شوية كلام * المسرح

ولأنه اتفرج علي كل المسلسلات ووجدها سهلة - قرر أن يتحول لمسلسلاتي ويكتب حلقات، وسارع بتقديم نموذج لي لكي أعاونه في تقديمه لمخرج قدير وهذا نموذج لحلقة.
مشهد رقم مليون ليل داخلي.. مطر.. رعد وبرق.
يدخل مدحت مبلولا
أبوه يجلس مبلولا..
مدحت - بابا..
الأب - مدحت ابني الكبير؟
مدحت - أنا تعبان.
الأب - تعبان ليه؟
مدحت - هند سابتني.
الأب - سابتك - ليه؟
مدحت - مش عارف ليه.
الأب «وهو يعصر ملابسه المبلولة»
اتكلم، قول، فضفض عن نفسك.
اتكلم قول.. فضفض عن نفسك
اتكلم قول فضفض عن نفسك قول - اتكلم، فضفض، قول.
قول - قول
«قطع»
مشهد مليون وواحد نهار داخلي - الشمس مشرقة - يدخل مدحت - مدحت والسيدة والدته. الوالدة تنشر ملابس مدحت المبلولة علي الفراش.
صورة والدة مدحت - يضحك بدموع غزيرة.
مدحت - ماما.
الأم - مدحت ابني الكبير.
مدحت - أنا تعبان.
الأم - تعبان ليه؟
مدحت - هند سابتني.
الأم - ليه؟
مدحت - مش عارف.
الأم - اتكلم قول فضفض عن نفسك - اتكلم قول فضفض عن نفسك - اتكلم قول فضفض عن نفسك - اتكلم قول فضفض عن نفسك عن نفسك قول قول.
«قطع»
مشهد مليون واثنين.
مشهد، خارجي، نهارًا.. الجو ممطر.. العواصف الهوجاء جدا..
سيارة حمراء تأتي مسرعة جدًا.
سيارة خضراء تأتي مسرعة جدًا.
«صدام. بم - جدا»
الأب الذي كان يقود السيارة الحمراء، والأم التي كانت تقود السيارة الخضراء.
الأب - مش تفتحي يا هانم؟
الأم - مش تفتح يا بيه؟
الأب «مذهولاً» مين؟ سعاد - أم مدحت ابني؟!
الأم «مذهولة» مين عبدالعال - أبو مدحت ابني؟!
الأب - والله زمان يا هانم.
الأم - والله زمان يا بيه.
الأب - أنا تعبان.
الأم - وأنا تعبانة.
الأب - مدحت ابني.
الأم - ابني مدحت - ماله؟
الأب - هند سابته.
الأم - تماما زي مدحت ابني.
الأب - ماله؟
الأم - هند سابته.
الأب - تماما زي محدت ابني.
الأم - ماله؟
الأب - هند سابته.
الأم - هوه قال لك؟
الأب - طبعا جالي وقال «فلاش باك
لقاء مدحت مع أبيه
لقاء مدحت من أمه
اقرأ المقالة من البداية لمزيد من المعرفة عن هذه المشاهد الدرامية المهمة». «مشهد مليون وثلاثة»
مكان الحادثة - السيارة الحمراء مقتربة جدًا وفي تعاطف مع السيارة الخضراء.. الموسيقي تعبر عن علاقة الحب بين السيارات.
ضابط الشرطة: خلاص يا هانم - خلاص يا بيه تدفعوا الغرامة لبعض ومفيش داعي لتدخلنا.. دي حادثة عائلية جدًا.
الأم - والأب «معًا» ربنا يخليك يا ضابط لشبابك
الأب - اسم سيادتك إيه؟
الضابط - اسمي مدحت.
الأم - يا سلام اسمه زي ابني.
الأب - وزي ابني كمان.
الأم - إحنا عندنا ابن شاب في سنك اسمه مدحت وخاطب بنت اسمها هند سابته - الضابط - «يبكي بحرقة».
الأم - مالك يا مدحت يا ضابط.
الضابط - أبدًا يا هانم.
الأب - لأ - لازم تتكلم - اعتبرنا أباك وأمك.
الضابط - أنا تعبان.
الأم - تعبان ليه؟
الضابط - هند سابتني.
الأم والأب «معا» - ليه - هند سابتك ليه؟
الضابط - «صارخًا» مش عارف.. مش عارف.
الأب والأم «مع هطول أمطار شديدة ملونة وحدوث صواعق وبرق ورعد وهدير البحر»:
قول - اتكلم - فضفض عن نفسك اتكلم قول - قول - قول - قول.
«قطع»
السيارتان غارقتان في الماء - الماء يرتفع بشدة وقد تجمع الجمهور العابر ورجال الشرطة. وتوقف المرور كله.
الضابط مدحت «في بكاء حار»: يا ناس مش قادر أتكلم أنا في مهمة رسمية وده وقت العمل.
الجماهير - «في هتاف جماعي يحسن أن يتحول إلي أغنية ملحنة» لا - لازم تتكلم قول فضفض عن نفسك - قول - قول - قول.
تتجمد الصورة - يتسع الكادر - الميدان كله رجالا ونساء حول الضابط - في الهتاف - تترات يدخل صوت المغني باللحن المميز.
ورانا ايه يا ناس - وغدا الحلقة التاسعة والتسعون بعد المليون أسماء المشاركين في هذا العمل الفنانون - والفنانات والمهندسون والمهندسات والفنيون والفنيات والعمال والعاملات وسائقو المركبات والسائقات.
المطرب يكمل اللحن الختامي:
ورانا إيه نقوله يا وطن عاوزين نقول كتير يا وطن. في القلب كلام ووجع.
وفي العين حسرة ودلع لازم نقول - نقول - نقول
وبعد ما نقول نقول ونفضل نقول ونقول. «ختام»