سنية والمحروس ع الهوا!

مش عارف إيه اللي جرى للولية مراتي المجنونة اللي اسمها سنيه.. من ساعة الثورة وهي فاكره نفسها مناضلة مع إنها قبل 25 يناير مكانتش بتفهم في السياسة من أساسه.
الهانم كل يوم تفتح التلفزيون على "العاشرة مساء" ومن قبلها "90 دقيقه"، وكل شوية تقلب على أي قناة تانية.. اشي برنامج عمرو عبد السميع على التلفزيون المصري.. واشي برنامج رولا خرسا على الحياة.. وكمان برنامج يسري فوده، والألعن إنها بتابع برنامج "ناس بوك" بتاع هالة سرحان..
تسالي سياسية
وكل دول كوم وضيوفهم كوم تاني، الهانم فاكره نفسها محلله استراتيجية وعماله تفتي وتقول "ازاي منى الشاذلي تجيب واحد زي المستشار ده، الراجل ده مالوش في القانون".. بعدها ألاقيها ماسكه قرطاس اللب والفول السوداني وشغالة قزقزة وهي بتقول "الست اللي طالعة في 90 دقيقة ما بتفهمش دي عماله تتكلم على المجلس القومي للمرأة وهي مش عارفه دوره أصلاً.."
رحت رادد في سري "يعني انتي اللي فاهمة أوي يا بعيدة؟" قالت "بتقول ايه يا منيل على عينك؟" رديت بسرعة "أبداً يا حياتي.. بقول برافو عليكي يا سنية!!!"
المصيبة انها كل يوم تكلمني في الموضوعات دي لغاية ما زهقت.. وفي يوم طلبت مني أنزل معاها عشان تشتري حاجات من الأوكازيون.. طبعا هي تشتري الهدوم بالكيلو زي ما تكون بتشتري خضار.. وانا أشيل الحاجه ولا أجدعها حمار!!
نزلنا نشتري الحاجة من هنا واحنا بنتفرج ع المحلات لقينا واحد ماسك مكرفون وبيتكلم مع الناس.. ووراه واحد ماسك كاميرا وبيصور.. لسه هيبص علينا.. لقيت سنيه هجمت عليه هجمه صاروخية مرتدة.. وبصيت لقيت سنيه بتصرخ في الراجل وهو تحتها " أيوه ياأستاذ.. عاوزني اسجل معاك؟"..الراجل المسكين عشان يخلص قال لها " طبعاً طبعاً.. بس سيادتك قومي من عليا الأول احسن عندي عيال ومش عاوزهم يبقوا يتامى من بدري"..
بعدها راح قايل لنا.."أنا معد في برنامج العاشره مساء وممكن استضيفك انتي والاستاذ مع منى الشاذلي وتتكلموا عن الثورة".. طبعا الست هانم ماتت من الفرحه وصرخت وقالت.."لولولولولي ي ي..يا سعدك يا هناكي يا سنية يا بنت زكية.. هتطلعي مع منى الشاذلي وتبقي نجمه مشهوره".. طبعا في ساعتها قلت في سري "مشهوره؟؟..جاتك داهيه وانتي شبه كمبورة!!!!"
وجه اليوم الموعود.. يوم التسجيل، طبعا الولية سنية بنت المجنونه جت لابسه الحته اللي ع الحبل وحاطه على وشها 2 كيلو بودرة و5 كيلو أي شادو.. ومعلقتين أي لاينر وبرطمان "زبده"..أقصد أحمر شفايف، المهم أول ما دخلنا لقيت الولية سنية بتزغدني وتصرخ بصوت عالي.." إلحق يا زنكلوني يابن بهيه..الست منى الشاذلي أهي..زي القمر..زي ما بنشوفها في التلفزيون بالظبط!!"
لب وفول وفلول
قعدنا وسلمنا عليها وابتدى التسجيل.. ومنى الشاذلي قالت.." النهارده معانا ضيفه مناضله من التحرير.. ضيفه عملت كتير عشان بلدها.. رحبوا معايا بالست سنية"..
"عاوزينك تقوليلنا يا ست سنية إيه دورك في الصفوف الخلفية مع الثوار؟"..هي قالت كده من هنا وانا لطمت، صفوف خلفيه إيه ونيلة إيه.. سنية كانت بتقزقز لب طول أيام الثورة ونزلت التحرير بعد الثورة ما خلصت بيوم عشان تتصور!!!
