الرئيس مرسى يسأل: قناة السويس اتباعت ولا لسه.. والنشطاء يسألونه اللى قتلوا الجنود فى رفح اتمسكوا ولا لسه؟

كتبت مروة فتحى مروة مظلوم

منح خطاب الرئيس محمد مرسى نشطاء مواقع التواصل الاجتماعى مادة خصبة للحديث عن إنجازات وأخطاء الرئيس كما أوحى لهم خطابه ثم فاجأهم بتبريرات لاتغنى ولاتسمن من جوع فتناوبوا الرد على خطابه كلمة كلمة ما بين التعليقات الساخرة والجدية التهكمية كانت ردودهم على أطول صفحاتهم خطاب رئاسى فى التاريخ.. مطالبين بإدراجه ضمن موسوعة جينيس للأرقام القياسية ..وجاءت تعليقات شباب الإخوان على صفاحتهم «أيوة ياريس ضربة معلم» إديهم ووريهم نفسهم.. حملة اعتقالات ياريس لمهم وخصوصاً إعلام المارينز دعاة الفتنة.

أيوة إحنا تجار دين بنتاجر بأرواحنا وأموالنا فى سبيل الله حد عايز ينضم لنا.

أما صفحات الشباب الليبرالى فجاءت تعليقاتهم على النحو التالى:

«مرسى أول رئيس فى العالم يقول خطاب يوم الأربعاء ويخلص يوم الخميس»، «أهم إنجازات الرئيس مرسى أنه صاحب أطول خطاب سياسى فى تاريخ البشرية، «مرسى بيحاول يجهض مظاهرات 30 يونيو بخطابه الطويل شكله كده هيخلصه واحد يوليو عشان محدش ينزل»، «ده مش كشف محاسبة دى حكاية ألف ليلة وليلة»، فضلاً على تلميحات الريس لشخصيات بعينها «فودة عاشور البت اللى بتشتم أبوها الشايب الجراكل البنزيم السياسة نجاسة لمضه حتة محمول صغير الواد بتاع السكينة لا نقبل الانضغاط ..... من معالم خطاب السيد رئيس جمهورية الموز محمد مرسى العياط»، «بيقولك أول رئيس حافظ القرآن وبيطلع ورقة عشان يقرا آخر ايتين من سورة البقرة»، وهى السياسة ايه اليومين دول هى حواديت قبل التنحى اللى بيقولوا عليه غير مرسى وشوية خطابات يموتنا بيها.

وعن سخرية الرئيس من الشائعات جاء على إحدى الصفحات الرد التالى

▪ الرئيس مرسى: هى قناة السويس اتباعت ولا لسه؟ .. هو الهرم اتباع ولا لسه؟

▪ طب رد بقى ياريس: الحد الأدنى و الأقصى للأجور اقر ولا لسه ؟..اعادة تشكيل تأسيسية الدستور اتعملت ولا لسه؟ .. الفريق الرئاسى اللى بيمثل كل التيارات اتشكل ولا لسه ؟. . نواب الرئيس القبطى و المرأة و الشاب اتعينوا ولا لسه ؟ال 200 مليار اللى هايدخلوا مصر تانى يوم انتخابك دخلوا ولا لسه.. اللى قتلوا الجنود فى رفح اتمسكوا ولا لسه؟ ..باب الجهاد اتفتح ولا لسه ..مشروع ال 100 يوم اتنفذ ولا لسه؟

وعلى صفحة بس ياسيدى قومنا عاملين ثورة تفنن النشطاء فى تحليل الخطاب مذيلينه بعلامات التعجب .. وجاء فيها التالى:

الريس زعلان إن الأحزاب مابتحترمش الشباب !!! وكأن الشاب عبد الرحمن هريدى لما انطرد من يومين من (صهره) رئيس مجلس الشورى عشان عبر عن رأيه كان كده بيحترم الشباب !!!

▪ الريس اللى تحت إيده رئيس وزرا ! ووزير داخلية !! وشرطة ! ونائب عام ! مش عارفين يقبضوا على بلطجية جاى يقولنا أساميهم واحد واحد.

▪ الريس اللى فى عهده شفنا أكبر طوابير بنزين بيقنعنا إن تفاصيل المشكلة حلها فى توزيع البنزين ..وكإننا احنا اللى منعناه من إنه يعمل سيستم على 15 محطة فى كل محافظة؟! ..

▪ الريس شايف إنه مابقاش فى أنابيب غاز ب 150 جنيه .. بدليل صور وزير التموين اللى نط على عربية الأنابيب !

▪ الريس اللى رئيس وزرائه شاف بلطجية بيسرقوا عند سميراميس ، والشرطة مسكتهم ، والنيابة طلعتهم براءة ، المفروض انه والنائب العام مش مسئولين عن ده ؟!

▪ الريس اللى مسئول عن فلوسنا اللى بره لما يطلع ويقول احنا قلنالهم موافقين على اى حاجه انشالله حتى 700 مليون ، بس هما مش راضيين ▪ المفروض انهم لما يسمعوا الطريقة الهزلية دى فى العرض .. يخافوا.. ويوافقوا! ..

▪ الريس شايف إننا فى حاجة لضخ دماء الشباب فى الحكومة وفى المحافظات .. ده على أساس إن حزبه نفسه مقتنع بالكلام ده .. بدليل إن أمين الشباب فى حزب الحرية والعدالة «أيمن عبد الغني» عنده 49 سنة !

▪ الريس بيسألنا ليه محمود وجدى وزير الداخلية أيام موقعة الجمل ما تقدمش للمحاكمة ..على أساس إن دى مش مهمة النائب العام بتاعه

▪ الريس شايف مشكلة قطع الكهربا لفترات طويلة بسبب إن الواد بياخد 20 جنيه عشان ينزل السكينة ويروح فالناس تطق من عيشتها.

▪ الريس زعلان إن الإعلام ما احتفلش بالآى باد المصرى ..والسيارة المصرية .. على أساس إن إعلام أمريكا مقطع أوباما فشخرة بتصنيع آى فون 5 ؟وعربيات فورد !!!

▪ الريس أعلن إنه كلف المحافظين بإقالة المتسببين فى كل ما سبق !!! هو مايعرفش إن ده بالضبط اللى عاوزينه يحصل يوم 30 يونيو!!! انت تؤمر ياريس.