فركش

الاستقرار.. اختيار شعب

* الناس لما بتعرف إيه اللي بيحصل حواليها بتفكر وبتاخد قرارها من دماغهم.. عشان كده لما اتكتب عن رفض مصر لتحركات أمريكا بالنسبة لسيناء وغزة وبسبب كده الإشاعات مالية الزفت السوشيال ميديا والضرب شغال ضد رموز الدولة في محاولة رخيصة فاشلة للعب بورقة ارتفاع الأسعار.. الناس قررت واختارت استقرار البلد بدون ضغط ولاغيره.. واقتنع العالم إن مصر رجعت دولة قوية من تاني بعد سنتين مؤامرة 25 خساير وبعدها سنة هباب للإرهابيين .. وهي دي مصر اللي بعض ولادها للأسف مش عارفينها..لكن مصر ستحيا.. وتحيا مصر.
* وبمناسبة الإرهابيين .. فإن أبو تريكه مازال مدرجاً علي قوائم الإرهاب .. وكفاية فضيحته اللي بجلاجل لما إتصور مع مشجع إسرائيلي في مونديال موسكو وبيكدب ويقول ماعرفش إنه إسرائيلي.. وكله كوم ووائل البراشي كوم تاني الأخ ولعها قعد يسخن ويطنطن بحكم النقض وبيدافع عن الإرهابي أبو تريكه.. وماستغربتش لأنه هو نفسه عنده صور شهيرة مع البلتاجي الإخواني ورموز الإرهاب.. وأقول لكل مذيع بيحب بلده وبيكره الإرهابيين إن أبوتريكه مايستحقش تجيب إسمه علي لسانك حتي لو بحجة إنه لاعيب فلته وإلا تبقي بتخون دم اللي راحوا علي إيد الإرهابيين وتبقي منهم..!!
* قلت هنا كثيراً إن قناة صدي البلد رمز للإعلام الوطني المحترم.. لكن ماحدث مساء السبت الماضي لايعبر عن مبادئ القناة ومالكها ومديريها.. الأخ مظهرشاهين بعد أن إنكشف في مؤامرة 2011 وبعدها مفيش قناة بتستضيفه لأن تاريخه معروف من أيام الدقهلية .. يبقي اللي استضافه في صدي البلد لازم يتحاسب لأنه أكيد عارف .. وطبعاً المذيع كان صعبان عليا لما وشه بقي أحمر من الإحراج وبقي يعتذر عن تطاول وتجاوز " مظهر" إسم علي مسمي في حق شيخ الأزهر ولجنة كبارالعلماء.. وياريت نعرف قرارات القناة في هذا الموضوع وأنا واثق أن ماحدث لايرضي قياداتها..ومازلت أقول "صدي البلد.. رمز الإعلام الوطني".
* وافقني كثيرون لما قلت إن "المميثل" محمد رمضان فيوزاته لسعت.. ولم أندهش عندما رفض الكبير القدير عادل إمام أن يقف هذا الرمضان أمامه في مشهد ولو صامت رغم إن "المميثل" كان هايبوس رجل الزعيم .. صحيح الدنيا ماشية بضهرها ..مين ده اللي يشتغل مع عادل إمام .. وكمان قريت إن المؤلف مدحت العدل رفض استكمال كتابة مسلسل "نسرالصعيد" لأن "المميثل" عاوز يتدخل في الكتابة..يانهار مالوش لون .. وآخرتها من كام يوم ظهرت صور "للمميثل" في نايت كلوب مع مجموعة من السيدات والبنات .. وطبعاً مشاريب النايت كلوب معروفة وكان باين علي عينيه إنه شرب ينسون وكركديه لما إتعمي.. بذمتكم واحد زي ده يبقي "نمبر وان" .. لو كده يبقي عليه العوض ..!!
* حوار أنس الفقي بمجلة الإذاعة والتليفزيون .. روشتة من أستاذ جراحة لطلبة الامتياز.. بس مين يفهم ويتفوق..!!
* بيقولوا إن قيادة إعلامية في منصب نصف رفيع "مسنود" من أخوه اللي بيشتغل في جهة محترمة.. وقيادة إعلامية تانية في منصب رفيع "مسنود" من أخته اللي بتشتغل في مكتب شخص رفيع المستوي جداً... والله أعلم.
* عاملين أغنية للإعلان عن نادي بيراميدز علي اليوتيوب بتقول "تاريخنا أبطال" .. والله بيضحكوا عليكم عشان السبوبه.. ده إحنا ماشفناش الأسيوطي إلا من 36 شهراً ..!!!
* إذا شركة سحبت رعايتها للنادي الأهلي.. فيه مليون شركة تتمني.. فاهمين يا"ب....ر".. بشر..!!