لقيت سنية اتعدلت في قعدتها ورققت صوتها اللي زي صوت القطر وبربشت بعينيها ولا كأنها زيزي حبيبة بطوط وقالت " في الواكع يا جماعة أنا قمت بدور كبير مع ثوار التحرير.. كنت بعمل لهم الأكل وصواني البطاطس باللحمة.. وكمان كنت بعمل لهم محشي ورق عنب.. والحلو كان بسبوبة وقطايف"..
فجأة حسيت ان فيه دخان طالع من نار جوة دماغي وهي بتكمل.."بصراحة أنا تعبت أوي أوي.. ده أنا حتى كنت بجيب البرتقال والفراولة من سوق روض الفرج من عند الحاج ملواني عشان اعمل لهم عصير، وكمان كنت بعمل لهم صواني فراخ بالكاري، ودي اللي الحكومة السابقة كانت بتقول عليها كنتاكي.."
طبعا أنا مقدرتش أستحمل أكتر من كده ورحت صارخ بعلو حسي.."نضال ايه اللي بتتكلمي عليه ده يا ام نضال ، وأكل ايه اللي كنتى بتعمليه؟.. ده اليوم الوحيد اللي نزلتي فيه التحرير كنتي واخده معاكي حلتين محشي لزوم القزقزه، ولما لقيتي الناس جعانه بعتي المحشي الواحدة بجنيه..." لسه هكمل كلامي لقيت منى الشاذلي بتسأل سنية "هو مين ده يا ست سنية؟".. ردت وقالت "معرفوش يا ست منى، واضح انه من الفلول"..!!
طبعا كما هي العادة لقيت سنية وكل الناس اللي في الاستوديو ومعاهم منى الشاذلي نازلين فيا ضرب وهما بيقولوا.."يا خيبتك القوية بقى تعيب في الست المناضلة سنية؟!"
بقلم: عمرو عكاشة
المحروس في التليفزيون!
لاحظت أن نشاط المحروس على الفيس بوك زاد قوي اليومين دول.. وعدد الفريندز عنده النبي حارسه عدا الألف.. واللي يغيظ ان معظمهم من صنف الحريم، بس بصراحه أنا قلت أراقبه من تحت لتحت وأعمل نفسي مش واخده بالي عشان ما يقرفنيش ويفتكرني بغير!
وياريت جت ع الفيس بوك.. لاحظت ان بقالنا كام يوم تليفونات كتير بتجيله ع البيت.. وبيجري عشان يرد قبل ما امسك السماعه.. بس وحياتكم بجيب مجله واقعدله وهو بيتكلم في التليفون، وكل ما يوطي صوته وداني بتكبر.. بس لاحظت ان تملي اللي بيتكلم معاه راجل، وفهمت كده ان عنده مشكله مع مراته، قلت في عقل بالي يبقى أكيد زميله في الشركه ومطلع عنين مراته وملقاش الا المحروس عشان يشاركه همه!!
أنا جاااااااي
وفي يوم جه تليفون للمحروس اتنطر بعدها من الفرحة وقعد ينط لفوق زي العيال.. استغربته أوي فسألته: "في إيه يا محروس؟ ما تنططنا معاك؟".. راح ملعب لي حواجبه وهو بيعمل بايديه خمسه في وشي وبيغني ويقول: "سمع هسسسسس.. محروس طالع في التليفزيووووون"!!
مصدقتش وداني..المحروس؟!! طب ليه؟!! طب ازاي؟!!..عقلي كان هيشت فسألته: "طب هتطلع في التلفزيون ايه؟ مشاهد؟!!".. بص لي من تحت النضاره وهو بيقول: "لأ يا هبله.. طالع ضيف ومهم كمان".. رديت عليه: "ماشي.. في إيه يعني؟ هتتكلم في إيه؟ عن الموظفين مثلاً؟!!".. قعد يسقف ويقول: "هيولع هيموت هيقلد الكتكوت"!!
وفعلاً بقيت مولعه وقربت أنقر زي الكتكوت.. هاموت واعرف طالع في أنهي برنامج وليه؟!! والأنقح اني لاقيته كاتب عنده ع الفيس بوك: "انتظروا المفاجأة قريباً.. المحروس ع الشاشه.. مش هتقدر تغمض عنيك".. وييجي 500 لايك و200 تعليق!!
