"قطايف الصباح 7" .. تحليلات رمضانية

- ماجد المصري كسب قضية الأرض اللي رفعها محمد رمضان في "زلزال"، وأحمد داود ودينا الشربيني فتحوا ملف قضية في" زي الشمس".
- موت أخت أحمد السقا في "ولد الغلابة"، وموت صلاح عبدالله في "شقة فيصل" أبرز وفيات مسلسلات النهاردة.

- زلزال: مشهد حلم حلا شيحا بمحمد رمضان وهو عريان ومربوط بالسلاسل، هو إحنا مش قولنا تتغطي كويس وأنتي نايمة قبل كده.
- زلزال: هو مين الإستايلست بتاع المسلسل ده، في فرق بين الرجوع للزمن بالملابس والمكان، وإنك تجيب هدوم من الوكالة وتلبسها للممثلين.
- زلزال: أبرز ما في حلقة النهاردة ظهورعضلة البنش والتراي والباي بتوع محمد رمضان، مش خسارة القضية خالص على فكرة.

- ولد الغلابة: المشهد الحلو ممكن يخليك تكمل حلقة كاملة وأنت مبسوط ما بالك لما تشوف في كل مشهد حكاية ورواية أحلى من اللى قابلها "مشهد أحمد السقا وهو رافع بندقية على محمد ممدوح".
- ولد الغلابة: قعدت أدور على التتر مين هي الممثلة الأوفر اللي بتمثل دور أخت أحمد السقا وأتجوزت محمد ممدوح من ورا أخوها، طلع أسمها "ريم سامي" أخت المخرج محمد سامي، بس خلاص.
- ولد الغلابة: حلقة النهاردة ينطبق عليها مقولة "كل من في الحلقة رائعون لا أثتثني منهم أحد".
- ولد الغلابة: مشهد أحمد السقا وهو بيصارح أخته بحقيقة محمد ممدوح، وأزاي تتعامل مع أختك لو عملت حاجة غلط من وراك، يتدرس أنصح كل عيلة مصرية تشوفه.
- ولد الغلابة: السقا كل تاريخه في كوم ومشاهده في المسلسل ده في كوم تاني الحقيقة.

- الواد سيد الشحات: المخرج أحمد الجندي بيثبت سنة ورا سنة أنه أصبح علامة مسجلة في عالم إخراج الكوميديا.
- الواد سيد الشحات: صحيح اللي يشوف ايفيهات أحمد فهمي ومحمد عبد الرحمن ومعاهم محمد محمود تهون عليه ايفيهاته.

- لمس أكتاف: كل حلقة بيظهر ممثل حلو وممثل حلقة النهاردة أسمه أحمد كشك.
- لمس أكتاف: بمناسبة أحمد كشك، المشهد اللي بينه وبين فتحي عبد الوهاب جميل، بس أنا طول المشهد بسأل سؤال واحد هو المسدس الدهب ده بكام.
- لمس أكتاف: محمد عز ممثل عامل زي لعيب الكورة الجوكر اللي يقدر يلعب في أي مكان في الملعب.
- لمس أكتاف: صوت اللي طالع من القلب النظرات اللي بتتحول من فرح لحزن في ثواني الريأكشنات زي عرايس الماريونيت كل ده وأكتر بتعمله الست "حنان مطاوع".

- زي الشمس: أحمد دواد بيقول لدينا الشربيني هعدي عليكي بليل بتقوله ليه؟ قالها مفاجأة قالت له بمياصة ودلع مش هفتح لك اللي هو هستناك يعني، قالها هعدي، راح فين زمن ماما عيانة وعايزه تشوفك قبل ما تموت.
- زي الشمس: أفضل مشهد تعليمي في رمضان يذهب لمشهد تعليم أحمد داود لدينا الشربيني أزاي تأكل السمك "طبعاً بهزر".
- زي الشمس: هي أزاي لجنة الدراما تمسك في كلمة أتقالت بالإنجليزي، وتسيب أحمد دواد وهو بيعاكس دينا الشربيني وبيقولها "أيه ده الفستان ده حلو أوي من تحت" الفستان برضه يانمس، ده تسيب مايتسكتش عليه أبداً "صبرنا يارب".

فاصل إعلاني
- إعلان مستشفى الناس: صوت جنات دافي ويخطف مع وش الطفل اللي بيضحك حاجة مبهجة وسط عتمة إعلانات السنة دي.
رجعنا لكم تاني
- البرنسيسة بيسة: الحمدلله الوحيد اللي طلع بيحب مي عز الدين اليومين دول في الحقيقة أو في المسلسل هو الممثل محمد أنور.
- البرنسيسة بيسة: ميكروباص عطل بالاطفال بتوع مدرسة بيسة الخاصة، وقعدوا في الشمس ساعتين، قوم بيسة تيجي بالتاكسي بتاعها تنقذ الاطفال وتروحهم والدنيا ليل، طب هنفترض أن مافيش أتوبيسات في مدرسة طويلة عريضة، ما حد يقول للمخرج أن في إختراع أسمه أوبر وكريم.
- البرنسيسة بيسة: الصراحة الأسوأ من مي عز الدين بيسة، هي مي عز الدين سكسكة.

- أبن أصول: طب بذمتكم مشهد فيه حمادة بيتجوز ترقصوه على أغنية pop يامفترين، أومال ترقصوا عمرو دياب على أيه؟ أحمد شيبة.

- أبو جبل: مصطفي شعبان أفضل ما في المسلسل إلى الآن.

- أبوجبل: أحمد شمس هو التجربة الأهم في رمضان السنة دي.

- شقة فيصل: الحقيقة الايفيه اللي بيقولوا كريم محمود عبد العزيز على محمود الليثي "ياليثي مصر" بيضحكني كل حلقة مش عارف ليه.

- شقة فيصل: أغرب ما في حلقة النهاردة يكون ريكو هو الحافز اللي هيخلي كريم محمود عبدالعزيز يوصل ويبقى مطرب شعبي كبير.

- شقة فيصل: مافيش أجمل من إنك تشوف وائل نور معدي في مشهد قدام الشاشة.. ربنا يرحمك يارب.