أحمد عفيفي بعد بيان الحكومة الذي ألقاه كمال الجنزوري ، شفته في منامي قال إيه قاعد مريّح ع الأخر في البيت بعد ما قال " البقين بتوعه " اللي مالهمش لازمة في مجلس الشعب .. ولا قدموا ولا أخروا ، وفتح التليفزيون عشان يشوف رد فعل الناس بعد البيان الحنجوري بتاعه .. ولما شاف كل السياسيين والمهتمين بالشأن العام بيتريقوا على كلامه خصوصا حكاية أن مصر لن تركع لأحد وقد ولدتنا أمهاتنا أحرارا ولن نُستعبد بعد اليوم ، لدرجة أني تخيلت أن اسرائيل الله يجحمها ماطرح ماهي موجودة احتلت سيناء تاني ، وأن الأسطول الامريكي في مياه المتوسط مساندة وتعضيدا - حلوة تعضيدا ديه - للعدو الإسرائيلي. شفته قاعد زعلان ومتنّكد أن بيانه الأونطة ما دخلش ع الناس الفاهمة ، وسأل حفيده وعمره يقترب من الأربعين : هو إيه اللي حصل في مصر وفي ناسها .. كان زمان بيان زي ده تقوم الدنيا ولا تقعد وهاتك يا تصفيق .. وقول ما بدالك احنا رجالك ودراعك اليمين .. واطلب تلاقي 80 مليون فدائي في جميع الميادين.. الناس الحلوة الطيبة دي راحت فين؟ .. كنا بنضحك عليهم بكلمتين ونعمل فيها وطنيين وكانوا بيصدقوا .. وسأله : إلا قل لي يا حبيبي .. البيان اللي سمعته .. فيه حاجة غلط ؟ .. فضحك الحفيد ورد : يا جدو اسألني : هو فيه حاجة صح .. الدنيا اتغيرت وبتجري بسرعة الصاروخ وانت لسه بتتكلم بلغة الترماى والتروللي باس اللي لو الكهربا قطعت يقف في الشارع ويعطّل الدنيا .. الناس مش عايزة تعرف إحنا عملنا إيه في الشهرين اللي فاتوا - مع إن ومتزعلش مني معلمناش حاجة من أساسه - .. الناس عايزه تعرف إيه اللي في خططك للسنة الجاية .. حتعمل إيه عشان الاقتصاد يتعافى والأمن يرجع تاني .. حتعمل إيه عشان الناس اللي لسه محبوسة في السجن الحربي .. حتعمل إيه وكل يوم ضابط من اللي قتلوا المتظاهرين يطلع براءة عشان مفيش دليل .. حتعمل إيه مع المجلس العسكري اللي كابس على نفسنا وحجته " مش ممكن اسيب البلد أحسن تخرب .. طب وهو فيه خراب أكتر من كده ، وهو على رأس السلطة! ويرد الجنزوري : يا بني ياحبيبي اللي انت بتقوله ده عايز شاب صغير مش راجل عجوز زيي . ويسأل الحفيد بدهشة: وكان حد ضربك على أيدك وقالك لازم تمسك الوزارة؟ .. يرد الجد العجوز : ما انت عارف يا بني أنا قاعد في البيت بقالي سنين وزهقت م القعدة ، فقلت اعمل أى حاجة تسليني .. رد الحفيد : اللي في سنك يا جدو يقعد ع القهوة يلعب عشرتين طاوله .. مصر مش للتسلية يا جدو .. مصر النهارده واحنا في 2012 حاجة تانية .. عايزه دماغ واحد صاحي ومصحصح .. وانت يا جدو لا مؤاخذة يعني بتنسي انت أكلت ايه الصبح. شعر الجنزوري بالحرج من كلام حفيده وسرح للحظات ليست بالقليلة ، وطلب منه ورقة وقلم .. وكتب : الى رئيس المجلس الأعلى للقوات المسلحة .. تحية طيبة وبعد .. ونظر حفيده إليه وسأله : انت بتكتب إيه يا جدو ؟ .. فلم يرد واستمر في الكتابة وقال له : اجري اعمل لي كوباية شاى .. وقول للحاجة تجيب لي دوا الضغط والسكر والقلب ودهان المفاصل .. وغاب الحفيد وعاد فوجده قد انتهى مما كان يكتبه وقال له: إنده على السواق بسرعة.
