رئيس «جامد تنين»..!

جانى صاحبى الكول صارخاً فى وجهى مالكم يا نخبويين يا معارضين يا وحشين بالرئيس مرسى، مالكم بالراجل الطيب اللى ماشفناش زيه حتى فى أيام الفراعنة، إنتو مش شايفين غير الحاجات الوحشة يا كارهين للنجاح، شفتوا مرسى عملنا إيه من ساعة ما حلف اليمين دا خلاها وردى مش ضلمة زى ما أنتو بتقولوا، فروحوا «بسلطاتكم وباباغنوجكم» فرئيسنا الهمام «جامد تنين» لأنه فى شهور عمل اللى ماعملوش غيره فى سنين، بصوا بقه يا معفنين رئيسنا الإخوانى الجميل العسول عمل إيه:
- خلا المعارضة فى مصر تتجمع بعد ما كانت متفرقة، وده إنجاز سياسى معرفش يعمله المخلوع، يعنى رئيسنا بيجمع مش بيفرق!
- رئيسنا «الجامد تنين» جمع الأمريكان والقطريين على حب مصر، شوفتوا المخلوع فرق ما بين الاتنين وماكانش يعرف أن الاتنين مع بعض حلوين وطعمين!
- رئيسنا بيرجع فى كلامه عشانكم يا مصريين ياللى مش صابرين ومستعجلين ومتصربعين، وإعلاناته وقراراته دى اختبارات عاملة زى اختبارات الشهر مش بتضاف على أعمال السنة!
- رئيسنا بيحب الجماعة؛ لأن البركة فى الجماعة مش فى التفرق، واللى بيقولوا غيركده دول مش بيحبوا الشلة رغم أن فى الشلة قوة وتمكين يا معفنين!
- الدولار فى عهده بقه غالى وليه قيمة، فبعد ما كان بخمسة جنيه رئيسنا حب يحط «التاتش» بتاعه فخلاه بستة جنيه وتمانين قرش وهيوصله لسبعة جنيه!
- المطرة اللى نزلت فى شوارعنا ماشفناش زيها أبداً، أبواب السماء مفتوحة، فالرئيس طيب وعلى نياته وبينه وبين السماء عمار، وانتوا بتحاولوا تنسوا أن المطرة خير يا بتوع الميادين يا حقدة يا مغرضين!
- فى عهد رئيسنا زارونا الإيرانيون وروحنالهم عشان دول زى إخواتنا، همه من الآخر همه «أصحاب أنتيم» بعد ما زعلونا جيرانا اللى مش عارفين قيمة شيخنا اللى بيحكمنا!
- فى عهد رئيسنا الهمام الحرية مالهاش حدود وعشان كده المظاهرات راحت الاتحادية، يا إخوانا بلاش افترا شوفتوا المخلوع ماخلاكمش تروحوا على القصر!
- التاريخ هيكتب أن الرئيس مرسى هو اللى حقق الإنجاز الجماهيرى العظيم بأنه الحاكم الوحيد اللى حرك حزب الكنبة ونزلهم الشوارع فى المظاهرات!
- عبقرية الرئيس «الجامد تنين» بانت من أول يوم شوفتوا ده هوه اللى مازعلش «ستنا أمريكا» لحد دلوقتى، وخلا أشقاءنا الإسرائيليين يشكروه على اللى عمله معاهم فى موضوع غزة!
- مرسى العظيم يا معفنين هوه اللى أنقذ المركب «زمزم» من الغرق بعكس مبارك اللى معرفش ينقذ العبارة «السلام 98» ومش مشكلة أن الناس ماتت فى الحالتين بس المهم الأداء!
- مرسى هوه اللى حمى الثورة لأنه افتكر بعد سنتين هوه وجماعته الدم والتار، شوفتوا الراجل ذاكرته هوه وجماعته قوية إزاى!
- فى عهد مرسى سمعنا أحلى كلام عن إخواتنا الإسرائيليين، صديقنا «بيريز» وتصريحات أخونا «العريان» عن «الشوقة الجامدة طحن» لإخواتنا اليهود اللى سابوا مصر غصب عنهم، شوفتوا الإخلاص!
- مرسى صاحب الضربة الدستورية، إنتوا شوفتوا الإنجاز دستور يخلص فى ليلة بلمسات الغريانى «الجامدة آخر حاجة» ونفس الدستور يتعمله لجنة لتعديله بعد أيام من الاستفتاء عليه، دى ياعم ناس مش بتلعب دوله مهندسين جامدين يا معفنين!
- «النهضة» مشروع متكمر عليه ومرسى خباه عشان الأعداء والجيران والوحشين ماياخدوش الفكرة عشان هوه عايز يدخل بيها «أراب جوت تالينت»!
- مرسى عايز المصلحة الوطنية عشان كده عايز يرجع المصريين اللى بيشتغلوا فى الخليج، خصوصاً بتوع الإمارات عاشن بلدهم تستفيد بيهم، مش ده اللى انتوا عايزينه ووجعتوا بيه دماغنا وكل شويه تقولوا «عايزين الكفاءات ترجع» أهو مرسى هيرجع الكفاءات!
- مرسى بيخاف على المرأة وعايز يستتها ويكرمها فى بيتها، عشان كده عمل فى الدستور مادة عشان يريح المستشارة تهانى الجبالى، ياجماعة إنتوا فاهمين التكريم غلط!
«تنين وجامد كمان».. ماشى يا صاحبى هاسمع كلامك وأراجع نفسى يمكن أوصل لحل مع رفضى اللاإرادى للمرسى وجماعته، قلتها فراح صديقى «الكول» يشدو بوصلة غنائية زى مهرجانات «أوكا وأورتيجا»: هاتى بوسة يانهضة.. فقلت «هيه حصلت بوس وكلام فاضى» فرد عليا «ما دامت أن ببليك ومفيش فيلينج سو وات»!