م الآخر| قاعد فيها ليه؟

من سنين كتير وأنا بسمع الكلام ده، من سنين كتير وأنا بشوف ناس مخنوقة منها، من سنين كتير وأنا عارفة ناس مش راضية عنها، من سنين كتير وأنا بسمع وبشوف، بس النهاردة قررت أقول لكل واحد.. قاعد فيها ليه؟.
لكل اللي مش عجباه مصر، لكل اللي كان نفسه يعيش في أمريكا ولا أوروبا، لكل اللي بيتفرج على بلاد برة في التلفزيون وبيتحسر، لكل اللي بيحِبط وبيزهّق وبيطهّق ناسها ويقولهم عاجبكم فيها إيه؟.. أنا بقوله إنت قاعد فيها ليه؟.
لكل اللي قرفان من الزبالة اللي في الشوارع، والتراب اللي مالي مبانيها، قاعد فيها ليه؟.. سيبها للي راضي بيها كده، وصابر لحد ما تنضف.. لكل اللي مش عاجبه نظام التعليم فيها ونفسه يتعلم بره، قاعد فيها ليه؟، سيبها للي عايز يتعلم ويتقدم ويتحدي نظام التعليم السيء، على أمل أن أولاده أو حتى أحفاده حيلاقوا بكره نظام تعليم أحسن منه.
لكل اللي مش طايق زحمتها ولا خنقة المرور في شوارعها، قاعد فيها ليه؟.. سيبها للي بيستحمل وساكت وبينزل من بيته بدري، عشان يتجنب الزحمة والعطلة ،وهو متأكد من جواه إن زحمتها ملهاش حل، لأننا بنزيد مش بنقل بس ساكت وراضي.
لكل اللي مش عجباه الناس وبيقول عليهم بيئة و"لوكال"، قاعد فيها ليه؟.. اتفضل سيادتك روح للناس الكلاس والمودرن، وسيبها للي بيحب ناسها ببساطتهم وطبيعتهم وطيبة قلبهم التلقائية، وراضي بيهم كده زي ما هم، حتى لو ماعرفوش يستخدموا زراير الموبايل.
لكل اللي مش عجباه الشوارع المكسرة، والرصيف اللي مش موجود، والبلاعات المفتوحة والبيوت القديمة، والأتوبيسات المستهلكة والترام اللي مش نافعة، و دوشة البياعين وزحمة المترو وغيره وغيره، قاعد فيها ليه؟.
مافيش أصعب من إنك تزهق الناس اللي فيها، وتحبطهم وتقلل من البلد، وتلومهم على إنهم قاعدين فيها، لأنك مهما عملت مش حيقتنعوا غير باللي جواهم.. فكفاية.
مفيش أسهل من إنك تسافر وتسيب بلدك، وتبرر لنفسك إنك سافرت وسيبتها ليه.. فاتفضل سافر.
الناس تعبانة بس راضية، الناس زهقانة بس صابرة، الناس عايزة الأحسن وهي في بلدها، عايزة الأفضل لناس بلدها، عايزة الأرقى لبلدها.. يعني نفس اعتراضك عندهم، بس مقتنعين إنها هاتتغير في يوم من الأيام، ومش بيحبطوا نفسهم، ياريت تاخد إحباطك معاك وتتفضل.. قاعد فيها ليه؟ سيبها للي مش هيعرف يعيش غير فيها.