أشعار جاهين في ختام مهرجان العامية بساقية الصاوي

اختتم أمس بساقية الصاوي مهرجان شعر العامية الذي أقيم على مدار ثلاثة أيام، وشهد إقبالا جماهيريا وإنفعالا بقصائد صلاح جاهين وفؤاد حداد وبيرم التونسي ، إضافة للقصائد الجديدة لعدد كبير من الشعراء الشباب.
تضمنت فقرة "لقاء الأدباء" أمس أشعار قدمها حسام عكاشة وعبير فوزي، بينما أنشد في فقرة "طقطوقة شعر" الشاعر سالم الشهباني والمطرب والملحن بلال الشيخ، والفنان محمد مجدي.
وفي فقرة "إلقاء مجمع" ألقى الشعراء أحمد عبد الجواد، وأيمن مسعود، ووائل فتحي مجموعة قصائد للشاعر الراحل الكبير صلاح جاهين، كما تضمن المهرجان إلقاء قصائد لبيرم التونسي وفؤد حداد، باعتبارهم مثلث شعر العامية.
وفي الفقرة الأخيرة ألقى الشعراء مصباح مهدي، هاني مهران، مصطفى الحسيني، دعاء فتوح، وأحمد خطاب قصائدهم .
وتم إعلان عن جائزة للمهرجان يوم 27 سبتمبر المقبل.
من قصائده، قرأ الشهباني قصيدة يقول فيها :
انا ابن الغفير اللي فضل
عشرين سنة يحرس الليل من جوا أوضه
عرف كتير عنه وعرفني
أزاي يكون الابتسام للربيع
لحظة دخول برمودة
وقالي
إن يسألك حد عن أسمك
قول سالم فرج عودة
وقرأ سالم قصيدة أخرى يقول فيها :
شكرا لهذا الشعر علمني احترام اللفظ والكلمة
احترام الناس
شكرا لهذا الضل يكسرنى.. وينكرنى في قربه ثلاث
شكرا لهذا الليل يعلمني ماخدش رصاص
ويشهد كبري قصر النيل هذه الجمعة في يناير
أنا غضبان
أنا ثائر
أنا فرد الحمام الحمام طاير من الأبراج
يناديني النشيد أنزل
يصبني في السما خرطوش وأنا اعزل
أنا ماكسرتش القوانين ولا اتعديت ولا اتخطيت حدود الكلمة والمبدأ
أنا غنيت
أنا غنيت لحمي اللي اتولد شفته
وشمس شفتها بتصرخ
صرخت بعز ما فيا على الآخر
أنا فتحت أنا فتحت
أنا فتحت شفت الناس سيول من نور
تثور على العتمة والسجان
وترجع قيمة الإنسان لمعنى كلمة الإنسان
هنا يسقط جنود فرعون أمام الشعب
هنا يتكسر القضبان
يدب الرعب في قلوبهم
ويرهبهم غنى القروان
ووقفة شعب أدام الرصاص الحي
يفسر يوسف الرؤيا ويقرأ
من الحاضر
هنا يطمن خليل الأمة على هاجر
تهاجر أفئدة من الطير لهذه الأرض
ويخضر الشجر يطرح جناين ورد على الجانبين
وتفرد هاجر القوانين على الواردين مياة البئر
يمامة في الخلا واقفة ماهيش خايفة
لا من بومة ولا من صقر
وفي قصيدة "تنورة" التي ألقاها وهو يبكي نقتطف :
أبيض كأنى سحابة صيف بتمر طيف ع الحياة
تضحك لنور الشمس وتقول لطريق
اسماحلى أصالح
قصيدتي
وحدتي
ليلى
شارع قديم بيشدنى لعمر راح وسنين بريئة سنين حنونة
سنين بتشبه رقصة حصانى الخشب لوحده ف البلكونة
سنين بتشبه نزول الخط من ع السطر
تشبه ضياع بالونة من شباك القطر
تشبه ندى ع الورد
قلقان
خايف م السقوط
بلياتشو يضحك عليه جمهوره وهوا بيموت
يضحك لبنته يقولها :
شوفي
تنزل دموعه ف حضنها تبلل الطوفي
يبكى كأنه عصفور
ع النار رقص
مامتش من سجنه
مات من وحدته ف القفص
..
أسود
لون مابيحليش غير للغلابة
واللى ساكنين الرصيف
واللى بيموتوا فى الطابور
بحثاً عن رغيف
لون يسيبنى كل مرة قدام سؤال
أيه اللى ممكن يعمله الشعر
لإنسان ضعيف؟
أيه اللى ممكن يعمله الشعر
لقصيدة ف الشارع بتعصى ع التصنيف؟
ومن قصائد صلاح جاهين قرأ الشعراء:
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات أكتر بترفض تموت
غمّض عنيك وارقص بخفه ودلع
الدنيا هى الشّابه وانت الجدع
تشوف رشاقة خطوتك تعبدك
لكن انت لو بصيت لرجليك .. تقع
عجبى !!
وقصيدة أخرى اسمها "مرحب" يقول فيها :
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت .. قارب نجاة
قالوا مفيش
غير بس هو الحب قارب نجاه
عجبي !!!
مرحب
باكلم الناس كلهم، من هنا ..
وباقول لهم، وللحياة: مرحب.
ودى كلمة ياما اصعبها، ياما اصعب،
لو تنطلق من هنا،
م الصدر، من ع الشمال،
من قلب شال أحمال مهيش هيِّنة..
يا قوة الله ..
أحمال جبال فى جبال، يا ولداه.
أحمال جبال، كوابيس على قلبى.
مولود بها؟ .. والا رمانى البين؟..
أعرف منين!
جانى حكيم واتنين يا صاحبى
جانى حكيم واتنين.
حكيم يقول: ده الهم.
وحكيم يقول: يا عم،
دى خلقه ووراثه عن الوالدين.
ومنين أزيح ده كله عن قلبى..
قالوا: اللى مكتوب ع الجبين، لازم تشوفه العين!
وفي "مقاطع" يقول:
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
النخل في العالي والنيل ماشي طوالي
معكوسة فيه الصور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر