لماذا غضب سكان "ميت عقبة" من حفر أول محطة مترو بالمهندسين؟ (معايشة)

تصوير- محمود أبو ديبة:
بدأت وزارة النقل، أمس الأول، الأعمال الإنشائية بشارع وادي النيل بمنطقة المهندسين؛ تمهيدًا لإنشاء محطة وادي النيل الواقعة ضمن الخط الثالث لمترو أنفاق القاهرة الكبرى.
وأغلق مسؤولو محافظة الجيزة بالتعاون مع الإدارة العامة لمرور الجيزة، الشارع أمام حركة المواطنين والسيارات على مسافة 300 متر، بدءًا من تقاطعه مع شارع جزيرة العرب حتى نفق وادي النيل، لمدة ثلاث سنوات؛ الأمر الذي أثار استياء عدد من سكان المنطقة.
قالت سارة من سكان شارع وادي النيل، إنه لم يتم إخطارها ببدء الأعمال الإنشائية بالشارع: "اتفاجئنا يوم الخميس بالليل إنهم بياخدوا المقاسات، وبنسأل قالولنا إنهم بيشتغلوا في حفر المترو.. محدش قالنا إن في حفر مترو هنا".
أضافت سارة لمصراوي: "ليه يدخل المترو وادي النيل.. الشارع هنا ضيّق، كان ممكن من جامعة الدول وبعد كده أحمد عرابي، الشارع مليان بنوك ومحلات كتيرة يعني هيوقفوا حاله!".
تابعت: "إحنا عندنا في البيت أكتر من عربية بنركنها في جراج البيت، دلوقتي هنضطر نركن بره البيت، ومافيش أماكن في الشوارع اللي جنبنا، المنطقة هنا زحمة جدًا.. ليه يعملوا مترو هنا، إيه السبب في إن يكون هنا مترو؟، المترو يعني هيحوّل المنطقة من أرقى المناطق في البلد لمكان مش نضيف زيه زي المحطات الباقية".
أما محمد –يعمل بائع بمحل ملابس منذ 3 سنوات- أوضح أن غلق الشارع ثلاث سنوات لحفر المترو سيؤثر على إقبال الزبائن للمحل.
"مشروع قومي هيفيد البلد، لكن لازم يكون في تعويضات خصوصا أنه هيقعد 3 سنين، وهيأثر على إقبال الزبائن، حركة الشغل نفسها هتقل، الزبون اللي جي بيركن قدام المحل ويدخل يشتري حاجه هيركن فين وهيخشلي إزاي؟" يُكمل محمد.
رأى البائع الأربعيني أن غلق الشارع لحفر المترو "هيأثر على العمالة.. اللي عنده 20 عامل مثلًا هيخليهم 5 عمال".
أشار محمد لمصراوي إلى علمه ببدء حفر المترو قبل أسبوع فقط: "عرفنا قبلها بأسبوع لما أحد المهندسين طلب الدخول للمحل، وطلب يقيس درجة الهبوط عشان هيحفروا المترو.. كان لازم يكون في إخطار للمحلات قبلها بسنة على الأقل عشان الناس تدبر حالها".
"كنا بنشتغل 24 ساعة.. دلوقتي مش هنكمل كام ساعة في اليوم" هكذا رأى حسن عامل بأحد الأكشاك تأثير غلق الشارع أمام حركة المرور.
قال حسن لمصراوي إن غلق "وادي النيل" يؤثر عليه بالتأكيد، خاصة مع وجود أكثر من عامل بالكشك، متابعًا: " كنا سامعين كلام أن في مترو هيتعمل قبلها بكام شهر هنا".
من جانبه قال حسن توفيق المتحدث باسم الهيئة القومية للأنفاق لمصراوي، إن الهيئة دعت أهالي الشارع إلى حوار مجتمعي مرتين، منذ 6 أشهر، شرحت خلاله أسباب اختيار الشارع لإنشاء محطة المترو، حرصًا منها على إقامة حوار معهم، متابعًا: "مفيش حاجة اسمها مفاجأة".
أضاف توفيق في تصريح لمصراوي: "عملنا إعلانات للحوار المجتمعي على الإنترنت وفي الشارع، يحضر فيها اللي يحضر، واللي مبيحضرش خلاص مش هنجيبه من بيته بالعافية".
وأوضح المتحدث باسم الهيئة القومية للأنفاق أن "اختيار الموقع مش حاجة عشوائية، لكنها تمت على مدار سنوات، وإحنا بنختار أنسب مكان للمواطنين، عمال، وطلاب، وسكان، ورواد المنطقة".
تابع: " المكان اللي تم اختياره تم عن طريق الممثلين من لجنة بين الهيئة ووزارة النقل ومحافظة الجيزة، واستشاري فرنسي والمقاول الفرنسي، مش اختيار عشوائي خالص".
استكمل: "المحطة لها مداخل ومخارج ومناطق تهوية، وعند اختيار المحطة كل ملحقاتها بدءًا من المداخل والمخارج ومحطات التهوية والكهرباء حتى السلالم والمصاعد، تكون مراعاة ومأخوذة في الحسبان".