حملة "فكة" لتطوير مصر

هدف الحمله هو الاستفاده من فكره ما يطلق عليها "فكّه" و تحويلها في خدمة المجتمع عن طريق مشاريع في البحث العلمي و الصحه و التعليم و الثقافه و الرياضه و الصناعه.
الفكره في حد ذاتها مطبقه في دول كتير منها أمريكا و السعوديه بس ده من الدوله مش من أشخاص .. و إيماناً مننا ان ده "صعب" انه يحصل من الدوله فققرنا اننا نقوم بالواجب ده.
الموضوع باختصار وده مطبق في أمريكا و السعوديه و دول تانيه وهو ان مثلا في سوبر ماركت بتشتري حاجات والباقي مثلا نص جنيه .. الكاشير بيسألك عاوزهم ولا هتتبرع بيهم لحاجه خيرية ؟
هي دي الفكره ان من الفكه دي ممكن نوجه نشاطنا كله في خدمة المجتمع في مجالات كتير زي التعليم و الصناعه و الصحه .. طبعا ده بشكل مبدأي و بعد كده هيتطور الموضوع انه يوصل للشركات الكبيره برضه .. و إن شاء الله الفكره تحقق المطلوب و هو "تنمية مصر"
الحكايه انك مش عايش لوحدك في مصر في 80 مليون غيرك سواء مستواهم أحسن أو أسوأ منك .. الأحسن انك تحس ان ليك دور في بلدك ولو انك اتبرعت ب"جنيه" واحد من جيبك في الشهر يعني ببساطه لو احنا قلنا ان في حوالي 30 مليون مصري ممكن انه يشارك و يتبرع كل شهر ب"جنيه" يعني 30 مليون جنيه قدرنا نوفرهم لمصر نقدر نساعد بيهم محتاجين كتير سواء في التعليم أو الصحه أو تمويل لأبحاث علميه محدش من المسئولين فاضي يبص فيها أو انتاج أجهزه تقدر تنقل مصر نقله كبيره في مجال الصناعه و تخلينا بدل ماكنا دوله مستورده تبقى دوله مصدره.
طيب حد هيجي يسألني طب هنبدأ ازاي؟
أقوله البدايه اننا هنتناقش ونتحاور ونجمع أفكار جديده ده في المرحله الأولى .. أما بعد كده هيبقى طريقة تنفيذ المرحله الأولى .. بالنسبه بقى للمرحله الثالثه و الأخيره و هي اننا ننزل على أرض الواقع و نبتدي نشوف الأماكن اللي بجد محتاجه مساعدتنا و نبتدي نوجه دعمنا كله ليها ..
و بكده يبقى انت معيشتش لنفسك في الدنيا انما عشت لانسان زيه زيك بس الفرق انه محتاج وانت مش محتاج.