عاوزين دهب..؟؟.. تعالوا ننكش..

تعالوا معايا.. وأنكشوا..
وإبحثوا.. ودوروا.. في تراب مصر..
حتلاقوا "تبر".. ومناجم لاتنضب..!!
"الدهب في الأرض.. بس عاوز شباب مصر.. ينكش عليه"..
تعالوا كلنا ننكش.. وأكيد كلنا ح نلاقي.. ونلاقي عجب..
وفي كل المجالات..
كم من ثروات وخيرات.. نهبت من إرضك يامصر..!!
تخيلوا..
من عام 525ق.م بداية غزو الفرس لمصر..
ومرورا بالاسكندر المقدوني وحكم البطالمة.. لغزو الرومان الذي استمر حوالي 1000 عام حتي الفتح الاسلامي (العربي) في عام 642م ولتعيش مصر في ظل الخلفاء الراشدين وحكم الأمويين والعباسيين.. ومرورا بالدولة الطولونية والاخشيدية والفاطمية والايوبية والمماليك البحرية والبرجية..!! إلي أن وقعت مصر تحت الحكم والسيادة العثمانية وسلب ونهب ثروات مصر علي يد الأتراك.. ومن الأتراك للحملة الفرنسية.. للأحتلال الأنجليزي.. يا قلبي لا تحزن!!
كم من بعثات من بلاد الفرنجة.. تكالبت علي تراب مصر..
كم من اكتشافات لأصل الحضارة..
أحجار.. نقوش.. رموز.. أسرار.. مسلات..
صحونا.. علي بانوراما شموخ الحضارة المصرية.. تزدان بها كبريات مدن العالم.. وأتفرجوا علي كم الأثار الفرعونية والمخططات القبطية والاسلامية النادرة بالمتاحف العالمية في مدن أوروبا.. كما لو كانت مغارة علي بابا.. هذا غير القطع النادرة من الاحجار الكريمة من كل لون نفيس.. تزدان بها قصور الأغنياء، وجيد الأميرات.. في جميع أنحاء العالم..!! وبانتهاء حكم أسرة محمد علي عام 1953 واسترداد الشعب المصري سيادته.
لأول مرة منذ 2478 عام ليحكمه أول مصري في التاريخ.. وخطوة.. خطوة رلي أن جاء يوم 7 سبتمبر 2005م الذي استطاع الشعب المصري أن يختار من يحكمه.. وبكامل حريته وإختياره لبرنامج الرئيس محمد حسني مبارك.. لتكون بداية اصلاح حقيقي.. نأمل ان يوفقنا الله جميعا ونتعاون علي تحقيقه.
وحتي يستدل الطريق.. فنحن أحوج إلي كل ما هو مضيئ في ماضينا وكل ايجابي في حاضرنا..
وإسمحوا لي أن تكون باكورة القراءة والبحث والنكش.. قصيدة للشاعر السكندري أمين قاعود.. شقيق الشاعر الراحل فؤاد قاعود..
تخيلوا كما لو كان يتنبأ.. بما سيحدث لنا.. بعد 30 سنة من إلقاء قصيدته أو يمكن إحساس الشاعر اللي عاش معاناة البسطاء وكان شايف..!!
وعنوا ن القصيدة:
الطبيخ "ورق العنب"
تحت العنب..
لما سقط ورق العنب من ع العنب تحت العنب.. فوق مننا
قام الطبيخ.. قمنا حشينا كلنا
جبنا الحلل.. حلل نحاس.. أخر نحاس
لما سقط ورق العنب من ع العنب تحت العنب.. فوق مننا.. قام الطبيخ
وبعدها جبنا الوابور.. وكان نحاس.. يشبه الحديد.. يمكن حديد
عشان مشفتوش يوم جديد.. ملوش ولوع.. ملوش وداع
ملوش رجوع.. رزق اللي باع
ورجله.. عايزة كسرها من قصرها.. هي اللي حرمتني المنام
هي اللي ختمت علي الطعام..
وأضحك علي طعم الأمل..!!
