انت بتقول إيه يا قليل الأدب؟ هو اكمني عجزت وكبرت في السن ومقدرش أطبل يبقي ده معناه إنك تتريق عليا؟ حسين انت يابني ياحسين. - أيوه يابابا تحت أمرك. - بتعمل إيه يابني؟ - بذاكر زي ماحضرتك شايف كده. - أنا عايز أفاتحك في موضوع بس والله مانا عارف أبدأ منين. - خير يابابا يكونش حضرتك عرفت بموضوع سهير؟ - سهير مين ياحسين؟ - سهير دي يعني بصراحة أصلي... - خلاص فهمت فهمت والله بتفكرني بشبابي ياولد مكنتش بلاحق علي البنات، واضح انه سهير دي هي المزة بتاعتك! - بس مش أي مزة يابابا دي بقي إللي اخترتها علشان تكون شريكة حياتي بعد ماتخرج وابقي مهندس قد الدنيا. - ماهو ده الموضوع إللي عايزك فيه. - موضوع الجواز؟ - لا موضوع الهندسة، أنا باقولك كفاية دراسة لغاية كده وعايزك تدور علي شغل يجبلك قرشين يساعدونا في مصاريف البيت. - كلام إيه ده يابابا أكيد حضرتك بتهزر، معقولة عايزني أضحي بحلمي، ثم شغل إيه إللي حضرتك عايزني أدورعليه ده يابابا؟ - أنا لسه قاري اعلان لنايت كلوب في الغردقة عايز شباب من الجنسين بنات تشتغل رقاصات بمرتب 14 ألف جنيه وشباب زيك يطبلوا في الفرقة بمرتب 8 آلاف جنيه! - وحضرتك حاتيجي تطبل معايا؟ - (طرااااااااخ) انت بتقول إيه يا قليل الأدب؟ هو اكمني عجزت وكبرت في السن ومقدرش أطبل يبقي ده معناه إنك تتريق عليا؟ - بتضربني بالقلم علي وشي يابابا؟ - متقولش بابا. - يعني إيه ماقولش بابا تقصد إيه؟ - ماقصدش يابني بس انت خرجتني عن شعوري. - مش قادر أصدق يابابا طبال؟ عايزني اشتغل طبال؟ - الطبل مش عيب يا حسين وأديك شايف اعلاميين كبار مش بيعملوا حاجة غير التطبيل ليل نهار وهي دي الحاجة اللي بتجيب فلوس دلوقتي! - طيب طالما فيه اوبشن أني ممكن ابقي طبال في الإعلام ليه حضرتك عايزني أطبل في نايت كلوب؟ - لأن طبال النايت كلوب اشرف يا حسين، علي الأقل بياكل من عرق جبينه!. بس يابابا أنا بحب الهندسة وطول عمري باحلم ابقي مهندس وحضرتك وماما من وأنا في ابتدائي بتقولولي ياباشمهندس. علشان كده ياريت لما تتجوز وتخلف اوعي تقول لعيل من عيالك ياباشمهندس ولا يادكتورة! اومال أقولهم أيه أقول للولد ياطبال والبنت يارقاصة علشان أزرع فيهم حب الفن من هم وصغيرين؟ ده الحل الوحيد علشان تقدروا تواجهوا مصاريف الحياة. مصاريف الحياة تخليك تتخلي عن مبادئك يا رجل المباديء؟ - (طرااااااااااخ) انت زودتها أوي يا كلب. - تاني بتضربني وكمان بتقولي يا كلب؟ أنا نفسي أعرف ليه المعاملة دي هو أنا مش ابنك؟ - لا مش ابني! - بلاش هزار سخيف يابابا! - هي دي الحقيقة يا قليل الأدب انت لقيط عارف يعني إيه لقيط يعني جايبنك من الملجأ إللي آخر الشارع! - بس أنا مليش مكان غير البيت ده ولا اعرف أب غيرك ولا أم غير احسان هانم ولا أخ غير أخويا احمد ولو طردتني من هنا ممكن أتشرد في الشوارع. - خلاص انا حاسمحلك تقعد معانا بشرط واحد، أنا أصرف عليك أكل وشرب ودروس لغاية لما تتخرج وكل اللي عليك تشوفلك شغلانة بعد الضهر تدبر منها تمن فاتورة الكهربا! - يا محمود بك أنا باشكرك لغاية كده واسمحلي أخد هدومي وأمشي من هنا! - هاتطلع علي الغردقة طبعا يا حسين؟ - لا سيادتك أنا راجع الملجأ إللي آخر الشارع!