بالصور

تصوير.. مي فتحي سلامة
مشوار الالف ميل بيبدأ بخطوة، برضه مشوار تطوير منطقة عشوائية فى عاصمة ام الدنيا، بيبدأ بخطوة، مجلة كلمتنا بالتعاون مع جمعية رسالة بدأوا الخطوة دى فى تطوير منطقة جبل عز فى حى السيدة زينب فى القاهرة.
يوم الخميس (23-12-2010) كانت البداية، أول خطوة كانت توزيع حوالى 250 بطانية على اهالى منطقة جبل عز، بدأنا اليوم بالتجمع قدام جمعية رسالة فرع المهندسين، وبدأنا بتحميل البطاطين و اتجهنا الى منطقة جبل عز وانضم لينا متطوعين من جمعية رسالة فرع حلوان، الملفت للنظر ان معظم المتطوعين كانوا من البنات.
فى اول اليوم عرّفنا اهالى المنطقة اننا هننزل لكل بيت و اسرة و ياريت تستريحوا فى بيتوكم، واحنا هنيجى لحد عندكم، وكان فى تعاون الى حد مقبول من الاهالى، وبدأنا نتقسم الى كذا مجموعة و كل مجموعة كان معاها واحد من اهل المنطقة عشان يقدر يوصلنا للناس بطريقة اسهل وفعلاً انتشرنا فى منطقة جبل عزوبتوفيق ربنا-عَز وجل-وزعنا البطاطين على الاهالى..وكمان لعبنا كورة مع طفل كان معاه كورة و بيلعب مع اطفال زيه فى المنطقة - اعتقد الاطفال دول ثروة كروية مدفونة - ولما خلصنا توزيع البطاطين اتجمعنا وركبنا الاتوبيسات و روَحنا، نسيت أقول حاجة "اجمل احساس فى الدنيا انك ترسم بسمة على وش حد محتاج او تحس انك فعلا بتساعد على تغير شئ للأحسن اكيد كلنا نفسنا نحس الاحساس ده".
لو انت كمان عايز تحس الاحساس ده .. تابع معانا خطوة بخطوة فى تطوير جبل عز وشارك مع مجلة كلمتنا و جمعية رسالة فى مشوار تطوير جبل عز و خليك ايجابى.
اقرأ ايضاً :
مجلة كلمتنا وجمعية رسالة فى جبل عز "شارك وخليك ايجابى"