آخر كلام !!

* إلى كل الذين يطالبون بتوسيع التغيير الحكومى ليشمل الحكومة كلها على بعضها بربطة المعلم لفشلها فى حل المشاكل الرئيسية للمواطن الغلبان: يا جماعة أنا خايف إننا نندم على رحيل حكومة د. نظيف ونفتكر المثل الشعبى «العبيط» اللى بيقول: «بكره تشوف يا ناكر خيرى.. زمانى من زمن غيرى..!!
* نكتة من تأليفى: أمام إحدى المدارس.. استوقف أمين شرطة تلميذاً صغيراً يحمل فى يده كتابا خارجياً.. فسأله الأمين بحزم: إيه اللى فى إيدك ده يا ولد..؟! كتاب خارجى.. ليلتك مهببة بطين؟!
فرد عليه التلميذ وهو يبكى مرتعداً: أبداً والله يا باشا دامش كتاب خارجى.. دا «بانجو»..!!
* بدون أى مجاملة.. قرار المهندس رشيد محمد رشيد وزير التجارة بوقف تصدير الأرز للعام الثالث على التوالى.. قرار حكيم وعظيم وسليم.. فاللى يحتاجه البيت يحرم على الجامع..!!
* الحمد لله إننا عشنا وشفنا مرتب الموظف أعلى من مرتب رئيس الوزراء!..
ماتفرحوش قوى كده أنا باتكلم عن رئيس وزراء بريطانيا.. والكلام إلك يا جارة..!!
* بصراحة مش عارف إزاى يبقى وزير خارجية ألمانيا، الذى تزوج من صديقه، أيوه من صديقه، «فاعل» فى القضايا الدولية وهو «مفعول به».. لامؤاخذة!!
* ممثلة لسه طالعة فى المقدر جديد قالت إنها ترفض العرى.. لكنها ممكن تعمل مشاهد إغراء بعينيها.. فقط..!
بصراحة أنا بطىء الفهم قوى فى الحاجات دى.. ياريت بسلامتها تعمل لنا «بيان عملى على المعلم» علشان نعرف هاتغرينا إزاى بعينين حضرتها؟!..
* فرحة الزملكاوية بفوز الإسماعيلى على الأهلى بالأربعة فكّرنى بفرحة القَرعة اللى مفيش فى راسها ولا شعراية.. وبتتباهى بشعر بنت أختها..!!
* كلمة ورد غطاها:
* شفت «المربى الفاضل» اللى بيوزع على تلامذته برشام مخدر..؟!
** دا يا سيدى مش مربى فاضل.. دا مربى فا....صل.. وفا....جر.. لامؤاخذة..!