تقدر تعمل كده.. ماذا قال السيسي لوزير الزراعة الجديد؟

قال الرئيس عبدالفتاح السيسي، ردًا على الدكتور السيد القصير، وزير الزراعة الجديد، حول وجود خطة لإعادة تأهيل 51 مزرعة إنتاج حيواني تابعة للوزارة: "علشان أضمن لما أرفع كفائتهم منرجعش هنا تاني، بقول الكلام ده للمصريين ال51 مزرعة إنتاج حيواني دول خرجوا من الخدمة ليه ولما نعيد رفع كفائتهم هيطلعوا برا الخدمة تاني ولا لأ، بقول للناس علشان نعرف دي مشكلتنا.. مش في التطوير لكن في الحفاظ على التطوير".
وأضاف الرئيس السيسي، خلال افتتاح مجمع الإنتاج الحيواني المتكامل بالفيوم، صباح الأربعاء: "مستعدين نعمل كده وندبر الأموال المطلوبة لده إذا كان هيعمل نقلة حقيقية ومع أي حد مخلص يقدر يحل المسألة، لكن القضية تانية إدارة وثقافة تشكلت على مدى سنين طويلة جدًا، إن المال العام مُباح".
وتابع الرئيس السيسي: "تلاقي القطاع الخاص عامل مزرعة ينجح فيها ويكبر وإحنا حاجتنا مبيحصلش كده بالعكس تتآكل سنة بعد سنة، عايز أقولك بما إنك لسه متولي المسئولية، القضية في بلدنا للحكومة والإدارة للمنشآت دي، هل تستطيع تتابع ال51 مزرعة كل يوم، لو قولت آه هقولك هتنجح، قولتلي لأ المنظومة مش كده، لو عندك القدرة دي في ظل ثقافة الآداء الحالي، محتاج تشوف حل في إدارة الشغل ترفع كفاءة المزرعة وبعدين، لازم تبقى مطمن إن العمل يدار بكفاءة تضمن النجاح، النجاح مش فلوس أبدًا لكن نجاح في تحقيق الهدف وتوفير المنتج بأسعار مناسبة".
وأكد الرئيس السيسي: "لوجيت قولتلي ممكن أخلي بشكل أو بآخر نسبة للقطاع الخاص، أنا بقول أهه، تعالوا إحنا عملنا وأنتم بتديروا بشكل كويس تعالوا خشوا واستغلوا وتبقى المصلحة مشتركة للدولة، إيه اللي هيخلي ده ينجح ومنجحش السنين اللي فاتت، السوق كبير في طلب عليه طبعًا، سوق مصر أي حد يقدر يعمل مشروع للأكل والشرب وأي مستلزمات الناس عايزاها ينجح لو تمت إدارته بشكل كويس، الدولة تدفع مرتبات الناس ورغم كده متنجحش".
وأنهى السيسي حديثه قائلًا: "اللواء مصطفى أمين أهه، بكلمه كام مرة، في كل شئ، تقدر تعمل كده، تحط مشروعات قدامك وتبقى فاكرها وحافظ أرقامها وتتابع واحد واحد، الجيش زي المسطرة، لكن بالرغم من كده بنعتبر مسئولين عن الحفاظ على الدولة المصرية من السقوط، هي دي الحكاية، مين يعمل معايا الموضوع ده، اللي يقدر يعمل معايا كده أنا معاه، خلينا الجيش يساهم بجزء من قدراته في الموضوع علشان يساعدنا باعتبار أن الحفاظ على الدولة واستقرارها أمن قومي".
ووصل الرئيس عبدالفتاح السيسي، صباح الأربعاء، إلى محافظة الفيوم، لافتتاح مجمع الإنتاج الحيواني المتكامل، الذي يستهدف تقليل الفجوة الغذائية في البروتين الحيواني.
ويهدف المُجمع لتوفير اللحوم بكميات كبيرة وجودة عالية لخفض الأسعار، إضافة إلى تحقيق التكامل المتبادل بين مشروعات الإنتاج الحيواني ومشروعات الإنتاج الزراعي.
ويضم المشروع زارع لتربية الماشية بمختلف أنواعها ومجازر آلية حديثة متكاملة ومصانع لمختلف منتجات الألبان. ويتيح العديد من فرص العمل المناسبة لمختلف التخصصات ومستويات التأهيل العلمي.