شفت خير اللهم ما اجعله خير الفريق احمد شفيق بعد نيته السودا بالترشح لرئاسة الجمهورية وفرحته بترشح عمر سليمان برضه عشان ما يبقاش لوحده في وش المدفع ، ولما عرف ان ابن عم حسني مبارك إترشح هو كمان زاد قوة وثقة بالنفس وقال لك : أهو هو ده الكلام .. قال ثورة قال .. ابقوا قابلوني .. إحنا بتوع النظام القديم ، ومن فات قديمه تاه يا غجر ، والدهن في العتاقي .. مين عبد المنعم ابو الفتوح اللي بيقول عليا منفعش أبقى رئيس مصلحة .. هو يعني عشان وقف قدام السادات زمان افتكر نفسه ثورجي .. صحيح أنا عمري وما وقفت قصاد أى رئيس ، وكنت كافي خيري شري في الوزارة .. وعلى رأى حجا لما مراته قالت له : فيه حرامي بيسرق البيت اللي جنبنا ، فرد وكمّل نومه : مادام بعيد عن بيتي مفيش مشكلة .. الحق ياجحا الحرامي في أوضة العيال .. فرد مادام بعيد عن اوضتنا مفيش مشكلة .. الى اخر مادام بعيد عن .. وعن .. مفيش مشكلة عند عمنا شفيق. المهم شفته قاعد متضايق حبتين من كلام أبو الفتوح وسأل المدام : تفتكري اللي أنا باعمله ده صح ولا غلط ؟ .. فردت : انت شايف إيه ؟ قال : متهيألي صح .. قالت : انت طيار يا شفيق .. مفيش متهيألي ، إما صح واستمر ، وإما غلط واخلع .. فقال لها : بس برضه كرسي الرئاسة مغري جدا ، وانتي عارفه انا طول عمري بحب المنظرة ، ومتنسيش انك حتبقي سيدة مصر الأولى . فردت : تغور في ستين داهية .. مش كفاية سوزان واللي عملته والمشانق اللي متعلقة لها دلوقتي ؟ قال شفيق : مشانق إيه ؟ .. ولاحد حيعرف ياخد منها حق ولا باطل .. إذا كان مبارك نفسه بعد كل اللي عمله محدش قادر ياخد قرار هايف وبسيط وينفّذه بنقله لمستشفى طره .. انتي مصدقة التمثيلية دي .. كله متفق عليه وتحت السيطرة. فقالت له : عايز نصيحتي .. بلاش وجع دماغ واصرف نظر عن المسألة دي .. الناس بعد الثورة اختلفت .. مش حيسيبوا حد في حاله .. واللي حيغلط حياخد فوق دماغه ودماغ اللي يتشدد له كمان .. وانت عارف يا شفيق انا ماليش غيرك والعيشة فل والأشية معدن .. بلا رياسة بلا زفت. نظر اليها شفيق وهو يتحسس رأسه وقال : انت شايفة كده ؟ ردت : اسمع نصيحتي يا حبيبي واشتري دماغك .. واللي اخدته القرعة تاخده ام الشعور. قام احمد شفيق وارتدى على عجل ملابسه والبلوفر الشهير بتاعه وخرج .. وسألته زوجته : رايح فين ؟ فرد : جهّزي الشنط .. ولما ارجع حقولك.
شفت خير اللهم ما اجعله خير اللواء محمد ابراهيم وزير الداخلية الحالي بعد التصريح الجهنمي لسابقه اللواء منصور العيسوي بأن " النبلة " هى اللي قتلت المتظاهرين .. قال ايه قاعد في اليبت بعد ما تعشى وشرب الشاى سأل ابنه : ايه رأيك في كلام عمك منصور بيه العيسوي ؟ فرد ابنه : تقصد حكاية النبلة ؟ رد : ايوه .. فسأله الابن : إيه رأيك انت ؟ قال اللواء ابراهيم : والله يا بني مش عارف .. هو بيتكلم صح ولا غلط .. قال الابن : صح ايه وغلط إيه .. فيه واحد عاقل يقول الكلام ده؟ .. رد : وليه لأ .. هومش كان وزير للداخلية قبل مني .. أكيد عمل اتصالات وحقق وعرف .. قال الابن : معنى كده انك مصدق ؟ .. رد : مش مهم مصدق ولا لأ .. المهم حكاية " الأساتك " اللي الواد الصحفي اللي اسمه احمد عفيفي بيتكلم عنها وعايز الحكومة تولّع فيها كلها .. ومش حيبقى في أى حاجة حنلبسها فيها أستك .. دي مشكلة عويصة ومش سهلة. لم يعلق الابن وفوجئ بأبيه يتحدث في المحمول وسمعه يقول : احجز لي يا بني على أول طيارة طالعة جدة ، وشوف لي فندق 5 نجوم في مكة اقعد فيه خمس أو ست اشهر .. حاعمل كام عمرة هناك .. ومش " حا افك " الإحرام ابدا ، لحد ما الحكومة تشوف لها حل في حكاية الأساتك ديه!!