طعم الأمل اللي تملي ألقاه بصل.. اللي ماكنش في يوم عسل
وقال يافكري بالحلل.. حلل نحاس.. أخر طبيخ
لما سقط ورق العنب من ع العنب تحت العنب.. فوق مننا
لما الببور بوظ طبيخنا بالبخار.. قول يالطيف
خلي الطبيخ.. أسود وراح الأحمرار.. وده شيء سخيف
والصلصة فين.. اللي عصرناها بإيدينا.. وكات كتير
دلوقت أصبح مستحيل تحمر تاني.. قبلت كياني
ووقفت وحدي في المكان.. وقلت فين بوابير زمان
لما البريموس كان.. بلمعانه الجديد.. أبص له لحظة
وقلبي يعيش سعيد.. وكان لنا.. لنا وحدنا..
وكانت الفرخة الجميلة..
لو يوم دبحناها في ليلة.. توري لعنينا العجب
تقولش بنحمر دهب..
ليه الوبور ده يتحجب عن عيني ليه؟؟
أدي المكان.. بس الببور مش تمام
ضيعلي في الأكل الأمل.. أيه العمل؟؟
اللي أمناه علي الخضار.. وكان عليه
اللي إحترمناه بربع لحمه بين إيديه
يعمل كده..!!؟؟
لو كان أصيل مكنش رجله في يوم تميل
رجل الوبور ملهاش أمان.. زي الزمان
ولا الزمان ملوش أمان.. زي الوبور
حتي كمان لو كان جديد.. مسيره يأدم عندنا
ويبقي موهوب زينا.. ياكل صدا.. يشرب هباب.. يشيل تراب
يشيل صفيح.. ويشيل.. صجات.. ويشيل حلل
ويشيل طسات.. ويشيل حجات..
يعجز يشيلها أحسن كانون
مهما يكون.. ومهما كان.. مسيره برضه يروح أوام
وكل شيء ملوش دوام
الدوام اللي عصف بالأكل من فوق الببور
سبحانه يجبر خطرنا ويرد جوع
وينمي أزهار الزتون.. رمز الهنا.. كل الهنا.. وأنا هنا
زعلان عليك يا أكلنا.. وأنت هناك
مرمي وجنبك حله نيله.. وقعت علي صحونا الجميلة
كل الصحون.. راحم معاك.. والأبرئين والشفشقين
وأنا هنا.. مليش رغيف
والحلة بعد العشرة.. طلعت حلة دون
عرفانا كلفنا الطبيخ ده.. بالديون
عرفاني منحوس زيها.. من أصلها.. إدرتش تمسك نفسها.. بنفسها
كان الوقوع من نفسها..
أنا كما سبيت لها.. ولعنت أجداد جدها
وجم حلل كل الجيران علي حسها.. فرجتها.. وهزأتها
والأكل راح مننا.. اللي عملناه بدمنا.. صاغ من هنا.. وصاغ من هنا
ورق العنب ده كان بلاش.. طيب صحيح ده كان بلاش
لكن غتونا في رزها.. وفي سمنها.. أحلف يمين كلفتها
كل اللي حيلتي في قلبها.. هان قلبها.. يا قلبها
سلاله الطشت الأصيل.. ملهاش تنا.. وبتنتنا.. وبتنتنه
مالت في ثانية.. جريت أنا جيت جنبها.. سبت القدر في جنبها
وفي دمها بيزقها.. جريت أنا وسبتها..
أصل القدر لو شاف خيال.. مني اختيال يبقي اغتيال
وتتعملي معجزة.. متمهمزة.. ويقوم باخراجها القدر
والحلة مشيت علي البلاط.. والمحشي زاط
وكل شيء ملوش دوام.. حتي الطبيخ ملوش أمان
مسيره يغدر بالبطون.. وأنا هنا
أنا هنا.. بصحني النضيف.. ياهلترا.. يفضل نضيف
ياهلترا حتعود معاه حلة خضار.. ولا الطبيخ ملوش أمان
أديني عايش علي الأمل.. وكل يوم تحت العنب.. بجيب نضيف
تلعب بأفكاري الحلل.. حلل نحاس.. أخر نحاس
لما سقط ورق العنب.. من ع العنب.. فوق مننا
قام الطبيخ.. آخر طبيخ..