رمسيس

شعر : محمد امين محرم
الشمس تشرق يوم ميلادك والجلوس
تخش دوغري لطلعتك شعاع يبوس
جبين عظيم للخلود معدن نفيس
رمسيس
يا جدنا في معبدك كل الدروس
علم وفلك وهندسة وأعظم كنوز
لما كان المصري هالة منورة فوق الرءوس
رمسيس
يا ملك الملوك شمس الشموس
وسط الجميع ف العرق أغطس أغوص
حفيد ف حلقه معلقة غصة نكوص
رمسيس
يا ملك الملوك حالنا تعيس أحفاد وعايشة فقرها مش ف الفلوس فقر في طموحها وف أمل يحيي النفوس
رمسيس
رغم روعة الاحتفال وسط الطقوس
حسيت بإني ف اغتراب بره النصوص
فين أنا من الزمان ومن المكان
فين أنا من مجد كان
حتي خانة لانتظار مالي مكان
شمسي غربت والزمن زمن العبوس
رمسيس
آسف إني ف التاريخ بانتسبلك
أو يقولوا إن أنا من صلب نسلك
النسب ما هوش كلام
النسب غرس وعلام
ومش حكاوي
ساعة عصاري
نفتخر واحنا جلوس
رمسيس
من احتفالك بانسحب مقهور غريب
ونفسي إني أوعدك بميعاد قريب
آجي أزورك تفتخر بحفيد حبيب
ملو الهدوم مش فرع بوص
آخر.