علاء عبدالعال ل«روزاليوسف»: الدورى «نار».. وياريت كل المحترفين يتعلموا من «صلاح»

هو من أبرز مدربى الدورى خلال السنوات الأخيرة ومعروف عنه نجاحه الكبير تحديدا مع فريق الداخلية الذى أنقذه من الهبوط الموسم الماضى..علاء عبد العال المدير الفنى للداخلية فتح قلبه ل«روزاليوسف» من خلال الحوار التالى:
■ تقييمك لبطولة الدورى هذا الموسم؟
- مفيش شك فيه اختلاف عن البطولات اللى فاتت.. المرة دى أقوى بكتير والفرق كلها اللى موجودة أصحاب إمكانيات مادية عالية وأيضا دخول فريق بيراميدز بالإمكانيات المهولة فى الدورى المصرى زاد من قوة البطولة.
■ هل تتوقع ان يحقق الداخلية مركزا متقدما؟
- خلينا واقعين فى ظل الإمكانيات والفرق اللى موجودة فى الدورى هدفنا البقاء بشكل مشرف.. مقدرش اقول انى هنافس أو هكون فى مركز متقدم أو فى المربع.
■ وما الذى يجعلك تقول إن فريقك لن ينافس؟
- الميزانية محدودة بالنسبة لفريقى.. والإمكانيات المادية هى اللى بتمشى كل حاجة هى اللى بتجيب لاعيبة بأسعار كويسة ومتميزة هى اللى بتحقق نوعا من الاستقرار المادى وتخليك تطلع أحسن معسكرات وتشترى أحسن لبس.. نقطة تانية فنية بتأثر على الفريق ككل والانسجام فكل سنة نادى الداخلية يبع اتنين أو تلاتة أو أربعة لاعبين من أفصل نجومه.
■ من سيفوز بالدورى؟
- ترشيح مين يفوز بالدورى ده لسه بدرى لأن المنافسة هتبقى شديدة بين «أهلى - زمالك – بيراميدز – وممكن سموحة» ومن وجهة نظرى الحصان الأسود للبطولة بيراميدز.
■ تقييمك للجهاز الفنى الجديد للمنتخب بقيادة أجيرى؟
- المدير الفنى الجديد مش هنقدر نحكم على فنياته غير بعد ما يخوض المباريات الرسمية ومن حسن حظه إن المبارتين اللى جايين سهلين مع سوازيلاند.
■ ما النصيحة التى تحب توجيهها لنجومنا المحترفين؟
- بقولهم لازم تجتهدوا والمحترفون لازم يكونوا على غرار محمد صلاح لأنه هو المحترف الوحيد اللى عامل بصمة مع فريقة ويليه محمود تريزيجيه.
■ ما أبرز لاعبى الدورى من وجهة نظرك حتى الآن؟
- إحنا شايفين من الأهلى عمرو السولية ووليد أزارو ونادى الزمالك فيه محمود الونش وكاسونجو واللاعب التونسى فرجانى ساسى وعندى فى الداخلية إسلام جابر.