حلم «بطن البقرة» بطانية من«التحرير»

بصمة الفقر هنا قد تكون أشد وضوحا، ووطأة العشوائيات وتدهور الأحوال بالتأكيد هي أكثر قسوة هنا.. فالفقر وقلة الحيلة دفعت بعضاً من سكان تلك المنطقة إلى النزول لميدان التحرير لا للثورة على الأوضاع ولا حتى للمطالبة بتعديل الحال ولكن ليتسولوا بطانية مستعملة من تلك التى يستخدمها الثوار المقيمون بالميدان لتقيهم شر الشتاء وتسترهم لياليه الباردة هنا فى بطن البقرة.. ليست هذه فقط هى أكثر المشاهد قسوة فى حياة أهل بطن البقرة- لكن الأشد قسوة عندما علمت أن أهالى المنطقة على شفا انتحار جماعى ليس بإرادتهم طبعا لكن بفعل الإهمال وتجاهل المسئولين لهم- فعندما تختلط مياه شربهم بمياه الصرف الصحى. إذن فهى وسيلة الموت الجماعى بلا شك.

لذا فإن أكثر المشاكل التى يعانى منها أهالى المنطقة هى الفشل الكلوى ويرجع ذلك إلى تلوث المياه.. فالمياه عندهم تمر عبر أنابيب ولأن الأنابيب قديمة على حسب ما ذكر أهالى المنطقة وبها نقر وصدى تجعل المياه ملوثة وغير صالحة للشرب.. أما بالنسبة للكهرباء فالمنطقة كلها تعمل بعداد واحد.. كما تشتهر بطن البقر بصناعة الفخار.. فالأطفال يعملون فيها منذ نعومة أظافرهم.. ويعتبر هذا سر أكوام الزبالة التى تملأ المنطقة هناك.. فبطن البقرة هى شبه خرابة بها ناس جدعان وولاد بلد حكمت عليهم الظروف أن يعيشوا فيها.. فشبابها يعانون البطالة فيبحث كل واحد منهم عن سبوبة حتى لوكانت هذه السبوبة أن يبيعوا مناديل ورق فى الميدان.
بطن البقرة إحدى عشوائيات مصر القديمة تقع خلف جامع عمرو بن العاص، وهى عشوائية صغيرة يتراوح عدد سكانها ما بين 4 إلى5 ألاف نسمة.. لاتختلف عن غيرها من العشوائيات.. فالشوارع غير ممهدة للسير عليها وحواريها مموجة وغير مرصوفة.. والبيوت متهالكة نصفها الأسفل مبنى من الطوب الأبيض البائش من مياه الترنشات التى تطفح من حين لآخر بسبب عدم وجود صرف صحى والنصف الاعلى خليط من الطوب الأحمر والطوب الأبيض.. وهذا من الخارج ،أما من الداخل فرائحة العفونة منتشرة فى المكان بسبب التكدس وعدم التهوية.. وأغلب الغرف تكون إيجاراً ويتراوح الإيجار فيها مابين 002 إلى 005 جنيه،

