ربما دفعنى الواقع الذى نعيشه الان فى مصر ان اتحدث فى كتابتى هذه باللهجة العامية التى يفهمها رجل الشارع وكل مصري حريص على رفعة وعزة وطنه الحبيب الذى حقق انجازا بثورته المجيدة .
ورغم إني احب هذا الشعب جداً واحب طيبة قلبه وسماحة نفسه ورغم اعتزازي لإني مصرية حتى النخاع إلا إن هناك كلمة كثيرا ما نسمعها منه واصبحت أكرهها ، عارفين إيه هي الكلمة دي "معلش" كلمة معلش لو عديت انت بتقولها أو بتسمعها في اليوم الواحد كام مرة صدقني هتستغرب من الرقم.
تلاقي السائق يقول لرجل المرور لما يعمل مخالفة : معلش يا ريس حصل خير . والأم بتقول لبنتها : معلش دا جوزك وأبو عيالك اتحمليه . والأب بيطبطب على ابنه ويقول له : معلش بكرة تلاقي شغل . معلش يا بنتي دا أخوكي دا انتي ملكيش غيره. معلش دا صاحبك عدي له. هو أنا كل سنة هدفع المصاريف دي .. معلش يا حج الحكومة عاوزة كده. وتبقي هتتخنق في العربية من السيجارة اللي جنبك ويقول لك : معلش يا أستاذ السيجارة دي وبس.
ولا صاحب العربية اللي ماشي بسرعة الصاروخ ويبقي هيطيرك ويقولك : معلش. ولا دكتور الجامعة اللي "لاطعك " قدام المدرج ساعتين وزميلك يقول لك : معلش طب وهنعمل ايه . والفلوس اللي بتجمع فيها عشان كيلو اللحمة وتروح لحد الجزار ويقول لك : معلش يا بيه غليت 5 جنيه. ولا الترقية اللي من حقك بشهادة الجميع وتلاقي رئيسك في الشغل يقول لك : دي غلطة بسيطة معلش عوضها في الدور الجاي . أنا مش فاهم النقطة دي يا استاذ : معلش دا منهج الوزارة وهبقى أعيدها لك في الدرس . وتبقي نفسك تنام من التعب وتلاقي صوت الميكروفانات عالي حواليك وتقول ايه دا يا جماعة أنا عندي شغل يقولوا لك : معلش دا فرح عقبال عيالك.
الغريب إن الكلمة اصبح لها وقع السحر على المجتمع المصري، الكل بيستجيب ليها كما لو كانت كارت السماح لأي عمل أو فعل إنت مش مقتنع بيه..
أنا عن نفسي بسمع الكلمة دي أكتر من 10 مرات في اليوم وطبعاً بقولها كتير لكن الموضوع زاد عن حده يا جماعة وحقيقي بقي محتاج واقفة ما أنا خايفة لتكون الكلمة دي ميراث ياخده جيل ورا جيل وبعد كده يبقي من كلماتنا الموروثة اللي بنقراها في الكتب كلمة معلش .. الكلمة اللي بقت عاملة ذي الاعتذار المسجل اللي مفيش حد يقدر عليه يعني مجرد إنك تسمع كلمة معلش بتتلجم مبتعرفش ترد ..
