علشان تكسب قلب حبيبتك!

لو حبيبتك مش راضية عن حاجة.. اوعى تعملها..
يا جماعة فى ستات سرها باتع.. مابتهزرش..
هى نيتها مش وحشة خالص بس نفسها تكون معاك علطول..
يعنى هى مش مقتنعة انت ليه عايز تسافر مع صحابك الساحل مع إنها موجودة.. حتى لو كنتو لسه مسافرين سوا وراجعين بس هتلاقيها من جوه مش مظبطة..
فى واحدة عدم رضاها يقلب معاك بتخييشة عربية وانت لسه بتمسك الطريق فكده اتنكد عليك بدرى بدرى..
أو الكاوتش ينام منك ننه هوووووووه فجأة..
أو انك تروح شرم ما تلاقيش فيها صريخ ابن يومين.. ولا كإنك روحت صحرا..
تحس كده إن الطبيعة والعربيات والتكاتك والجو والزحمة والقطط وكل الكائنات متعاطفة معاها وبتعمل معاك الواجب..
الدنيا تمطر فجأة وانت رايح تلعب كورة فتروح البيت جرى مع إن الشمس كانت طالعة طول اليوم وزى الفل..
تقرر تخرج مع صحابك فالعصفورة تعمل معاك السليمة على التيشيرت فتروح تغيره وبعدها الخروجة تتكنسل..
يعنى صحابك اتلطوا معاك هما كمان علشان المدام مش مبسوطة..
هتلاقى عكوسات بتحصل كده مالهاش أى تفسير..
زرار القميص وقع..
البنطلون اتنتش جامد..
الآيفون وقع على الشاشة بتاعته مع إنه كان فى جيبك زى كل مرة..
نسيت المحفظة ومعاكش ولا مليم..
تحس إن فى لعنة فى الموضوع...
أو أى نكد وتكدير والسلام..
فلو قولت لحبيبتك مسافر وحسيتها متضررة ولو 0.001٪... كنسلللللللل... اسمع منى..
بدل ما تتبهدل على الفاضى.. خدها من قصيرها وكنسل..
لو لاقيتها مش راضية عن موبايل هتجيبه يا إما ماتجيبوش يا تجيب أبو ضمان مدى الحياة ده مش أبو سنة واقلب... أو اشترى نفسك وهاتلها زيها زيك وريح دماغك..
قلبة الستات وحشة أوى..
تقدر تقول عندهم قدرات خارقة..
وساعات بتحسهم مخاويين...
آه مخاويين بس ماتخافش أوى كده.. خليك فى السليم ومش هيجرالك حاجة..
وده ملوش أى علاقة إن عينهم وحشة.
دى قدراااات...
فأحسنلك تنول رضا حبيبتك علشان ربنا يفتحها ف وشك..
ارضيها علشان الست دى بركة وليها كرامات...