نجل مجدي كامل: "حسيت بالموت وحياتي بايظة بقالها 4 شهور"

كشف عادل نجل الفنان مجدي كامل والفنانة مها أحمد عن مروره بأزمة صحية، منذ فترة.
وكتب عادل تعليقًا على صورته من أمام الكعبة "أنا بكتب الكلام ده وأنا إيدي بتترعش وفعلا تعبان ومش قادر، ومش عارف أنا عندي إيه، ومش عارف اتكلم مع حد علشان مش عايز اخلي حد يشيل همي، بس أنا هكتب الكلام اللي عايز أكتبه ده علشان أنا مش عارف اللي جاي إيه ولا هيحصل إيه، أنا حياتي بايظة بقالها اربع شهور من يوم 15-6 لحد انهاردة 15-10".
وتابع "الاربع شهور دول أوحش اربع شهور عدوا عليا في حياتي، من يوم ما جيت الدنيا علشان حصلي فيهم حاجات وجعتني وتعبتني وأثرت على نفسيتي، أولهم كان أول حب في حياتي عاش لمدة سنة ونص وكان نهايته يوم 15-6، بعدها كان وفاة حفناوي صاحبي وأخويا يمكن مكناش قريبين من بعض بس مجرد مبنتكلم مع بعض أو بنشوف بعض بيبقى اكننا نعرف بعض من الحضانة، وكان في ذكريات حلوة اووي لينا مع بعض".
وأضاف عادل "بعدها البيت بتاعنا لما غرق كله ولحد دلوقتي منعرفش غرق إزاي ولا ايه اللي حصل، بس الحمد الله على كل شيء ولحد دلوقتي البيت لسه بايظ، وآخرهم بقى وده لسه من 3 أيام اني تعبت جدا فجأة، وتعبت تعب مش عادي ومش عارف انا عندي إيه ولا الدكاترة عارفين انا عندي ايه، خدت جميع الأدوية وخدت حقن وبنام كويس وباكل كويس وبعمل كل حاجة وبرضه مفيش أي تحسن، أنا بكتب الكلام ده دلوقتي وأنا مش حابب كده خالص ولا كنت عايز أعمل كده بس عملت كده وكتبت كده وهنزله علشان أنا بجد خايف من اللي جاي ومش عارف ايه اللي ممكن يحصل".
استكمل عادل في منشوره المطول "لو حصل حاجة أكون كتبت كل اللي جوايا وأكون ارتحت اني عملت كده، وعلشان برضه تكونوا عارفين إن الضحك و الهزار والخروج والاستوريز مش دي الحياة الحقيقية، الحياة الحقيقية هي اللي انا حكيتها دلوقتي، محدش يعرف انت حياتك عاملة إزاي ولا إيه اللي بيحصل فيها ولا جواك إيه كله، شايفك في صور وفيديوهات مش حقيقية، المهم ربنا يستر في اللي جاي ويعدي على خير إن شاء الله علشان المرة دي انا بجد حسيت بالموت، فلو عدت على خير حياة الواحد هتتغير تماماً في كل حاجة حتى في الصور والفيديوهات، آسف اني طولت عليكوا، يا رب انت الشافي المعافي".