طريق النور

البريء!

أنا البريء.. ابن البريء.. أنا ابن أرضك يا وطن.. ميه وطين.. حبه حنين.. آهه أنين.. أنا دمعة محبوسة علي خد السنين.. وليل طويل.. ونهار عليل.. أنا هم جيل ورا جيل..
أنا الغريق طول الطريق في بحر حب الكون والفنون والبشر.. صابر وراضي بالقليل.. وماشي جنب حيطان أيامي.. بأغني مع الناي الحزين.. وألملم همي من دمي.. ودمعي جاري يروي الغيطان.. بعرق النيل.. أنا اتنين في واحد.. الهم واحد.. أجراس آدان.. قرآن مع إنجيل.
أنا المصري.. أنا الإنسان.. أنا أحمد ابن سبع الليل.. وبراءة الأيام الهنية.. أنا ابن أبوسويلم والأرض العطشانة للحرية.. أنا أدهم الشرقاوي والغناوي والحكاوي.. وكلمة الحق اللي بتبسق كل الخطاوي.. أنا الفلاح الفصيح.. والفرح والحزن الصريح.. أنا القلب المفتوح والجروح والروح.. أنا الضحكة بدون تصريح.
أنا اللي كان حب الخير بيملاني.. وعمري ما كنت بخيل أو أناني.. ولا مجني عليه ولا جاني.. وكان حناني طريق مفروش بالحب لكل أصحابي وخلاني.. وبحلم وأعيش وباغني بكل اللغات والمعاني.. وأنا المحطة المسكونة والمكنونة والمدفونة جنب عنواني.. أنا ابن الهرم والنيل.. والحزن الجميل.. أنا المصري كريم العنصرين.. واسمي مكتوب علي جدران الزمن من آلاف السنين.. وكل الدنيا عرفاني..
أنا محفوظ وإدريس والحكيم وطه حسين والتوأمين أمين.. الكل كانوا مسلمين متنورين متعلمين.. وعلموني إزاي أكون عقل ماشي بضمير والكلمة عنواني.. أنا مكرم عبيد وشنودة ومتي ومارجرجس.. والسيدة العذراء والسيدة زينب والحسين ونفيسة العلم داري ومكاني.. أنا الحضارة والتاريخ فرعوني قبطي وإسلامي.. والأزهر الشريف المنارة والعلم والاستنارة.. أنا مجدي يعقوب طبيب القلوب ودرويش وأم كلثوم وعبدالوهاب وفريد وفيروز والفنون اللي عايشة في وجداني.
أنا الإنسان.. اللي عاش علي أرضك يا مصر بأمان من قبل الزمان بزمان.. الكل راكع وساجد للواحد الديان.. دلوقتي صبح ابنك يا مصر.. خايف ذليل تعبان.. الوشوش غير الوشوش.. والصدور مليانة حقد وغل وبتفتش في السجايا والنوايا.. والحجاب غطي الرؤوس ويا النفوس.. والعقل غاب والحزن شاب.. والرحمة والحنية مدفونة تحت التراب.. والجلباب واللحية والسبحة صبحو ديكور.. والنور سراب.. والصدق في الوجوه كداب.
فين الأمان.. فين الميه للعطشان.. فين الحنان.. الحيط جنب الحيط ومفيش جيران.. والخوف ملفوف جوه الجوف.. والحق ضاعت كلمته بعد ثورتنا المجيدة في كل ميدان.. والحزن عشش في القلوب وفي الأبدان.. ودم الشهيد راح.. والحدود صبحت سداح ومداح.. والوطن والحلم والحرية مكتفين خايفين.. الكل مستني الادان.. أدان العدل والميزان.
أحلامي أبسط من البساطة.. عيشة هنية.. وقلوب صادقة بريئة تعرف ربها مليانة حنية.. وترفع رايات الهلال والصليب من تاني بقلوب نقية .. وعيون بتطرح نور.. ودستور نمشي عليه الحكمة عنوانه والكلمة قوية..
وباحلم ليكي يا مصر.. والحلم مش مستحيل.. تعود شمس أيامك وأحلامك تتحقق بإيدين ولادك وأحفادك.. وشموعهم تقيد قناديل مع مواويل.. نحكيها للأيام والسنين.. وتقول لكل من زارك إدخلوها بسلام آمنين.. ونعود من تاني طيبين.. الأرض حضن كبير أمين.. والبريء.. يرجع بريء.. والأمان يملا المكان.. ونقول بصوت واحد.. كل البشر إنسان.