أراجوز لتعريف الأطفال بالدستور الجديد.. «يلا نحب مصر»

مسلمون ومسيحيون، كبار وصغار، الكل يغنى ويهتف بحماسة: «بنحب مصر.. تحيا مصر»، ابتسامات حقيقية وفرحة تكاد تقفز من الوجوه، وسعادة غامرة، هى شعور المشاركين فى احتفالية تعريف الأطفال بحقوقهم فى الدستور الجديد، التى استخدم فيها «الأراجوز» كوسيلة مساعدة وجذابة.
«إحنا فريق شبابى بننزل الشارع لكل الناس، بنحاول نشاركهم الأحداث ونوعيهم، وقررنا إننا كل فترة نجمع مجموعة من الأطفال ونعرفهم إيه حقوقهم وواجباتهم فى الدستور الجديد»، قالها حسين شريف، أحد مؤسسى فريق «شارع واعى».
يسعى الفريق لتقديم ما هو جديد فى الشارع بين فئات المجتمع: «فى البداية كنا لما بنلاقى الناس مضّايقة فى أى مواصلة بنركبها، كنا بنحاول نعمل أى حاجة عشان يضحكوا ويطلعوا من اللى هما فيه، ومن سنة جمعنا نفسنا واتفقنا اننا نبقى فريق ننزل الشارع مع أى أحداث بتحصل»، مضيفاً: «شاركنا كذا مرة فى إضراب العمال، ووقفات كتيرة مع كل فئات المجتمع، وعشان نعرف الأطفال أهميتهم فى الدستور، جمعناهم فى الجنينة وعملنا ليهم أراجوز يحكى معاهم قصص عشان يعرفوا دورهم فى اللى جاى».
وسط ألوان الأطفال المبهجة، وقف إسلام جابر، عضو فى الفريق، يحكى قصة قصيرة عن جهود القوات المسلحة على شاشة عرض، مستخدما خيال الظل: «كل واحد فينا متخصص فى حاجة، لأننا بنحاول نوصل للناس كلها عن طريق أنشطة كتيرة، ومعانا محمد الجمال متخصص فى مسرح العرائس، وكمان بنرسم جرافيتى، وبنعمل أفلام متحركة.