أكل العيش فى الزمالك

منذ أسابيع فاتت فى خناقة مستمرة بين سكان الزمالك، وبين أصحاب المحلات التجارية فى الحى الراقى، وبالتحديد أصحاب الكافيهات والمطاعم.
اللى بيزور الزمالك فى الثلاث سنوات اللى فاتت أكيد ملاحظ النمو المستمر للمطاعم والكافيهات، فى الشوارع الرئيسية اختفت محلات الجزارين والبقالين وفتح مكانها مطاعم مستقلة صغيرة، يمتلكها شباب عايز يبنى مستقبله بعيد عن الوظيفة. جوه فى الشوارع الفرعية وبين العمارات انتشرت القهاوى وعدد كبير من محلات الحلويات والدليفرى. كلها محاولات من شباب مصرى ذكى ومجتهد ومصمم -بمساعدة آلاف من العمال والطباخين المصريين- إنه يقدم أطباق وأكلات جديدة لطبقة متوسطة من العملاء دايما بتدور على مكان مختلف تتفسح فيه. المفاجأة إن المحاولات دى نجحت بشكل مذهل، والزمالك أصبح قبلة عشاق الأكل والسهر فى القاهرة. أصحاب المحلات طبعا جنوا أرباحا مستحقة على ابتكارهم ومجهودهم، لكن الحقيقة إن سكان الزمالك اتأذوا بسبب المحلات دى. مع انتشار المطاعم والكافيهات أصبح من شبه المستحيل العثور على مكان لركن عربيتك فى منطقة مزدحمة بالفعل. بعض الكافيهات -وليس كلها- استولت على الرصيف وصار المشى فى الشارع أسهل، أما عن الشيشة فدخان الشيشة مزعل سكان العمارات ومخليهم ميطلعوش البلكونات، وبصراحة عندهم حق. طيب إزاى الوضع وصل للدرجة دى؟ ليه محدش نظم وجود المطاعم والكافيهات؟
الرد بسهولة أن الدولة معملتش دورها الأساسى. ودور الدولة الأساسى فى المجتمع هو التنظيم علشان حق طرف ميجورش على طرف تانى. لكن للأسف ده ماحصلش. فى منطقة الزمالك الموقف أكثر تعقيدا. سنة 1993 صدر قرار من المحافظ بعدم تغيير نشاط المحلات التجارية. وبالتالى لو فى محل لتصليح الساعات فتح من عشرين سنة فى الزمالك وحاليا بيخسر، مش من حقه يغير نشاطه ويقلب حلوانى. طيب هو ده عقل؟ يعنى بنتكلم ونعيد ونزيد ونقول عايزين نشجع المشاريع الصغيرة، ونسيب قرارات زى دى تعطل الدنيا؟ طيب إيه الحل؟ هل الحل إن المحلات دى تتقفل؟
أكيد لأ، لأن حتى لو هم مخالفين وغلطانين -وجزء منهم مخالف- لازم نفكر فى الاستثمارات والعمالة، فلسفة القانون بتقول إن فى فلوس اتصرفت والفلوس دى داخلة فى الناتج المحلى. ممشية جزء من الاقتصاد. الكافيهات والمطاعم غلطانة، لكن مش كل منشأة غلطانة تتقفل، المنشآت المخالفة بتدفع غرامة وتسوى أوضاعها بما يضمن راحة السكان. وحط تحت راحة السكان ألف خط. لأن من حق السكان أن يشعروا بالراحة فى بيوتهم، ومن حق أصحاب المحلات مزاولة النشاط بشكل قانونى. معلوماتى إن أصحاب المطاعم والكافيهات عايزين من المحافظة منحهم تراخيص مزاولة نشاط، على أن يتكفل أصحاب المحلات بتطوير المنطقة. عملية التطوير تشمل إزالة التعديات على الأرصفة، وتجميل وتنظيف الزمالك، والتعاقد مع شركة لركن سيارات رواد المقاهى بعيد عن السكان. هل ده كافى؟ ممكن يكون مقترح محتاج تطوير بس محتاج حد يسمعه ويناقشه بجدية.
د. جلال السعيد محافظ القاهرة مطالب مشكورا -وهو رجل دولة ذو خبرة- بأن يستمع للطرفين وليس لطرف واحد. يعدل القرارات الإدارية ما دامت فى سلطته وما دامت فى الصالح العام، ويقدم لحى الزمالك خطة تعطى السكان راحة البال فى منازلهم، وتمنح الشباب فرصة للاستثمار فى بلدهم، وأهم من كل شىء: يقدم أيضاً للبلد نموذجاً كيف يمكن حل المشاكل بالتعاون مع كل الأطراف وليس بالصدام مع طرف على حساب الآخر.