الثلاجٹة.. والفضائيات الرياضية

جميل ان يكون عندنا برامج رياضية.. والجميل اكثر واكثر ان تكون الأمور والموضوعات المطروحة فيها قيمة وممتعة وذات موضوع مش مجرد حشو ورغي وكلام في كلام.. زمان كانت البرامج الرياضية في التليفزيون العربي الحكومي الأوحد ضعيفة.. مجرد مباراة منقولة ومذيع أحيانا دمه خفيف وغالبا عادي ونادرا دمه تقيل.. فاكرين طبعا أيام الكابتن لطيف والكابتن زيور وأخيرا الكابتن شربيني.
مع اختراع الفضائيات حصل عندنا اسهال في البرامج الرياضية.. كل قناة وبسم الله ماشاء الله عددهم كالليمون كتير قوي.. برنامج واثنان ومعلق ومذيع وضيف وضيوف علي التليفون.. بعض القنوات عملت اكثر من برنامج واثنين ثم تحول الاسهال العادي إلي اسهال مرضي طول النهار والليل.. برامج رياضية وهات يادش.. في الفاضي وفي المليان.. وطبعا التليفزيون الحكومي مش معقول يخرج عن المنظومة قلدهم هو الأخر والضحية هو المشاهد.
صحيح ان السوق والسموات المفتوحة وسحر المال والاعلان له علاقة وثيقة وأكيدة وأبدية باختيار البرامج الرياضية ليعرض سلعته واعلانه لان جمهورنا مجنون رياضة وكورة.. لكن اللي مش معقول ان المشاهد كل ما يقلب قناة يلاقي برامج رياضية.. كل ما افتح التليفزيون ألاقي برامج رياضية.. بعض الناس بتفتح الثلاجة تلاقي المذيع فلان والمذيع علان قاعد جوه.. بعض الناس بتقول وبتسأل الجماعة دول امتي بيروحوا بيوتهم.. بعضهم قاعد في القناة 42 ساعة.. صحيح ان عوائدهم المالية بتشجعهم وتحفزهم علي المبيت امام الشاشة.. لكن إلي هذه الدرجة.. حاجة مش معقولة.. كل شيء يزيد عن حده ينقلب الي ضده.. أنا خايف عليهم من برد الثلاجة.