إحنا اللى هنحبط الإحباط

يوم 17 يناير 2011، وبعد ثلاثة أيام من انطلاق أول دعوة للثورة، كتبتُ تدوينة على صفحة «كلنا خالد سعيد» كان عنوانها «نفسى»، حاولت فيها تلخيص أحلامى وأحلام جيل من الشباب ظل لسنوات طويلة يعانى من نظام ديكتاتورى فرض القيود على عقولنا وزرع الخوف فى نفوسنا وساهم فى انضمام الكثيرين لحزب «ياكش تولع» و«مفيش فايدة».
اليوم، ونحن نكتب تاريخنا الحديث بأول انتخابات حرّة لاختيار رئيس الجمهورية، أشعر بالكثير من الأمل والثقة فى مستقبل أفضل لهذا الوطن الذى أعشق ترابه ومازلت على نفس درجة تفاؤلى التى كنت عليها فى أحلك الأيام التى مررنا بها فى 2010، بداية من مقتل خالد سعيد، رحمه الله، مروراً بتزوير انتخابات مجلس الشعب ووفاة السيد بلال بعد تعذيبه فى معتقلات أمن الدولة.
مازلت مؤمناً بأن ما كتبته يومها هو ما سيتحقق على يد جيل مؤمن بأن «فيه فايدة»، وأن «من خاف ندم»، وأن «البلد دى بلدنا».
أشعر بالامتنان والتقدير لكل من ضحّى ويُضحّى من أجل أن تكون مصر قوية، وأرفع يدى بالدعاء أن يرحم كل من بذل حياته ثمناً لحرية هذا الشعب.
وأشعر بالفخر أننى عشت لأرى جيلاً حقق ما كان يعتقد البعض أنه مستحيل فكسر حاجز الخوف وانطلق حالماً بأن يرى مصر فى مصاف دول العالم.
وأهمس فى أذن كل مصرى حُر: الطريق مازال طويلا، وما حدث ويحدث من جرائم يستحيل أن يختفى فى شهور، لكنه بإصرارنا وتفاؤلنا سيتحقق، فالتفاؤل هو وقود التغيير.
وحين طلبت منى «المصرى اليوم» كتابة مقال عن أحلامى لوطنى الحبيب، لم أجد أفضل مما كتبته منذ أكثر من سنة ونصف، وقبل ثمانية أيام من انطلاقة الثورة المصرية.
«نفسى»
هو انتم عايزين إيه؟
من ساعة ما بدأت الصفحة، وكل شوية يوصلنى السؤال ده بصيغ مختلفة ومن أشخاص مختلفة.. منهم ناس عايزة تحبط الشباب وخلاص، ومنهم ناس مقتنعة بإن البلد لازم تتغير بس مش فاهمين إيه الهدف اللى إحنا بنحاول نعمله، ومنهم ناس مش مقتنعة أصلا إن البلد محتاجة تتغير وشايفين إن الاستقرار مهم جدا ومصر مش سهل إنك تغيرها من غير ما تحصل مشاكل كتير إحنا مش قادرين نستحملها.
فكرت شوية هو أنا كمصرى نفسى فى إيه؟ وحبيت أسأل كل واحد فيكم نفسه فى إيه لأن أكيد مشاكلنا مختلفة حتى لو كان سببها واحد.
نفسى أحس إن لىَّ صوت فى بلدى.. باختار عضو مجلس الشعب بتاع دايرتى وباختار رئيس جمهوريتى.. مش عايز أحس إن صوتى مالوش لازمة وإن فيه تزوير بيحصل بغض النظر عن صوتى ورأيى.. مش عايز أروح لجنة الانتخابات فيقول لى: لأ خلاص إحنا صوتنا بالنيابة عنك ويضحك.. نفسى فى ديمقراطية حقيقية مش مزيفة..نفسى الفساد يتحارب فى البلد.. مش عايز أعرف إن الحكومة الأمريكية عاقبت مرسيدس لأنها دفعت رشوة لمسؤولين حكوميين فى دول ومنها مصر والحكومة اتفقت مع أمريكا إن اسم المسؤول ميطلعش لحد.. طب ليه؟ هى مش دى فلوس الشعب؟ ولما حد بيسرق بيتك من حقك تعرف مين هو وتشوفه بيتعاقب ويرجع اللى سرقه؟
نفسى المدرسين يغرسوا فى الولاد والبنات حب العلم والتعلم.. مش سياسة الحفظ والصم.. ونفسى وزير التعليم بتاعنا يكون قامة علمية فى مجال التربية.. والحكومة تدعمه بميزانية كبيرة، لأن تعليم الأجيال الجديدة هو أملنا الوحيد لو عايزين نطور بلدنا.. إحنا عندنا عقول رائعة بنضيعها كل سنة بسبب الإهمال.
نفسى إن ضابط الشرطة يبقى زى زمان فى الأفلام.. الشخص الوقور المحترم اللى بيراعى ضميره وبيتقى ربنا فى السلطة اللى معاه.. يبقى متواضع بس حازم.. ميهينش اللى قدامه لمجرد إنه فقير ومعدم وفى نفس الوقت يرفع التحية لابن باشا لمجرد إن أبوه رجل أعمال مشهور.. نفسى يقفلوا غرف التعذيب اللى فى كل قسم.. ونفسى وكيل النيابة يبقى فعلاً وكيل عن الشعب ويمثلنا ويراقب الضباط بشكل حقيقى.
