مش من حقه، وإنه باصص لي بنظرة سطحية جدا كبنت جميلة ودمها خفيف وبس، مش بيبصوا عليّ من جوه أو يعجبوا بعقلي، وإن حد عايز يصاحبني يعني نخرج ونتفسّح بحجة إننا نعرف بعض أكتر ونشوف هنتفق أو لأ، فده أنا مش عاوزاه.
وفي نفس الوقت ألاقي البنات اللي مقضيينها ومش فارق معاهم حاجة، ولا عاملين حساب حاجة ويصاحبوا وعادي هم اللي حياتهم ماشية حلو وعايشين مبسوطين.
وأنا وكل اللي زيي اللي عايزين ربنا يكرمهم في حياتهم، ومش عايزين يغلطوا، حياتنا واقفة ومش بنلاقي اللي بنحلم بيه، يعني اللي عايز حاجة يتنازل عشان يوصل للي هو عاوزه، وأنا ضد المبدأ ده، عشان اللي يتنازل مرة هيفضل طول عمره يتنازل.
إحنا متربيين على إن الصح صح والغلط غلط، وإن الطريق اللي بدايته غلط ينتهي غلط، ولما كبرنا اتصدمنا بالعكس، ناس كتير بدايتهم كانت غلط جدا وانتهت صح وزي ما هم بيحلموا.
لما بافكر هاتجنن؛ مش لازم أغلط عشان أحقق حلمي؛ لو غلطت ربنا يبارك لي إزاي؟ ولما بابص حواليّ باتجنن أكتر لما ألاقي الغلط هو اللي ماشي دلوقتي، والواحد ما بقاش عارف الدنيا ماشية بالعكس ليه.
الحمد لله أنا مش سهل التأثير عليّ، يعني عمري ما هاغلط ولا هاتنازل عشان أوصل للي أنا عايزاه، وباقول أكيد ربنا هيكرمني إن شاء الله، بس ليه الدنيا ماشية بالعكس؟ الصح مش بيتقدر والغلط الناس بيشيلوه فوق راسهم.
وفي نفس الوقت ليه لما واحد يعجب بواحدة بيكون عايز يصاحبها ويحاول ياخد منها على قد ما يقدر؟ ليه بيفكر فيها كشيء ولازم يلحقه قبل غيره؟ ليه التفكير ده؟! ليه اللي عنده مبدأ ماشي بيه في حياته يتقال عليه معقد؟ وليه الصريح اللي ميعرفش يكون بوشين بقى هو الغلط دلوقتي؟ أرجو الرد عايزة أعرف رأيكم.
أرجوك اديني رأيك..
صديقتنا العزيزة
أنا حاسة إنى بتكلم مع فتاه مثلى تمامًا، المشكلة اللي انتى بتتكلمى عنها دى مشكله حياتى، وأنتى فعلاً شرحتيها بأدق تفاصيلها .اللى أنا عاوزة أوصلها لك إن العفه فعلاً تاج جمال المرأة، وإن كل فتاه نزع منها الحياء بيكون فيها حاجة غلط ،ويكون شئ فى جمالها ناقص خليكى على ثقه بالله أن الطيبون للطيبات أكيد ربنا سوف يرزقك بالشخص اللي يستاهل إنك تدخري مشاعرك وعفتك ليه، وحتى لو الموضوع ده اتأخر شويه بس أكيد ده اختبار من الله عز وجل، واللى بيمشى صح اكيد عند الله عز وجل مش هايتكدر