مبارك.. و«راموش» 4

وصلتنى 1600 رسالة بريد إلكترونى تعليقاً على سلسلة مقالات «مبارك.. وراموش».. والحقيقة أننى لا أعرف هل هى تواصل معى، أم تفاعل مع «الجنى راموش».. وفى شبكات التواصل الاجتماعى، قام عدد من فرسان «الإنترنت» ب«تشييرها» على «الفيس بوك» و«تويتر»!
غير أن عدداً كبيراً من الرسائل والتعليقات اقترحت نهايات محددة للقصة.. فلا يزال «مبارك وراموش» فى حوارات المطالب السبعة.. ومصر هى الهدف.. مبارك يريدها خراباً ودماراً ودماءً، ليخرج لسانه لنا، ويثبت صحة نظريته «أنا أو الفوضى».. والعفريت راموش يستمع للطلبات بطاعة تامة لسيده الذى أخرجه من المصباح!
والواقع أن للقصة نهاية لدىّ.. ولكننى سعدت للغاية بهذا القدر من التفاعل والإبداع لدى القارئ المحترم.. لذا.. أقترح عليكم بأن نستكمل القصة معاً، ثم أفتح لحضراتكم مساحات واسعة كى يكتب كل منكم النهاية التى يراها ويتخيلها، وسأتلقى منكم هذه النهايات على البريد الإلكترونى المنشور مع هذا المقال.. إنها مصر.. وما حدث فيها على مدى عام ونصف العام، وأيضاً ما سيحدث فيها حين يترحم علينا أبناؤنا لما قدمناه لهم، أو يلعنون الأجيال السابقة التى قامت بثورة عظيمة، ولم تستطع الحفاظ عليها أو الانطلاق منها إلى نهضة شاملة!
.. عودةً إلى «مبارك وراموش».. حان وقت الطلب الثالث بعد المجلس العسكرى والثوار.. إنهم الإخوان.. مبارك ل«راموش»: «بمناسبة الإخوان.. تشرب حلبة حصى؟».. فأجابه «يا سيدى.. يا تاج راسى.. أنا قلت قبل كده إنى لا بشرب ولا باكل وأنا بشتغل.. وكمان ما أعرفش يعنى إيه حلبة حصى».. قال مبارك ضاحكاً «إيه يا عم.. ما إحنا كلنا بنشرب وبناكل وبنلعب وبنتفرج على التليفزيون وإحنا بنشتغل.. ما تحبكهاش قوى يا عم راموش.. أنا غلطان إنى عايزك تدوق الحلبة الحصى»؟!
.. عاد راموش إلى أدب الجن مع أسيادهم «أنا آسف يا سيدى.. بس أرجوك ادخل فى الموضوع.. عايز الإخوان المسلمين يعملوا إيه بعد الثورة وخلعك علشان مصر تخرب؟!».. صرخ فيه مبارك غاضباً «بس.. ما تقولش خلعى.. أنا اللى مشيت بمزاجى علشان يترحموا على أيامى».. ثم استطرد «اسمع يا باشا.. أنا عارف الإخوان كويس جداً.. بينى وبينهم عشرة طويلة.. كنا بنلعب مع بعض.. شوية نتفاهم ونعمل صفقات.. وشوية أقلب عليهم لأنى عارف إنى لازم أتغدى بيهم قبل ما يتعشوا بىّ.. همّ يعرفوا إن النظام مالهوش دراع يتلوى منه.. وأنا عارف إنهم بيتمسكنوا لحد ما يتمكنوا.. ولو تمكنوا خد يا باشا لسع على قفاك!».
سرح مبارك بذهنه قليلاً، وعاد برأسه إلى الوراء وقال ل«راموش»: عارف يا أبوالعفاريت.. فى انتخابات مجلس الشعب سنة 2005 كلفت قيادات من أمن الدولة يقعدوا معاهم لتحديد حصة مقاعدهم قبل الانتخابات.. حاكم الإخوان وأمن الدولة كانوا عاملين زى راجل ومراته.. لا همّه مطلقين ولا همّه عايشين مع بعض.. كل واحد قاعد عند أهله.. يشتموا بعض طول النهار.. ويتسامروا بالليل ويتفاهموا ويتفقوا فى الغرف المغلقة.. مش هطوّل عليك يا أبوالعفاريت.. قيادات أمن الدولة اتفقت مع مكتب الإرشاد على 40 أو 45 كرسى.. وارتضينا، وإحنا كنا هنظبطها زى كل انتخابات.. وفجأة لقيناهم مبرطعين فى البلد كلها.. خلصوا علينا فى المرحلة الأولى ونصف التانية.. حسبناها فوجدنا إننا لو سبناهم هيوصلوا بنهاية الانتخابات إلى 150 مقعد.. خلاص يا باشا نقضوا العهد والاتفاق.. يا راجل يا مؤمن دول كانوا هينجحوا مكارم الديرى الإخوانية فى دايرة بيتى أنا «مصر الجديدة».. ولما سألناهم بتعملوا كده ليه، قالوا «والله الناس بتختارنا!! طب والاتفاق يا جماعة.. مفيش اتفاق».. بذمتك يا راموش ده ينفع؟!
رد «راموش» متبرماً: «وبعدين يا سيدى.. ادخل بقه فى الموضوع.. عايز الإخوان يعملوا إيه من بكره».. أجابه مبارك: يا ابنى ما انته لازم تعرف مين همه الإخوان.. بعد ما عرفت مين هوه المجلس العسكرى.. لأن اللعبة هتكون بين الاتنين.. عموماً يا عم حاضر.. هطلب حالاً.. بس قول لى: تحب نضرب اتنين فتة باللحمة الضانى على الماشى.. وبعدين ندخل فى طلب «الإخوان».. ؟!
غداً.. نواصل