كتالوج العلام للسيطرة على المدام

يقول بيكاسو المرأة في نظري خليط من الأشكال والألوان، عزيزى الرجل المتزوج لا تقلق أبدا ولا تشغل بالك هدفنا من هذا المقال أن نجعلك تكتشف بكل بساطة الأشكال والألوان المختلفة للمرأة المتمثلة في المدام:
- اعمل حسابك دايما ماتكلمش المزة من نفس الرقم اللى بتكلم منه المدام اشترى خط جديد خالص وماتديهوش لحد غير المزة وياريت كمان يبقى في تليفون منفصل علشان ما تتلخبطش في الشبكات وانت بتتصل.
لو سألتك لية متصلتش طول النهار اوعى تبين لها انك ناسيها أو موش طايق تسمع صوتها لكن قولها حبيبتى خفت أكلمك وانا في الشغل انهار من جمال صوتك واسيب الشغل واجيلك جرى.
لو طلبت منك تساعدها في شغل البيت اوعى ترفض وافق على طول وقولها من عنيا ياحبيبتى وطنش هتقولك تانى قولها حاضر ياروحى، وطنش، هتقولك تالت قولها حبيبتى ماتقلقيش خالص كل حاجة هتتعمل، وبرضة طنش، طبعا انت مش هتعمل حاجة وهى مش هتقدر تزعق ولا تتخانق لانك مثبتها بكلمتين، وهتروح في الاخر تعمل كل حاجة بنفسها من سكات، لكن لو لاقيتها مصممة انشر لها الغسيل وبالمرة تعاكس بنت الجيران.
لو طلبت منك تذاكر للعيال وافق فورا وأول ماتقعد تذاكر لهم تنح وماتتكلمش، هي والعيال هيستغربوا، قولها معلش حبيبتى أول ما ببص لولادنا بيفكرونى بيكى واسرح في حبك وانسى كل حاجة تانية، طبعا هي هتخاف على مستقبل العيال وتذاكر لهم.
لو طلبت منك تشترى متطلبات البيت، قولها من عينيا، طبعا هتقولك لا من السوبر ماركت، قولها حاضر وروح جيب لها كل حاجة بالمقلوب اللى عاوزة منه قليل هات لها كتير والعكس وكل اللى هي بتحب تاكله ماتجبهوش، وأول ماتروح قولها أخ معلش حبيبتى نسيت واتلخبطت، كلها يومين ياريس وتتخنق وتنزل هي تشترى بنفسها
دايما اشغلها بنفسها عنك، يعنى قولها حبيبتى انت زى القمر وعجبانى بس لو تخسى 2 كيلو كمان هتبقى اجمل من هند رستم، طبعا هي هتجوع نفسها لحد ماتخس وانت كل أكلها بالهنا والشفا، وخليك على كدة لحد ماهى نفسها تتسد تمام وتوفر لك، حتى يبقى معاك حجة تتجوز عليها وتقولها انتى بقيتى هيكل عظمى
لو حبيت تسافر يومين تستريح منها لكن هي شبطانه ومصممة تيجى معاك هي والعيال، قولها موش هفضى ولا دقيقة وهتقعدوا لواحدكم والجو هناك وحش اوى وموش هتطيقى القاعدة هناك.
اما تحب تدبسك في زيارة لحماتك، قولها حبيبتى روحى انتى وانا جاى وراكى علشان محضر لك مفاجأة، ولما تمشى هي اقفل تليفون وادخل نام أو انزل اقعد مع صحابك على القهوة العبلك دورين طاولة.