حقنا للدماء... اسكتوا

مشهد رقم واحد :
حقنا للدماء..عودوا الى منازلكوا ..لقد تنحى الرئيس..عودوا الى منازلكوا و اخلوا الميدان دعونا نطوى صفحة الماضى دعونا نبدا من جديد.."يوم 11 فبراير يوم تنحى الرئيس المخلوع"
مشهد رقم اتنين:
حقنا للدماء..عودوا الى منازلكوا..تم تشكيل لجنة "تقصى الحقائق" وسنعرف الجانى اذا كان اهالى الشهداء او الأمن المركزى او البلطجية المندسين او..او.أو.. -بس يا جماعة دول حوالى 1120 مصاب !! نرجع ازاى !..ارجعوا و سيبوا التحقيقات تاخد مجراها..كفاية خراب فى البلد مش لاقيين ناكل !!..طب و ابنى المصاب ؟؟..متقلقش 10 الاف جنيه تعويض ان شاء الله..(احداث البالون)
مشهد رقم ثلاثة :
يا اقباط مصر..عودوا الى منازلكوا ...اخلوا منطقة ماسبيرو...اعيدوا الحركة المرورية للمكان...عجلة الأنتاج هتتخرم..! طب هو انا لما كل شهرين يحصل اعتداء على كنيسة..مش من حقى انزل اصرخ ؟ مش من حقى اطلب بحقى ؟..يا سيدى قدم بلاغات للنائب العام هيجبلك حقك..بس بلاش اعتصامات ابوس ايديكوا..طب و ال 19 قتيل اللى ماتوا ؟ وعشرات الماصبين؟؟...متخافش عملنا لجنة "تقصى الحقائق"..!!..(احداث ماسبيرو)
مشهد رقم اربعة :
حقنا للدماء..عودوا الى منازلكوا ..و على فكرة المظاهرات دى ليس لها اى داعى..وانتو اغلط..وانتوا مخربين..وانتوا ولاد ...!! يا سيدى ماشى احنا ولاد ستين فى سبعين..عايزين نعرف بقى مين اللى غلطان دلوقتى ؟؟ عايزين محاسبة ؟؟ دول 309 مصاب..ومنهم 13 من الشرطة العسكرية !! الناس دى دمها مش رخيص اوى كده !!...اخلوا الميدان انتوا بس و تم تشكيل لجنة "تقصى الحقائق" و الحق هيبان..و كفاية بقى خربتوا البلد (احداث العباسية)
مشهد رقم خمسة :
حقنا للدماء..عودوا الى منازلكوا..كفاية تخريب..لا المرة دى استحالة.. دول 41 قتيل و المرة دى الاف من المصابين..اصابات مش عادية..ناس عيونها اتصفت..عيونها راحت تماما !!..كشوفات عذريه , سحل , البنت اللى اتعرت ؟؟..طب ما انتوا غلطانين حد قالكوا تتظاهروا..هو مش التظاهر ده حق مكفول ليا ؟ بعدين انا معترض على وثيقة السلمى..اسجل اعتراضى ازاى ؟؟ ابعتله الشكوى على الفيسبوك ؟؟..لسه برضه هتقولى ارجع البيت ؟؟..اه ارجع و انتخابات مجلس الشعب اهو على الأبواب و تم تشكيل لجنة "تقصى الحقائق" و كله هيبقى تمام..وكفاية بقى خربتوا البلد..بس انا مش شايف حد حاله اتخرب غيرنا !! احنا اللى بنموت و عيونا بتتصفى !! برضه كفاية بقى خربتوا البلد هاه (احداث محمد محمود)
مشهد رقم ستة:
حقنا للد....لماذا لم تٌكمل ؟ ..اصابك العدد بالدهشة ؟؟ 77 قتيلا طبقا لأحصائيات وزارة الصحة..لكن بشهادة كابو الألتراس و اهالى الشهداء 150 قتيلا !!..اهمال امنى متعمد لا يقبل مجالا للشك..مؤامرة عسكرية دنيئة بالاشتراك مع جميع السلطات الحاكمة..بالطبع اذهلك عدد الوفيات..لذلك ستقوم بتغيير صورة الصفحة الشخصية الخاصة بك الى حداد..و ستبكى عندما ترى صورة صغيرنا "انس"..و لن يمر عليك اكثر من 10 ايام..و ستطالبنا بنفس المطالب..عودوا الى منازلكوا..حقنا للدماء.. و هنشكل لجنة "اقصاء الحقائق" وابتعدوا عن محيط وزارة الداخلية..!! بالله عليك..كيف تطلب من ام ثكلى ان لا تغضب ؟..مستائون من التظاهرات امام وزارة الداخلية..قل لى اين نتظاهر تعبيرا عن غضبنا من الأهمال الأمنى المتعمد ؟ نتظاهر قدام سيتى ستارز مثلا ؟؟..ما انتوا سبتونا شهور فى التحرير ناكل فى نفسنا ولا حد سمعلنا..سبتونا لحد ما وصلنا خلال سنة واحدة الى :
2286 شهيد, 7811 اصابة , 27 كشف عذرية, سجن 16 الف مصرى تحت اسم "المحاكمات العسكرية"... تم تحويلنا الى "عشة فراخ" يتم احصاء القتلى بعدد الجثث..!! تم اهانة نتيجة الأستفتاء على التعديلات الدستورية و لم يتم العمل بها..!! و كان كتابة الدستور فى ذلك الوقت خطوة كفيلة باختصار كل تلك المسافة الدموية..
لكنكم اخترتم الأستقرار و عجلة الأنتاج..حلو الأستقرار ده ولا عايزين استقرار اكتر ؟؟..حزب الكنبة العزيز..اننى اسلب منك الحق تماما فى التعبير عن رأيك..نعم..فلقد قمنا بمظاهرات مليونية مات فيها الاف الشهداء تعبيرا عن مطالبنا..بينما انت قمت بمظاهرات عشرينية سواء فى ميادين العباسية او روكسى و لم يسقط لك فى تلك المظاهرات قطرة دم واحدة..من الأن يستحق التعبير عن رأى الشعب !!.. و مادمت اخترت ان تكون ضمن حزب "الأغلبية الصامتة" كيف تطلب ان يكون لك صوت ؟؟ و لا اريد ان اسمع جملة "ميدان التحرير مش مصر"..لأ..ميدان التحرير هو مصر..ليك رأى تانى ؟ انزل اعمل مظاهرة و احتج و قول رأيك..بس لما مظاهرتك دى تكون فيها 23 فرد بس..مينفعش ساعتها تفتح بوقك و تقول الميدان لا يمثل مصر..
اخيرا..اطلب منكم ان تتركونا نبنى تلك البلاد فى صمت..اكتفينا تعليقاتكم المبتذلة..كنا نسخر منها و نضحك عليها و نألف منها النكات..و لكن الأن..فاض بنا الكيل..او فاضت بنا الدماء كتعبيرا ادق..احنا الجيل اللى دفعنا تمن حريته دم..احنا اللى اتسحلنا و اتضربنا و اتخونا و اتشتمنا و اتكفرنا..احنا الجيل اللى اشترى البلد دى بدمه..فأرجوك سبنا نكمل ثورتنا
و انا اللى المرة دة هقولك : "حقنا للدماء...اسكتوا.!!