ثورة شعب وليست ثورة حقد

من الملاحظ بعد الثورة ظهور العدائية فى شوارع المصرية وأكيد أنا مش ملاحظ كده لواحدى اكيد لو فيه حد منكم ركب تاكسى شاف بعض الاخوة سائقين التاكسى و هما بيهللوا و بيحتكوا بسائقين الملاكى وعلى لسانه كلمة واحدة " هيا الناس دى مش حاسين ايه الى حصل فى البلد ؟ خلاص بقى فيه ثورة كلنا زى بعض" و لما تشوف هو ثائر اوى كده ليه ما تلقيش حاجة اتغيرت الا ان الثورة حصلت يعنى الزحمة هيا هيا و العربيات هيا هيا و الى بيكسر الاشارة هو هو و الزحمة هيا هيا.... ايه الجديد مش مستحمل واحد بيسوق براحة شوية او كسر عليه زى ما بيحصل كالعادة مش بقول خبط فيه لا سمح الله لحسن دى فيها ضرب نار دلوقتى ... تلاقى الى سايق موتوسيكل مش طايق الى سايق عربية و بيغنى بنفس النغمة ... فيه جو من بلطجة الناس على بعض و كمية تصفية حسابات و شماته من الناس فى بعض لا حصر لها.... للاسف الطبقة العاملة حاسة باضطهاد كبير و كبت و عندهم حق لا ننكرة ... احنا عندنا على الاقل 40% تحت خط الفقر .. الناس دى عانت كتير من قلة الدخل و سوء العلاج و حاجات كتير كلنا عارفينها و حافظينها ... بس هنا بقى سؤال " هو اى حد راكب مرسيدس حرامى ؟ " يعنى هل كل المقتدرين فى البلد حرامية ؟؟ معقول مفيش غنى فى مصر فلوسة حلال ؟؟ اكيد مستحيل ... من نفس المنطلق اكيد مستحيل ان كل فقير بياكل حلال.
طيب و الحل ؟ كده مش حلو .... كده كل فقير او محدود الدخل هيفضل يتصرف من منطلق ان الغنى ده هو الى سارق فلوسى و هو السبب فى فقرى و ده اكيد ده غلط عشان محدش بياخد رزق حد و محدش بيمنع رزق حد .... كل واحد ربنا اعطاه حقة 24 قيراط يبقى الحل اننا نركز شوية ..... احنا الى عمل فينا كده هو خنوعنا و استهتارنا فى حقنا لفترات طويلة , سكتنا لما اتظلمنا و سكتنا لما شفنا غيرنا بيتظلم و احنا شاهدين و نسكت عشان نبقى ماشين جنب الحيط و ساعات تحت الحيط .. موتنا ضميرنا بايدينا تحت شعار الى تغلب به العب به و اذا كان رب البيت بالدف ضارباً فشيمة اهل البيت الرقص .... كل واحد فينا عليه مسئولية فى كل مستويات حياتنا.
فضلنا نقول طول عمرنا يا رب حلها من عندك و ربنا حلها بس لما احنا اتحركنا و قلنا لا كفاية عايزين نبقى محترمين عايزين يبقى لنا كرامة وقفنا شباب و بنات و رجال و نساء و شيوخ و اطفال و مسلم و مسيحى و قس و شيخ و...... لاول مرة وقفنا شعب .... مخدناش حقنا الا لما وقفنا شعب فا ليه الحقد يفرقنا ؟؟؟؟
ياريت نرجع لاخلاقياتنا احترام الكبير و العطف على الصغير و احترام حق الغير و انت حر ما لم تضر و كلنا بنكمل بعض و كل واحد فينا ترس بيدور عشان الماكينة كلها تدور و لا يضيع حق ورائة مطالب.
احنا عايزين ايه غير الحق و العدل ؟؟ .... اكيد بالحق و العدل كل حاجة هتبقى زى الفل .... طب ما نبدأ بنفسنا .. كل واحد يدى غيرة حقة و يعاملة بعدل عشان يتلقى نفس المعاملة ... نشتغل كويس و نسيب الرزق لله .. نعامل الناس كويس و اجرنا على الله ... محدش يجى على كرامتنا و احنا كمان نراعى كرامة غيرنا.
ارجو ذلك حتى لا يقتلنا الحقد.