وعرفت اليوم الموعود لما لقيت حضرته كتب ع الفيس بوك: "أخيرا النهارده الساعة تمانيه محروس جااااااي..إوعى تقلب المحطة"!! طبعا هو كتب الخبر ده من هنا ولقيت زميلاتي في الشغل عمالين يباركولي ان المحروس هيشرف في التلفزيون.. وانه خلاص بكده أكون حطيت رجلي على أول طريق المجد والشهره!!
المحروس رجع يوميها من الشغل بدري.. وزي عوايده جري ع المطبخ يشمشم في الحلل وبعدها غرف لنفسه من غير ما يستناني.. دخل بعدها فرد ضهره بعد ما حط من الكريم بتاعي على وشه وخيار!!! وقبل الميعاد بتلات ساعات قام فوريره.. لبس على سنجة عشره وحط برفان من اللي مش بيطلعه غير في المناسبات!!
اتلزقت سعادتي قدام التليفزيون.. وكل شويه ابص ع الساعة.. واتسمرت في الكنبه أول ما البرنامج بدأ بس ما شوفتش المحروس.. شوفت ضيف تاني ولقيت المذيع بيقول: "النهارده البرنامج مليان فقرات خطيره.. بس سايبين التحليه في الآخر.. ودلوقتي نتكلم عن.." بقيت شغاله اقزقز لب وأنا على أعصابي مستنية على نار يخلص من الضيف اللي معاه ويجيب اللي وراه!!
أسمع كلامك
وفجأة حسيت وداني كبرت وبحركه تلقائيه قعدت أدوس على الريموت عشان أعلي الصوت على آخره أول ما سمعت المذيع بيقول: " ودلوقتي الفقره الأخيره من الحلقة نهديها مخصوص لكل ست فيك يا مصر.. هنناقش مشكلة كل راجل عصري.. هنناقش هما الستات عايزين إيه؟ السؤال اللي حير العلماء بس ماحيرش ضيفنا النهارده اللي ليه خبره في المجال ده وبقى ظاهره على الفيس بوك".. ولقيت الكاميرا مركزه على المحروس وعليه ابتسامه واخده عرض وشه ونافش نفسه زي الطاووس والأنقح ظهر تعريف ليه بيقول: "استشاري زواج وطلاق"!!!
لقيت نفسي باكل قشر اللب وبارمي اللي جواه.. والمحروس هات يا فتي والاتصالات على ودنه.. ومعظمها من الصنف الناعم عايزينه يفك عقدهم، وبقت تهل عليا اس ام اس من زميلاتي في المصلحة من نوعية "يا واد يا تقيل..ومخبية علينا".."حد زيك يا عم".."صدق اللي قال..في الهم مدعيين وفي الفرح منسيين"!!
حسيت بالدخان خارج من وداني لما سمعته بيقول: " الست من دول محتاجه حنيه.. محتاجه ونيس يتكلم معاها..عيب يا راجل ترجع من الشغل ماتشوفش غير المطبخ وتشمشم في الحلل زي القط البلدي.. بطنك يعني هتوجعك لو دخلت عليها بورده.. كلمتين حلوين من نوعية وحشتيني.. وبعد كده يا سيدي إجري ع المطبخ وشمشم في الحلل براحتك!!"
مستحملتش وفضلت ورا البرنامج بالتيلفون.. بقت مسألة حياة أو موت.. لغاية ما حصل وحولوني بالاستوديو.. وأول ما المذيع قال اسمي.. المحروس وشه اصفر وبقى ينزل عرق وقعد يدي إشاره للمذيع من تحت لتحت إنه يقفل عليا الخط.. قلت وأنا باجز على سناني: "ياريت يا محروس بيه تقولنا رأيك في الراجل الفشار اللي بيضحك ع الناس اللي موري مراته الويل ونجوم الليل و.."..وقبل ما اكمل لقيت الخط انقطع.. ولقيت المذيع بيقول: "الظاهر الخط اتقطع، ياريت يا مدام عصمت تشرفينا بالاتصال مره تانيه، ياترى فهمت حاجه من كلامها يا استاذ محروس؟"
محروس رجع نفش تاني وهو بيقول: "الحالات اللي من نوعية مدام عصمت مرت عليا كتير..ما يعجبهاش العجب..الراجل من دول يوريها نجوم الليل..وهي توريه النجوم في عز الضهر"!!!