د. أحمد يونس يكتب : احكيلى يا سندريلا عن المشهد الأخير فى حياتك

أفندم.

أفندمين يا أخى.

تقليدك لصوتى أفشل حاجة عملتيها فى حياتك.

كل الناس بترد على التليفون برقة، ألوه يا دكتور هى ابتسامة الترحيب اللى بيقابل بيها الواحد الناس اللى بيحبهم، زى خطوة عزيزة يعنى، أو آنستم وشرفتم، أو إيه النور دا كله؟ إلا أنت، زى عسكرى الدورية: أفندم! مش ناقص غير إنك تقول: هع! مين هناك؟ مافيش فايدة؟ عمرك ما حتتغير، عرفت خلاص أنا مين؟

من أول لحظة.

طب أنا مين؟

سعاد.

يا سلام! لسة فاكر صوتى؟

إنتى بتتكلمى منين؟

من بقى.. هاهاهاهاها!

أخبارك إيه؟

إنتوا اللى أخباركو إيه؟

بنحاول نخلى بكرة أحلى شوية.

عاملين إيه فى البرد اللى عندكو ده؟

بنتدفا على أفلامك.

لغاية دلوقت بتشوفوها؟ إلا ليه مقالاتك مش زى زمان؟

مش زى زمان إزاى؟

مغمومة.

إنتى متابعاها من عندك؟

أيوه أمال، أنا صاحبة صاحبى، ما تتوهنيش فى الكلام، ليه مقالاتك مغمومة كده؟

مانا طول عمرى مهموم.

دلوقتى مغموم، مش بس مهموم.

ممكن تحكيلى عن المشهد الأخير فى حياتك، إيه اللى حصل بالظبط؟

ما بحبش افتكر اللحظة دى.

كل الناس هنا بيعتقدوا إن الحكاية مش انتحار.

الناس فى مصر دايماً قلبهم ما بيكدبش.

لكن مين اللى عمل كده؟ إيه الدوافع؟

إنت عارف، كنت على طول شايف اللى جواى كويس، يا هل ترى لسة شايفه؟ ما تبقاش أنت لو مش شايفنى كويس من جوه.

على ما أظن.

زعلت عليا؟

مافيش حد ما زعلش، الدنيا كلها لسة لابسة إسود.

كبة! أنا بسألك: أنت بالذات، زعلت عليا؟

أوعدك إن أنا مش حانشر حاجة، بس قوليلي: الست اللى كانت ساكنة معاكى ليها يد فى المسألة دى؟

خلاص! كفاية كده، مش عاوزة افتكر اللحظة الرهيبة دى ماتنساش تسلملى على أصحابنا كلهم.

فاكرة كانوا بيعملوا إيه لما بيشوفوكى؟

إلا قل لي: إزى البلد؟

زى مانتى شايفة، بخير فى حدود الممكن.

عمرى ما سألتك عن حاجة وريحتنى أبداً.

مكالمتك دى كانت بالنسبالى زى الزلزال.

ماكنش حقى أتكلم، مش كده؟

بالعكس: كل الحكاية إنها لخبطتنى أكثر ما متلخبط خلقة.

أمال ليه كنت تملى تقول لى إنك الوحيد فى أربع أجيال اللى ما وقعتش فى حبى؟

هاهاهاها! على فكرة: عمرى ما صدقتك فى الحكاية دى.

الفنانة ماسابتش حتة جواى فاضية للست.

سم كده! هو أنا مش حلوة ولا إيه؟

زى القمر.

غصبن عنك، هاهاهاهاها!

قابلتى عمار؟

أيوة، استقبلته فى المطار مع صلاح جاهين ويحيى العلمى.

إزيهم يا ترى؟

كلنا مشتاقين ليكم.

بوسيهملى.

إنت قلت للدستور إيه؟

لأول مرة فى حياتى كلها أقول نعم لحاجة.

عشان كده باسألك، هم مش عملوا حق التصويت للمغتربين فى الخارج، طب ما حنا كمان فى الخارج.

حتكلمينى تانى؟

حسب الظروف! مش عارفة حتصدقنى ولا لأ: دى أول مكالمة أعملها من هنا.

حاستنا مكالمتك.

أحلف لك إنى حاحاول.

أرجوكى.

سلام دلوقتى. باى باى.

ليه بسرعة كده؟

ما أقدرش أقول لك.

يمكن بعدين تحكيلى؟

صعب.

باى باى يا سعاد.