أسئلة بسأله لنفسي، هو أنا اللي كبرت، ولا المشاكل هية اللي صغرت؟ هو أنا ليه لما بتحصلي مشكلة مبقتش أنهار وأتضايق زي زمان؟، ليه المضايقة مبقتش تضايقني؟، لية مبقتش أزعل؟. أنا عارفة إن في ناس كتير هتقولي إحمدي ربنا إنك مبقتيش تضايقي.. بس حقيقي أنا متضايقة إني مبقتش أتضايق.. آه والله.. متضايقة إني مش بتضايق، بيراودني إحساس بإني بقيت جِبلة..أه والله جِبلة، لا بجد، سؤال بس هو لية لما بتحصلي مشكلة بتضايق وبنفعل بس بيكون لمدة 4 دقايق.. فقط لا غير. الغريب إني لما بكلم صحابي مبحكيش لهم علي المشكلة، مش ببقي قاصدة محكيش، بس والله لأني مببقاش متضايقة بنسي أحكيلهم علي اللي حصل، ولو حصل و حكيتلهم بعد دقيقة بالظبط برمي أي إفية و أفضل أضحك معاهم...علي عكس زمان...كنت بفضل 6 ساعات...6 ساعات إية!! قصدي 6 سنين..أفضل 6 سنين أحكي نفس المشكلة و مبغيرش الموضوع...كنت موهوبة و متميزة في النكد و الأڤورة...إظاهر إني إتحسدت!. أنا بقيت مش عارفة.. هو أنا إتعودت علي المشاكل فعلشان كدا خلاص تنحت، ولا دا رضا من ربنا عليا إنه خلاني مبقتش أتضايق، ولا.. يا نهار إسود.. ليكون السبب إني أكون عقلت ولا حاجة، لا بعد الشر، معتقدش، أصل عقلت ازاي؟ دا أنا لسة صغيرة وفي عز شبابي، وبعدين أنا Female، هو فية فيميل بتعقل؟. بعد الشر عليا من العقلان.. ربنا ما يجيب عقل ولا حاجة، أنا بس أركز مع نفسي شوية اليومين اللي جايين دول، وهحاول بشدة أستعيد كآبتي وشحتفتي، وحشتني أيام الكآبة والعياط اللي من القلب، يا سلام عالعياط أبو شحتفة دة و معاة أغنيتين حزايني كدة. دا الواحد محروم نكد يا جماعة و للتوضيح هو النكد موجود بس هية فين النفس، النكد الحمد لله متوافر بس هو العيب فيا.. أنا اللي مبقتش عارفة أستفيد بالنكد وأتنكد، دا الموضوع وصل معايا اني لما بشوف واحدة صاحبتي بتعيط ومتضايقة بنفسن عليها، بقول يا بختها دي مودها وحش وبتعيط ومكتئبة، وأفضل أفتكر في زكريات مهببة، وأحاول أضايق نفسي وأعصر عينيا عشان أجيب العياط، وأكمل المحاولات بجر شكل كل الناس اللي حواليا، عشان أخليهم يتخانقوا معايا فيمكن ساعتها أزعل ولا أعيط.. لكن مش عارفة أزعل يا جدعان، دا أنا حتي والله لما بتضايق، زمن الزعل بيبقي ضيق أوي.. مبلحقش أعيط ولا أتشحتف ولا أكَسَر في الحاجات اللي حواليا.. مبلحقش أفرح بالزعل.. حاجة مقرفة. سؤال إلي ربات البيوت: بذمة أبوكوا مش بتستمتعوا أكتر و إنتو زعلانين و متخانقين؟؟ دا كفاية إنكوا بتلاقوا حاجة تحكوها...بتلاقوا حد تشتموا فية...إنما بقا لو مبسوطة...بذمتك بيبقي فية حاجة تتحكي؟ لأ بيبقي فية حد تنمي و تشتمي علية؟؟ لأ بيبقي فية سبب يخليكي تمارسي هوايتك (قلبة وشك)؟ لأ شفتوا بقا إن الزعل حلو وكله مميزات، طب وبعدين يعني؟... إيه الحل عشان أعرف أكتئب وأعيط زي زمان، مع (حركة البق اللي بتتعمل مع كلمة زمااان)...و (تنهيدة طويلة) هاااه فين أيام زمان!! أيام ما كان الواحد يفضل يعيط بالساعات و يأڤور...يا سلام كات أيام عثل....فعلاً بلد وسخة...حتي الزعل فيها بقي مغشوش...الله يا جدعان! الواحد مش عارف يزعل بقلب! الواحد مش لاحق يكتئب...الواحد مش عارف يجيب دمعتين من عينية!! حتي الزعل والكآبة بقوا مغشوشين..الله يخرب بيت الإخوان يا شيخ!!، هما الإخوان...هما السبب كلاب المرشد دول!!.
