..شافوهم وهمه بيتحاسبوا

الجماعة الكبار زي المعلم بلاتر واخونا العزيز محمد بن همام والمعلم عيسي حياتو اتحولوا بين يوم وليلة الي كبار رجال الأعمال، سفريات بالطيارات واجتماعات في منتجعات وبطولات في القارات ومولد كبير وماسورة فلوس مفتوحة ولاشلالات »نياجرا«.. وطول عمر الشغل شغال عال العال، اللي مايجيش بالذوق والسياسة ييجي بالفلوس، واللي مايجيش بالفلوس ييجي بالعافية، زينا كده في موضوع »صفر المونديال« فاكرينه ولا نسيتوا.
المهم ان الجماعة: بلاتر وهمام وحياتو، والتانيين اللي اساميهم مش معروفة عايشين دور »المافيا« ودايماً بيفكروني بمارلون براندو استاذ المافيا في الفيلم اللي بحب اتفرج عليه »الاب الروح« او الGod father زعيم المافيا.. بيعملوا كل شيء وماحدش حاسس بيهم.
فضيحة الجماعة اللي ب »جلاجل« في الدنيا كلها كانت هذا الأسبوع.. لما بدأ الجد وكل واحد منهم عاوز يبقي رئيس.. كل واحد طلع للتاني ملفاته والشاطر يكسب.. طبعاً الغنيمة كبيرة.. وماكانش من السهل ان حد يتنازل ولايسامح.. يسامح في ايه.؟.. في مليارات .. مش ممكن!
همام مشيت معاه في الفوز بكأس العالم 2202، وافتكر العملية سهلة بدأ »يلبلب« بالكلام علي بلاتر ويقول انه حرامي.. طبعاً بلاتر مسكتش وعينه أحمرت وطلع الكارت الأحمر: عارفين ايه؟ كارت قطر 2202. ولان همام عارف انه مش ممكن يتكلم، أخذها من قصيرها وانسحب.. صحيح ناس ماتجيش إلا بالعين الحمرا.. واللي يعيش يشوف اكتر.