انتم عارفين إنهم مافيا!

المعلم بلاتر.. والمعلم حياتو.. والمعلم بن همام .. ومعلمين تانيين من كل القارات فيهم كل العبر حولوا الكورة الي حلبة صراع كبيرة علي انقاض المرحومة »الهواية«.. الموضوع مش من النهاردة ولا امبارح ولا حتي السنة اللي فاتت.. أصل الموضوع خطة كبيرة ومحبوكة بدأت منذ أكثر من 04 سنة.
في الأصل لا بلاتر.. ولاحياتو ولاحتي بن همام كانوا يوما بيعرفوا يلعبوا كرة قدم.. لكن همه وأمثالهم من رجال المافيا القديمة هبطوا علي سطح كرة القدم ب»البارشوت«.. زمان في الستينيات وما قبلها كان في حاجة اسمها رياضة، والرياضة كانت هواية.. اللي عاوز يلعب يلعب.. واللي عاوز يجري يجري.. وفجأة ظهر الشياطين.. شياطين المافيا اللي بتستغل كل شيء.. تماما زي مافيا المخدرات .. ومافيا الأسلحة.. ومافيا الأدوية.. ومافيا الاتجار في الأعضاء البشرية.. حد يقدر يقول ان دول مش موجودين؟! بالطبع لا.. موجودون ومقننون وحالهم في الدنيا الجديدة اللي سموها العولمة عال العال.
من نهاية الستينيات جماعة المافيا وضعوا أقدامهم وأنوفهم سنة.. سنة.. شوية.. شوية.. حبة.. حبة.. حتي تمكنوا من الفريسة اللي اسمها الهواية.. استغلوا ضعف النفس البشرية وحبها للمال وشهوتها الفطرية للجمع والاستزادة كمان وكمان.. حولوا الرياضة وكرة القدم علي وجه الخصوص الي حلبة صراع تماماً مثل حلبات اسبرطة اللي كان القوي فيها يقتل الضعيف.. ماتت الهواية.. وانفردوا بالحلبة .. هنيلهم لاننا لن نستطيع أي نفعل شيئاً.. لكن اللي ممكن نعمله بشيء من المقاومة الإنسانية السامية ان نحافظ ولو بقدر يسير علي الهواية في الألعاب الاخري.. وألا نبيع »عمر افندي«.. قصدي الأهلي أو الزمالك.