تنفرد اخبار الحوادث بنشر قصيدة بريء لمحمد ابوذكري مدير تحرير جريدة الاخبار أنا البرئ إبن البرئ أنا إبن أرضك يا وطن ميه وطين ..حبة حنين أنا دمعه محبوسه علي خد السنين وليل طويل ونهار عليل أنا هم جيل ورا جيل أنا الغريق طول الطريق فى بحر حب الكون والفنون والبشر صابر وراضى بالقليل وماشى جنب حيطان أيامى بأغنى مع الناى الحزين وألملم همى من دمى ودمعى جارى يروى الغيطان بعرق النيل أنا إللى إتسرق عمرى لحد ما شاخ كلامى وشابت معاه أحلامى وضاعت مع طلة قمر وزقزقة عصافير هربت فى ضل الشجر أنا إتنين فى واحد والرب واحد والحزن واحد والفرح واحد أجراس أدان قرآن مع إنجيل أنا المصرى أنا الأنسان أنا أحمد إبن سبع الليل وبراءة الأيام أنا إبن أبو سويلم والأرض العطشانه للحريه واللقمه الهنيه أنا أدهم الشرقاوى والغناوى والحكاوى وكلمة الحق إللى بتسبق كل الخطاوى أنا الفلاح الفصيح والحزن والفرح الصريح أنا القلب المفتوح يناجى الروح أنا الضحكه بدون تصريح أنا إللى كان حب الخير بيملانى وعمرى ما كنت بخيل أوأنانى وكان حنانى طريق مفروش بالحب لكل أصحابى وخلانى وبحلم وأعيش وأغنى بكل اللغات والمعانى وأنا البسمه المسكونه والمكنونه والمدفونه جنب عنوانى أنا الهرم والنيل والحزن الجميل أنا المصرى كريم العنصرين وإسمى مكتوب على جدران الزمن من آلاف السنين وكل الدنيا عرفانى أنا محفوظ وإدريس والحكيم وطه حسين والتوأمين أمين الكل كانوا مسلمين متنورين...متعلمين وعلمونى إزاى أكون عقل ماشى بضمير والكلمه عنوانى أنا مكرم عبيد وشنودة ومتى ومار جرجس والسيدة العذراء والسيدة زينب والحسين ونفيسة العلم دارى ومكانى أنا الحضارة والتاريخ فرعونى قبطى إسلامى أنا مجدى يعقوب طبيب القلوب ودرويش وفريد وحليم وام كلثوم وفيروز وفنونهم إللى عايشة فى وجدانى أحلامى أبسط م البساطه عيشه هنيه وهدمه تستر الأبدان الطاهرة العفيه وقلوب صادقه بريئة نقيه وعيون بتطرح نور ودستور نمشى بيه كلنا الحكمه عنوانه والكلمه فيه تصبح قويه وبحلم يا مصر ليكى والحلم مش مستحيل تعود شمس أيامك وأحلامك تتحقق بإيد ولادك وأحفادك وشموعهم تقيد قناديل ونقول لكل من زارك إدخلوها أمنين ونعود تانى طيبين الأرض حضن أمين والبرئ يرجع برئ والأمان يملا المكان ونقول بصوت واحد كل البشر إنسان الحضن يجمعنا أقباط مع مسلمين والرب رب العالمين أمين أمين أمين شعر.محمدأبوذكرى.
