م الآخر| برج الجحش

بص يا سيدي.. أيام الاعتصامات والمظاهرات، وثورة 30 يونيو المكملة لثورة يناير المجيدة، ونزول البنات وستات البيوت اللي زي العسل، كان "إخوانا البعدا" بيقولوا: إن صوت المرأة عورة، "لا يا شيخ، يا واد يا مؤمن"، أنا مش فقيه ولا شيخ، أنا على قولك واد سيس، آآآه والنعمة وقمت بثورتين يا شيخنا، وإنت قومت وقعدت و"اتبطيت" على حيلك، واشتغلت "لوكلوك" في الكلام، لحد ما نسيت إن ربنا بيقول: (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيدٌ).
إنت بتتكلم في المطلق على كل البنات اللي بتنزل مظاهرات، المسيحية منها والسلفية؟، لأن كل المسلمين سلف على فكره، يعني صفة السلف مش مقتصرة على حد أو فئة معينة.. وياريت تقف على إنك قولت إن صوتها عورة، لا ده إنت قولت كمان إنهم بينزلوا عشان عاوزين الشباب يتحرشوا بيهم!، وده اللي بيتسمى في الدين (قذف محصنات)، مش بقولك "يا واد يا مؤمن؟".
شوف يا شيخنا كلام ربنا بيقول إيه: (وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا).. يعني إنت كدا ياعم الحج دخلت في الكبائر، "فأهبط" كده وصلي ع النبي واسمع، متستغربش، آآه اسمع لأني بكلمك إنت مش حد تاني.. الشيخان ابن عثيمين وابن الباز، ده لو تسمع عنهما يعني، قالوا إنه صوت المرأة مش عورة، واستدلوا بأن رسولنا الكريم (صلى الله عليه وسلم)، كان بيستمع للنساء في وجود الصحابة، ومكنش بيقولهم قوموا عشان صوت المرأة عورة، أو إنه لو كان صوتها عورة مكنش رسولنا الكريم كلمهم أصلًا، ولا إيه؟.. هتقولي دول شيوخ ومش صحابة، أقولك إنت دايمًا كدا مستعجل، ما أنا سايبلك المصادر في نهاية المقاله يا "عمونا".
طيب عشان متقولش إنه ده كان الرسول، بص يا سيدي، أكيد سمعت عن الصحابة، ولا إيه؟، في اتنين من الصحابة اللي هما سيدنا "أبوبكر" و"عمر"، كانا يزورا (أم أيمن) ليطمئنا عليها بعد وفاة رسولنا الكريم، وواضح من الاسم إنها من النساء.. طيب بلاش يا عم أنا راجل "بأفور"، خد دي عندك، اليومين دول يا سيدنا بيقولك إن في بنات من "أهلك وعشيرتك"، بينزلوا مظاهرات في الشارع وفي الجامعة، وبيضربوا المعيدات والدكاترة وبيشتموهم، إلا الكلام ده صحيح يا شيخنا؟.. طيب الحق بقا ياعم الحج "سك على بناتك"، دول بيطلعوا في التليفزيون، يعني صوتهم طالعة للي في الشارع واللي في البيت، يعني فضحيتهم بقت "بجلاجل"، أصل صوتها عورة.. مش ده كلامك؟.
"أخ منك إنت أخخ!".. دلوقتي مش نازلة عشان التحرش وصوتها مش عورة؟، أصلها مظاهرات للبنات فقط!.. يا سبحان الله يا أخي، ده جدك وجدي قالا: "اللي بيته من زجاج ميحدفش الناس بالطوب".
الخلاصة في الموضوع يعني، إنه مجاش في القرآن والاحاديث والسيرة، إن النساء ميتكلموش من الأساس، لكن جه النهي بعدم الخضوع في القول، يعني ترخيم صوتها أو إنها تزوق كلامها بصوتها.. أشرحها إزاي دي بقا؟، "افهمها إنت يا أبا".. طيب يبقى "إيه اللي جاب القلعة جمب البحر؟"، دلوقتي، إيه اللي دخل تزويق الكلام وترخيم صوتها في المظاهرات، ده إنت لما بتنزل مظاهرة جمب بنت، بتحس إنها واحد صاحبك من صوت هتافها، آآآه والنعمة.
أنا يا "سيدنا"، مش فقيه ولا عالم زي ما قولتلك في البداية، ومشكلتي مش في إن صوتها عورة أو مش عورة، لأنه مش اختصاصي وفي اللي أعلم مني في كده، وفي عندك أحاديث رسولنا الكريم وكمان كتب الائمة اللي اختلفوا على إنه عورة، أو مش عورة، وإيه المواقف اللي يكون فيها عورة، وإيه شروط إن صوتها يكون عورة من عدمه.. أنا مشكلتي فيك إنت يا اللي بتحلل وتحرم وتحرش وتتحمرش على كيفك، على حسب مصلحتك الشخصية والسياسية والإخوانية، فمتبقاش أغباهم وسط القطيع، وإلا تتحول من مواليد برج الخروف إلى مواليد برج الجحش.. والله ظلمت الجحش، آآآه والنعمة.
المصادر.. "ابن حنبل": شرح المنتهى 3/11 وشرح الإقناع 3/8 ط مقبل، وغاية المنتهى 3/8 والفروع 5/157.
مجموع فتاوي ورسائل الشيخ محمد صالح العثيمين - المجلد الثاني عشر - باب ستر العورة
الإمام مسلم في صحيحه في كتاب الإيمان.. صوت المرأة