صور.. صديق "منسي" يستعيد ذكريات رحلة العمرة مع الشهيد

نشر أحد أصدقاء الشهيد أحمد منسي صورة جديدة عبر حسابه الشخصي على "فيس بوك" للشهيد منسي، أثناء قيامهما بأداء العمرة معا.
وكتب صديق الشهيد: "على ذكر الحالة اللي عاملها مسلسل الاختيار مع غالبية الشعب المصري واللي مأثر بشكل كبير في الناس ميجيش طبعا حاجة في الواقع اللي حصل حقيقي في الأحداث.. والحمدلله أنا كانت تربطني علاقة قوية بالبطل أحمد منسي فهحكي موقف بسيط يبين جدعنته وطيبته وسعيه، فإنه يفرح ويساعد أي حد ما بالكم لو علاقته بيه قوية أو بيعزه، لما ربنا كرمنا ورزقنا بالعمرة وإحنا في العريش 2014 كانت عمرة مولد النبي".
وأضاف صديق الشهيد: "وإحنا في الطيارة صورته الصورة دي وقعدنا طول الرحلة نحكي، مكناش نعرف حد من الفوج اللي طالع المهم لقيته بيقولي نفسك في إيه لما نوصل مكة قولتله والله أنا آخر مرة جيت السعوية وأنا في 2 ابتدائي، نفسي أكل الكبسة بالمكسرات أوي واللحمة بتاعتها، قال لي خلاص ننزل هنعمل عمرة مع بعض وتاني يوم هأكلك كبسة، قولتله لأ خلاص خليك براحتك إحنا نعمل العمرة مع بعض طبعا وأنا هبقى أروح لأختي جدة ساعة زمن أعيش هناك معاها وأكل براحتي، قال لي لأ هناكل مع بعض ولازم أكلك اللي نفسك فيه".
وتابع صديق الشهيد: "وصلنا مكة قرب المغرب عملنا العمرة تاني يوم فعلا كلمني وعدى عليا في الأوضة في الفندق ونزلنا الحرم اتصورنا الصورة التانية، وفعلا كلم حد صاحبه عايش في مكة جالنا بعربية منتهى الاحترام والجدعنة، المنسي قال له وديني أجمد مطعم كبسة ومندي هنا، بالفعل خدنا صاحبه بعربيته رحنا مطعم وقعدنا أكلنا إحنا التلاتة كان مطعم جميل وأكل جميل جدا وقعدنا نحكي يوم كامل وعرفني بيه قال له أخويا الصغير وعشرة طويلة".
واستكمل صديق الشهيد: "بعدها قال لي خلاص كده تقدر تنطلق براحتك وكلمني لو عوزت أي حاجة أنا معاك، وروحنا المدينة برضه قعدنا مع بعض شوية ورجعنا على مصر، وكانت رحلة جميلة وكرم من ربنا عليا بيها ربنا يكتبهالنا جميعا بحق الأيام المفترجة.. رحم الله الشهيد البطل وباقي إخواتنا الشهداء".
ويتناول مسلسل "الاختيار" قصة حياة الشهيد البطل أحمد صابر منسي، وهو من بطولة أمير كرارة وأحمد العوضى ودينا فؤاد وسارة عادل وضياء عبد الخالق وعدد كبير من الفنانين وهم محمد امام آسر ياسين ومحمد رجب واياد نصار وكريم محمود عبد العزيز وماجد المصرى وصلاح عبد الله وكريم عبد الخالق ومحمد عز ومها نصار تأليف باهر دويدار وإخراج بيتر ميمى وإنتاج شركة سينرجى.