نفسى نبطل واسطة ومحسوبية فى البلد.. مش عايز أعرف إن ابن نقيب المحامين اتعين وكيل نيابة رغم إنه جايب مقبول.. ولا عايز أعرف إن فلان الفلانى أخد حتة أرض بسعر التراب لأنه صاحب الوزير الفلانى.
نفسى الرشوة تبقى جريمة كلنا بننكرها.. بدل ما نكون متعودين عليها.. ونفسى الشخص اللى يطلب رشوة يكون هو الغريب والمجنون مش العكس.
نفسى الحكومة تراجع طريقتها فى توظيف الناس.. ملايين من الموظفين فى الحكومة محدش بيستغلهم ومهاراتهم مع الوقت بقت ولا حاجة غير قراءة الجرائد وقزقزة اللب ده لو حضروا أصلا.. نفسى كمان الناس اللى بتشتغل وبتتعب ميكونش مرتبهم فى الآخر 500 جنيه يصرفوا نصهم مواصلات ويضطروا يقبلوا الرشوة ويدخلوا الحرام لبيتهم.
نفسى الحكومة تبطل تتعامل مع الشعب على إنه شوية أطفال مش قادرين يفهموا فمضطرين يضحكوا عليهم.. الموضوع ده تسبب فى إن كلنا فقدنا الثقة فى حكومتنا وأحيانا بتكون فيه أخبار حلوة وحقيقية والناس لمجرد إن خلاص عامل الثقة مبقاش موجود بيشككوا فى الأخبار وبيعتبروها مؤامرة جديدة لتحسين الصورة.
نفسى الشعب يتعامل مع بعضه من غير طبقية.. والناس تبطل تأليه الأشخاص.. صحيح ربنا خلقنا غنى وفقير بس ده ميمنعش إن المعاملة تكون متشابهة.. يا ريت نتعلم دى من الناس الأجانب اللى بتلاقى الشخص اللى سايق مرسيدس زى الشخص اللى سايق فيات.. محدش ليه أفضلية ولا احترام عن الآخر فى حقوق الإنسان.. لأن أصلا داء الكبرياء بييجى للناس لما بيحسوا إن اللى حواليهم مديينهم أكتر من حقهم.. زى مثلا لما بنقول كلنا للظباط يا باشا.
نفسى المسؤول الحكومى يبقى فاهم إن معظم الإيرادات اللى بتحققها الدولة فى الموازنة العامة من ضرائب الشعب.. وإنه بصفته موظف حكومى مرتبه ده من ضرائب الشعب.. يعنى الفلوس اللى أنا وانت وأى حد تانى بيدفعها شهريا للشركة (اللى هى الحكومة) هى اللى بتتسبب إنه ياخد مرتبه.. فيبدأ يتعامل مع الناس من منطلق إنه موظف عندهم مش مدير عليهم.. عمركم كلمتم الدعم الفنى لشركة محمول ولقيتوا الشخص بيتنطط عليكم؟
نفسى نتخلص من السلبية اللى معرفش زرعوها فينا بقصد ولا بدون قصد وزرعوها إزاى.. بقينا من الشعوب اللى متأخرة تقريبا فى كل حاجة ومتقدمة فى الحاجات السلبية بس.. طب ليه؟ ليه كلنا عمالين نقول: «البلد دى بلدهم» و«ياكش تولع» و«أنا مالى هو أنا هاغير الكون».
نفسى نتعلم نختلف من غير ما نشتم بعض.. نفسى يكون فيه مسلم معتز بدينه ومسيحى معتز بدينه بس الاتنين بيتعاملوا مع بعض باحترام وبيفترضوا فى بعض حسن النية.. ومعندهمش خطوط حمراء فى الكلام، بيتكلموا بحرية واحترام مع بعض.. ومش خايفين من بعبع اسمه فتنة طائفية ضحكوا عليه بينا.. نفسى نفهم إننا كلنا مصريين وفى الدنيا حقوقنا متساوية وربنا هو اللى هيحاسبنا فى الآخرة.
نفسى منختزلش علاقتنا بالدين بإننا نسبح مائة مرة ونصلى على النبى خمسين مرة.. لأن الدين أصلا ربنا عمله منهج لحياة الإنسان والدين بيعلم الإنسان الإيجابية والبناء والمودة والرحمة وحسن الخلق والعدل ومحاربة الظلم.. كفاية إن الرسول صلى الله عليه وسلم قال: إنما بعثت لأتمم مكارم الأخلاق.
نفسى نحب بعض.. لأن بقى عندى إحساس غريب إن الناس بتستغرب أى حاجة حلوة حواليها.. لو حد اجتهد وبيعمل حاجة عشان بلده يبقى أكيد عميل أو ممول من بره.. أو على أقل تقدير بيحاول يكسب شهرة.. ليه بقت مشاعر الغيظ والكراهية وسوء الظن طاغية على مشاعر الحب والوفاء وحسن الظن؟
من حقى أحلم، ومن حقى أن أسعى لتحقيق حلمى.. ومن حقك تحلم.. لو بطلنا نحلم نموت.