∎ الغلبان صوته ضعيف ومبيوصلش
لذلك كان نزولهم لميدان التحرير ليس بهدف التخريب والدمار مثلما يقال عنهم بل من أجل أن يسمعهم أو يراهم أحد ويشعر بمعاناتهم.. وهذا ما قاله لى محمد عبدالله -62 سنة - أحد شباب المنطقة.. يعمل فى ورشة فخار.. متزوج ولديه 3 أطفال بدأ حديثة قائلا: إحنا زهقنا من الكلام والشكوى.. نفسنا نشوف فعل.. كل رئيس جديد ييجى يقول هنهتم بالعشوائيات وبعد ما ييجى ويقعد على الكرسى بينسى كل اللى قاله: وأنا واحد من الناس اللى اختارت مرسى.. قلت حيتقى ربنا فينا ويراعى الغلابة اللى زينا.. لكن دلوقتى أنا ندمان إنى أعطيته صوتى.. وبعد الثورة الحياة بقت أصعب ومفيش شغل ونسبة البطالة زادت.. ودلوقتى بيقولوا الناس اللى فى العشوائيات دول بلطجية.. وهما اللى بيخربوا البلد.. وهذا الكلام كله مش صحيح.. هما مبيجوش غير على الغلبان عشان عارفين إن صوته ضعيف ومبيوصلش.. الشاب مننا بيشقى من صغره فى كذا شغلانة.. عشان يعرف يساعد أهله فى المصاريف.. احنا مبنشوفش يوم حلو فى حياتنا بنصحى نقول: «يارب أرزقنا وبنام نقول يارب استرها علينا».. الشاب منا بيطلع مبيعرفش يفك الخط معندوش مصدر رزق ثابت.. وكل مابيكبر المسئوليه بتزيد والدنيا بتغلى علينا ومحدش بيسأل فينا.. وفى شباب مبتتحملش الظروف الصعبةدى.. وبتبدأ تأخذ طرق ملتوية.. بتلاقى الشاب بيشتغل فى المخدرات أو الأسلحة أو الظروف تضغط عليه وتخليه بلطجى يثبت الناس ويأخذ اللى معاهم أو حرامى يسرق عشان خاطر يعرف يعيش ويأكل ولاده.. وكل ده ليه عشان الدولة مش معتبرانا بنى آدمين المفروض تساعدنا وتصرف علينا.. أنا بشتغل فى ورشة فخار لكنها مش جايبه همها.. والحال نايم من بعد الثورة.. بكسب فى الشهر 001 جنيه المفروض أصرف منها على ولادى وأدفع منها إيجار الاوضة 002 جنيه وأجيب احتياجات البيت طب ازاى!!.
∎ السرقة حلال عليهم وحرام على الغلابة
وأثناء حديثى مع محمد تدخل معنا فى الحوار أحمد عادل - 03 سنة - وكان شديد الانفعال حيث قال: أنا متزوج ولدى طفلين وماشى دلوقتى فى إجراءات الطلاق عشان مش عارف أصرف على ولادى ومراتى.. وبشتغل فى المدابغ يوم أشتغل فيه وباقى الأيام أقعد أدور على شغل تانى.. حتى قررت فى النهاية أنى أشتغل حرامى.. إيه اللى فيها لما أكون حرامى وأسرق حتى أعرف أصرف كويس على ولادى وأسهل كتير من الشغل الحلال اللى كله تعب وفى الآخر الواحد مش بياخد حاجة.. ما كل واحد جديد بيجى يقعد شوية على الكرسى بيسرق وبينهب فى فلوس البلد وبعد كده بيسيبها ويهرب بره.. فيها إيه لما أسرق أنا كمان ولا السرقة ليهم حلال ولينا إحنا الغلابة حرام؟!.. عجزت عن مقاطعته فى الكلام.. لكنه أكمل حديثه بمنتهى الانهيار والدموع بدأت تنهال على خديه قائلا: والله أنا نزلت الميدان وأخذته كله كعب داير أدور على أى قناة فضائية وأحكى لهم على المعاناة اللى عايشنها وييجوا يصوروا عندنا ويشوفونا عايشين ازاى.. والناس بتاكل إيه و بتنام فين.. لما أكون فى السن ده ومش عارف أعيش ولسه بدور على وظيفة وعندنا رئيس بينام على ريش نعام وكل يوم فى بلد شكل.. وحكومته بتسرق فى البلد.. يبقى ده اسمه إيه؟!.. وفى الآخر يقولوا عنا بلطجية.. انتى شايفانا بلطجية.. دى الناس هنا عايشة فى بيوت هتقع ومستحملين وراضين ونايمين فوق بعضهم فى أوضة واحدة والحمامات مشتركة.. والمياه صاحب البيت قطعها علينا.. أنا نفسى بس يعملولنا أى حاجة.. إحنا والله مش طالبين الصعب.. أنا بيتى بينهد أمام عينى وأسرتى بتنهار وأنا مش عارف أعمل أى حاجة.. الواحد حالته النفسية زى الزفت.. الناس دى بجد مش هتهدى غير لما يشوفونا بلطجية بجد و ساعتها مش هيعرفوا يعملوا معانا حاجة.. عشان الناس مكبوتة وعلى آخرها.

∎ الست فى العشوائيات ملهاش قيمة
بعد أن تركتهم أخذت أتوغل فى حواريها حتى وجدت فتاة تجلس بجانب باب بيتها بقفصى خضار وذهنها شارد فى ملكوت الله.. عرفت أنها نسمة محمد - 23 سنة - تحدثت معها فوجدتها تقول لى: الست فى العشوائيات ملهاش قيمة.. بتتهان بتضرب بيتهضم حقها وبتسكت فى الآخر عشان عايزة تعيش.. أنا كنت متجوزة واكتشفت أنى عندى مشاكل فى الخلفة.. فجوزى فضل يهنى ويضايقنى بالكلام وفضل يكرهنى فى العيشة ويزهقنى عشان أطلب الطلاق.. وفضلت أستحمل عشان مرجعش لبيت أبويا تانى.. لكنه كان بيضربنى وبيجرحنى بالكلام .. فطلبت منه الطلاق.. فقال لى:«عايزة تطلقى اتنازلى عن كل حقك». ومكنش أمامى غير أنى أتنازل عشان أترحم من الضرب والإهانة.. وأخذ كل حقوقى واتجوز واحدة تانية.. ورجعت بعدها لبيت أبويا وقلت له أنى عايزة أشتغل عشان ما أكنش عبء عليه.. لكنه رفض ومكنش عايز يخرجنى من البيت.. وكان بيقول لى إن المطلقة الناس هيتكلموا عليها كتير لو اشتغلت.. وأنا عاوزة أشتغل وأشيل لى قرش عشان الظروف متهنيش تانى.. وأتحايلت عليه حتى وافق وقال لى بيعى خضار بس جنب باب البيت.. أنا بس مستغربة ليه الراجل بيتجوز الست بس عشان يجيب منها عيال.