مستجدات قانون الأحوال الشخصية.. الرئيس يُعلق ووزير العدل يكشف الرسوم

قال الرئيس عبدالفتاح السيسي، إن هناك حرص على أن يكون قانون الأحوال الشخصية الجديد متوازنًا، موضحا أن الدولة تتصدى للمشاكل التي يعاني منها المجتمع
من خلال عمل منظومة قانونية.
جاء ذلك خلال كلمته باحتفالية المرأة المصرية والأم المثالية لعام 2023، اليوم الاثنين.
وأضاف: "كلنا حريصين إن قانون الأحوال الشخصية يكون متوازن وبعيد النظر.. محدش له مصلحة يعمل غير ده، متفتكروش في البرلمان الصوت يبقى ضد الموضوعية والتوازن، دي قاعدة عامة، ثم هنعمل نقاش مجتمعي كبير عشان نطمنكم إن الشكل يخرج بتوازن، لكن كل صاحب قضية هيبقى عايز شكل معين، وصعب إن الإنسان يكون موضوعي ومتوازن في قضية خاصة به".
من جانبه، أوضح المستشار عمر مروان، وزير العدل، إنه كان هناك توجيه من الرئيس بتنفيذ مشروع قانون جديد يواكب العصر ويحقق التوازن بين الرجل والمرأة، ويحافظ على الطفل.
وقال: "هذا المشروع انتهينا منه، ونحن الآن في مرحلة المراجعة، المشروع ده جنب منه مشروع صندوق الأسرة، الصندوق قائم، لكن الرئيس وجه بتوسيع خدماته والأموال، وبنشوف موارد دون تحميل أي أسرة مصرية مهما كان مستواها المادي، هتبقى حاجات بسيطة جدا".
وعاد الرئيس السيسي للحديث مجددًا بالقول: "خليني أتدخل، عشان حصل فيها لغط كبير، أنا قلت إيه؟ اسمعوا، ومعلش عذرا، ومحدش يلوي كلامي، أنا بحاول بفهم الدولة إن الدولة تتصدى لمشاكل المجتمع بيعاني منها من خلال منظومة تتعمل، الأسر بتعاني من مشاكل، ونقعد نرفع قضايا في المحاكم، طب الأسرة لغاية ما يحصل ده تعمل إيه
افتكروا مرة قلت لرئيس هيئة الرقابة الإدارية، عايزي يجي عليا يوم لما أسرة لا قدر الله تفقد عائلها، واحنا بنطلع شهادة وفاته، نطلع شهادة بمعاش، معنى الكلام إن البيت ميتهزش أبدا، ده بكلام حلو واحنا قاعدين، ولا بإجراءات تحقق ده".
وأضاف: "لقيت بعد كلامي طلبات الزواج كترت أوي، قالك الحق قبل السيسي ما ياخد مننا 30 ألف جنيه، طب وماله، هيبقى دايما فيه ردود أفعال، الهدف من الصندوق لما يحصل خلاف وانفصال، البيت ميبقاش فيه عوز، الست متبقاش محتاجة، طب نقدر نعمل، اه نقدر، الأب بيبقى شايل هم بنته هتصرف إزاي، وقلت الرقم اللي هيحطوه الزوج والزوجة، الدول هتحط رقم زيه بالظبط".
واستكمل: "إحنا بنعمل حاجات كتير أوي، ومهما كانت تكاليف الزواج الرقم اللي هيتاخد مش بعيد أوي، الأموال هتودع في البنوك، لغاية ما إجراءات التقاضي تيجي يتسدد الرقم، طب مجاش، هندي للناس، لازم نبقى مجتمع قوي ونحافظ على قوة ومكانة اللبنة بتاعته، أنا مش بسخر منكم ولا بعمل حاجة على هوايا، أنا قلت قبل كده، الفهم المحدود جدا لمعاني الدين الجميلة، مش عيب الدين، ده عيب فهمنا، الدولة لازم تحط إجراءات تحل بيها، عمر الدين ما كان مشكلة لناسه، المشكلة فينا وفي فهمنا وتطبيقه".
وقال الرئيس السيسي: "الصندوق عشان متبقاش الست غنية أو مش غنية.. طب لو غنية، هي مالها تدفع ليه؟ ما ندفع كلنا لها، هو مش سهل يعني على أسرة البيت يهدم، وتبقى الست محتارة تصرف منين؟ هو مجتمعنا غالبيته أسر ميسرة ولا ظروفها صعبة؟ دي كانت الفكرة".