اخترق ال«هاكرز» صفحة جروب دعم جمال مبارك على موقع «فيس بوك»، ووضعوا صورة جمال مبارك عليها علامة «إكس»، ومكتوباً أسفلها «غير مرغوب فيك».. لم تعرف الأجهزة المختصة هوية الهاكرز، ولكننا حاولنا معرفة أفكارهم، فكان هذا الحوار: ■ ليه عملتوا كده؟ - وليه ما نعملش كده أصلاً؟! ■ بس ده تصرف غير أخلاقى.. ولا يضع فى حساباته حق الآخر فى التعبير عن رأيه. - طيب كان فين حقنا إحنا طوال 30 سنة.. كان فين حقنا فى الديمقراطية وحقوق الإنسان؟ ■ تفتكروا النضال يكون عبر الفضاء الإلكترونى؟ - وهل كان هناك فضاء آخر علشان نناضل فيه من أجل حريتنا وبلدنا؟ ■ وذنب جمال إيه تشوهوا صورته، وتكتبوا عليها كلام فارغ - لا مؤاخذة؟ - دى رسالة.. وجمال بيحكم فى وجود والده الرئيس.. وبعدين هوه اللى عايز يكون رئيس.. كفاية بقى! ■ إنتوا فى حركة كفاية؟ - وهل كل الذين يقفون ضد التوريث فى حركة كفاية فقط.. الشعب كله ضد التوريث.. وعايز تغيير! ■ بلاش التعميم بس، وماتنساش إن الحزب الوطنى مش عايز تغيير خالص! - لأنه مستفيد، ولأن التغيير مش فى مصلحته، ولا فى مصلحة الحيتان بتوعه! ■ استطلاعات الحزب الوطنى أكدت أن آخر شىء ينشغل به الناس السياسة.. الناس عايزة تعيش فقط، وتتحسن ظروفها المعيشية! - الاستطلاعات دى كانت من حزب الحاكم على أتباع الحاكم.. عاوز النتيجة تكون إيه يعنى؟ ■ تقصد تمثيلية من وجهة نظرك؟ - إحنا بنعيش تمثيلية كبرى.. اسمها التوريث.. لكن على مين، ورب الكعبة لو آخر يوم فى حياتنا. ■ حياتكم مين؟.. الهاكرز قصدك؟ - لأ طبعاً.. المصريين مش هيقبلوا حاجة فيها توريث أبداً! ■ أفهم إنك لا تقبل التوريث على الإنترنت، ربما تستطيع مقاومته إلكترونياً، باعتبارك محترفاً.. لكن هتعمل إيه لو حصل؟ - كل شىء بأوان، ربنا يسهل.. مصر غير أى دولة حضرتك! ■ تعرف أن الهاكرز يخضع للمساءلة القانونية؟ - يا عزيزى كلنا هاكرز! ■ يعنى إيه؟ - يعنى برضه اللى عايز توريث هاكرز، واللى اغتصبوا الوطن هاكرز، واللى صادروا حرياتنا هاكرز! ■ يااااه.. بس أنا شايف إنكم مثقفين، عارفين تكنولوجيا متقدمة، وباين عليكم فاضيين للسياسة. - دى بلدنا ومش ممكن نفرط فيها.. مش فاكر الأغانى الوطنية.. نيلها جوه دمى؟ ■ أيوه بس هتعيشوا منين.. أكيد فيه مصادر دخل أو تمويل.. ماتآخذنيش! - هيه دى النغمة.. التمويل والاستقواء بالخارج.. لأ يا سيدى برأسمال وطنى.. هوه كان الضباط الأحرار استقووا بالخارج، ولّا خدوا حاجة من حد؟! ■ الزمن اختلف.. وتوزيع الثروة والسلطة.. الدنيا اتغيرت! - اتغيرت للأسوأ أنا معاك.. لا ديمقراطية ولا انتخابات، ولا فرص عمل.. باعوا كل شىء! ■ لأ لسه فيه الصحراء الغربية.. هههههه! - طيب.. هانستنى إيه؟.. نبيع هدومنا بقى؟ ■ عاوز أرجع معاك لجمال مبارك.. مش ممكن يبقى كويس.. وإحنا بنظلمه؟ - لا كويس ولا حاجة فى ظل الظروف دى.. هم لا يريدونها انتخابات حقيقية، يريدونها توريث! ■ بس هوه نفسه قال فى معسكر شباب أبوقير «لم أرشح نفسى»! - كلااااام.. على رأى صباح! ■ كلام إيه، إذا كان هوه اللى بيقول؟ - خلاص يبقى زعلانين ليه، إذا كنا ضربنا جروب ترشيحه، وسنفعل ذلك لتحقيق رغبته! ■ إنت شكلك برادعى؟ - هوه البرادعى رشح نفسه رئيساً؟ ■ أخيراً.. هل لديك أقوال أخرى؟ - نفسى أعرف جمال مبارك بيتكلم بأى صفة.. مجرد سؤال من هاكرز.. مش قلت لك كلنا هاكرز؟!
