م الآخر| عيد الحب.. برج "التالتة"

كتير قال إن عيد الحب مش ضروري إنه يكون بين حبيبين، ممكن يكون الاحتفال به ب(أب، أم، صاحب، أخ، أخت، حبيب) وده الكلام اللي معظم الناس بتردده، لكن قصة الحب اللي هحكيها النهارده قصة حب من نوع مختلف، جديدة و مش تقليدية.. يعني م الآخر كده "قصة ملهاش مثيل".
القصه دي هي قصة حب "التالتة".. هي إيه "التالتة" دي ياعم؟! مدرجات التالتة شمال بتاعت الكورة.. اوعى تكون فاكر إنها مجرد مدرج بنروح نقضّي فيه وقت وخلاص ونغنّي ونفرح ونشجّع، لأ طبعًا لأنه زي ما كان في فرح كان فيه أكبر حزن وأكبر جرح لينا، عارف انت اللي انت شايفه مجرد مدرج ده، فيه عرفت أغلى وأجدع الصحاب وهما دول اللي يستاهلوا إني أحتفل بيهم بجد حتى لو كانوا عند رب كبير ومش موجودين معانا، عارف إنك هتقول ياعم انت جاي تنكد علينا في يوم زي ده، والله مش بنكد عليك يا صاحبي أنا عاوزك تجدد حبك ليهم وتفتكرهم.
74 شهيدا في التالتة شمال كانوا زيي وزيك يا صاحبي بيحبوا التالتة.. كانوا زيك لما يروحوا المدرج كانهم رايحين الجنة.. كانوا زيك واقفين جمب بعض وممكن ميكونش عارفك لكن بتغنوا سوا وعند الفرح بتحضنوا بعض وعند الحزن بتطيبوا خاطر بعض.. 74 شهيدا كانوا بيبتسموا في وشك ويقفوا جمبك ويدافعوا عنك وهما أصلا ممكن ميكونوش عارفينك، 74 شهيدا كانوا زيك يوفر من مصروفه أو يميل على الحاجة بكلمتين حلوين علشان يجمع حق التذكرة بتاعت التالتة ويجري ع التالتة في كل مرة كأنها أول مرة، 74 شهيدا ممكن يكونوا بيشوفك من الماتش للماتش لكن بيحبوك لمجرد إنك جمبهم.
جايز أكون شوفت (غندور) كام مرة من بعيد لبعيد لكن حبيته، جايز أكون وقفت مع (مصطفى عصام) 5 دقايق لكن حبيته.. جايز أكون قابلت (أحمد وجيه) مرة واحدة بس حبيته، جايز أكون سلّمت على (كاريكا) في مسيرة من المسيرات لكن حبيته، هو الحب إيه غير ذكريات ؟!!!
عارف انت يعني إيه تحب حد مش هينفع تشوفه غير في صورة أو فيديو.. عارف انت يعني إيه تحب حد ومتقدرش تكون معاه عشان كده بتفتكر الذكريات اللي بينكم حتى لو كانت قصيرة علشان توهم نفسك إنه معاك.. عارف انت يعني إيه تحب حد كل اللي كان يجمعك به هو فكرة وكيان.. عارف يعني إيه يحرموك من إنك تروح المكان اللي كان بيجمعكم ببعض وكان جمبك فيه وفرحتوا سوا وزعلتوا سوا.. عارف يعني إيه يحاولوا إنهم يضيعوا حق اللي انت بتحبه وفاكرين إنك بكده هتنسى؟!!!.. أقولك على حاجة الحب اللي قايم على فكرة عمره ما يموت.
عارف الواحد بيندم على إيه ؟؟ بيندم على إنه مقعدش أكبر وقت ممكن معاهم لكن عرفنا قيمتهم بجد لما راحوا لربنا، بس أقولك حاجة متزعلش يا صاحبي هما مستنيينا في الجنة مش هو برضو اللي الواحد بيحبه ربنا بيجمعه به؟ يبقى متزعلش بقى أصل حبنا مش حب مصلحة إحنا بنحبهم لمجرد إننا حبناهم من غير أسباب ولما راحوا لربنا حبيناهم أكتر وأكتر "البعيد عن العين قريب للقلب" دي حقيقة، متزعلش لما تفتكر الذكريات اللي بينكم.. لأ افرح وادّي لنفسك أمل إن الذكريات دي تتكرر في الجنة إن شاء الله تاني، متزعلش لما تبص لصورته ولا تتفرج عليه في فيديو.. لأ افرح لأنه فرحان إنك لسه فاكره حتى لما راح لربنا يعني افرح لفرحه يا صاحبي.. متزعلش لما تفتكر الكلام اللي كان بينكم والنكت والألش اللي كنتم بتألشوه على خلق الله هههههه لأ افرح وكأنك عايش اللحظة من أول وجديد لأنه بيفتكرها زيك كل ما تفتكرها.
باختصار.. اعمل كل حاجة كان بيحبها وكأنه هو اللي بيعملها وكأنه موجود معاك لأنه موجود معاك.