"برمبال القديمة"بالدقهلية بلا مياه..صراخ الأهالي وغياب المسؤول

يعيش أهالى قرية "برمبال القديمة " التابعة لمركز منية النصر بمحافظة الدقهلية بدون مياه منذ أسبوع، وسادت حالة من الغضب والتذمر بين الأهالى لعدم الاستماع إلى شكواهم أو وجود حلول.
وأكد الأهالى أنهم يعيشون فى معاناة "خزان المياه" المزود بعربة المجلس الذى يأتى إليهم لايكفى لسكان القرية بأكملها، فيتدافع علية الأهالى ومن كان له حظ حصل على قدر كافى من المياه والبعض الآخر يعود إلى منزله كما جاء فارغًا ، وبالرغم من شكواهم إلا أن المسؤولين لا يستمعون إليهم ومازالوا يعانون من المشكلة حتى الآن.
يقول أحمد بدر، من أهالى القرية، "عربية المجلس كل الأهالى بيتجمعوا عليها، فى ناس بتلحق تأخد وناس ترجع بيوتها فاضية، نعمل إيه ساعدونا، إحنا مش عاوزين غير نعيش ونقدر نفرح أولادنا ونلاقى ميه نشربها" .
بينما يقول أحمد محمود، صيدلى، " المياه مقطوعة عن المجلس، وإن وصلت بتبقى مياه مالحة صعب الوضوء منها أو إستخدامها فى الشرب والطبخ، مش عارفين نتوضى منين ولا ناكل ونشرب إزاى، الميه أقل حاجة المفروض أنها تكون متوفرة للبنى آدم، وأبسط حقوقنا السيسي مش عرف يوفره لينا".
ويضيف، أحمد السرطاسى: " القرية بأكملها مرتبطة بعربية واحدة من المجلس، وبناخد كمية صغيرة جداً من الميه، وبنعاني من المشكلة أكتر من أسبوع مفيش حد سأل فينا، مش هنقول غير حسبى الله ونعم الوكيل".
ويشير محمد عبد المنعم قائلًا: " الميه بتقطع عشان مفيش كهربا، وبسبب الكهرباء الضعيفة الالات الكهربائيةكلها خربت "، ويضيف أخر " أحنا رجعنا لأيام مرسى وأسوء ، إنقطاع المياه فى المنطقة صعب ومحدش يقدر يتحمل انه يعيش يوم واحد من غير مياه" .
وصرخ أحد أهالى القرية قائلًا: " إنتخبنا السيسى علشان يصلح البلد، دلوقتى هو اللى خربها ورجعنا لعصر حسنى مبارك، احنا عاوزين نعرف نعيش ونصرف على أولادنا مش أكتر، دلوقتى مش لاقيين مياه نشربها ولا عارفين ناكل، حسبى الله ونعم الوكيل".
لم تكن قرية " برمبال القديمة " القرية الوحيدة بمحافظة الدقهلية هى التى تعانى من مشكلة عدم توافر مياه الشرب، فهناك عزبة السودة وقرية الجنية التابعين لمركز منية النصر، وكفر عبد المؤمن وميت النحال وميت سودان التابعين لمركز دكرنس، وكذلك مركز الجمالية تعتمد بعض القرى على تحويل المياه بإستخدام "تروسيكل" أو تباع بها المياه بإستخدام "جراكن " بسعر 20 جنية للجركن، فالبرغم من تكرار شكاوى المواطنين من عدم توافر المياه، فلا يوجد تحرك من المسؤولين أو إيجاد حل جذرى للمشكلة، ويتسأل المواطنون إلى متى ؟