- في اليوم اللي سناء شافع كان بينادي على قابيل في مسلسل مملكة الغجر ، قابيل ذات نفسه بعت لمحمد ممدوح فريند ريكوست في مسلسل قابيل. طيب بعد خمس أيام كده نقدر نقول :
- أحمد السقا.. من أيام تيتو معملش دور يوجع الناس زي دوره في ولد الغلابة.
- أميرة كرارة.. قدر يكسر أنف كل اللي سخروا من تقديمه كلبش 3 بحلاوة أداؤه والروح الجديدة للدور.
- محمد ممدوح.. روح ياشيخ ربنا يبارك لك ويكتر من أمثالك.
- دينا الشربيني.. بتطبق الفكرة اللي بتقول "الممثل الشاطر اللي لما يقف قدام الكاميرا يخلى الكاميرا تحبه وتدور عليه وسط الممثلين" .
- مي عز الدين.. وقت عرض المسلسل في رمضان، يكرم الممثل أو يهان، وأنتِ أهنتي نفسك "البرنسيسة بيسة".
- بمناسبة البرنسيسة بيسة : هو مين اللي قال لمي عز الدين إنها لما تقعد تكتب التاريخ على السابورة وتقول هو النهاردة أربعتاشر ولا خماشر هنضحك وكده.
- عمرو وهبة .. يقدم نفسه من جديد كممثل كوميدي موهوب، ويودع عباءة أنفلونسر السوشيال ميديا إلي الأبد.
- محمد عبد الرحمن.. الممثل الكوميدي الوحيد في رمضان السنة دي، اللي مافيش ايفيه بيقوله من غير ما تضحك.
- هنا الزاهد.. بتقدم كوميدي أحسن من ناس كتير، بطلوا حقد وسيبوا الناس تاخد فرصتها.
- عمرو سعد.. كونه بيضحك في بركة، كونه ممثل كبير وعينه مليانه تمثيل وفن ده مش جديد، أنتوا اللي نظركم ضعيف بس.
- كلبش 3: الجميل أن المسلسل السنة دي، بيتلعب من منطق العقل والذكاء، مش الأسلحة والعضلات والأكشن زي السنين اللي فاتت.
- بركة: تعرف المسلسل الحلو منين، تعرفه من الكاتب بتاعه عن "محمد الشواف" أتحدث.
فاصل إعلاني
- إعلان البنك الأهلي: ياما فيه ناس بيمثلوا وبياخدوا بطولة من الجلدة للجلدة ، بس مابيعرفوش يمثلوا ربع تمثيل الشباب اللي مثلوا في الإعلان.
رجعنا لكم تاني - ولد الغلابة: لما الممثل يقدر يجسد الشخصية لدرجة أنك متعرفوش، ده اللي تمثيله يتدرس ، وده اللي بتعمله الست "صفاء الطوخي". - ولد الغلابة: هي اخت أحمد السقا اللي بتحب محمد ممدوح في المسلسل، هتفضل 30 حلقة بتتكلم بالتوتر والعصبية كأنها عليها حكم وهربانه من تنفيذ الأحكام. - ولد الغلابة: بالمعدل ده من ضرب الأستاذ هادي الجيار ل مي عمر بالقلم على آخر رمضان مش بعيد المسلسل يدخل موسوعة جينيس.
- علامة إستفهام: حد يقول ل محمد رجب أنه بيأدي دور شاب غني مش ظابط مخابرات دولى والنبي. - علامة إستفهام: طريقك في الدنيا زي الأمتحان لازم تذاكر كويس أوي قبل ما تدخله "محمد رجب".
- حكايتي: أحمد حاتم رافع مسدس في وش الست ياسمين صبري، فهى تقول "أنت عايز تقتلني ياادهم أكيد أنا بحلم، قولي أن أنا بحلم والنبي" ، على فكرة ده عايز يقتلك مش عاملك بانر على كوبر أكتوبر بيقولك تتجوزيني. - حكايتي: في نفس المشهد أحمد حاتم قرر ولسه هيضرب ياسمين بالمسدس ، قوم أبوها يجي ومعاه رجالة ورشاشات هوب يضربوا النار على بعض وياسمين صبري اللي واقفة بينهم مافيش رصاصة تيجي فيها ماشاء الله . - حكايتي: الفويس أوفر اللي ياسمين صبري بتقول فيه "حتى أنت ياادهم طلعت زيهم، تصدق ده أنت طلعت أوحش منهم" دي تقوليها لما يخونك مع البت منال صاحبتك، مش لما يكون عايز يقتلك ياحبيبتي.
- مملكة الغجر: مين فهم المخرج أنه لما يحب يخلى حورية فرغلى تتنكر في عرض حرامية في قسم تلبس نظارة قعر كوباية وحجاب كده هتبقى تمام. - مملكة الغجر: مشهد الفرحة بخروج حورية فرغلي من القسم والرقص واللبس الإسباني ده ينفع هناك في برشلونة، على رأي طلعت زكريا "أنت في الحطابة يلا".
- قابيل: أصدق الجمل اللي سمعتها في رمضان "ياعوبد.. إحنا في مصر العربيات كلها مخبوطة". - قابيل:عمل شير لبوست موت ضحية جديدة وبيقول للبوليس عشان متدورش ع الجثة كتير، هابعتالكم اللوكيشن، قاتل حنين اوي.
- زي الشمس: أنا مش مشفق على حد في المسلسل ده غير المخرج سامح عبد العزيز بعد اللي عملته الست المخرجة كاملة أبو ذكري. - زي الشمس: المشهد اللي دينا الشربيني قالت فيه لسوسن بدر أن ريهام عبد الغفور ماتت عظيم. - زي الشمس: هو من أمتى البوليس بيسيب ممثلة تدور في عربية أختها القتيله، ده تسيب ماحدش يسمح بيه أبداً.
- هوجان: هو محمد أمام في المشهد اللي كان بيهرب فيه بعد ما أنعام سالوسة ماتت، كان بيجري ولا كان بيقلد ماشية الست أطاطا في عوكل. -هوجان: أسماء ابو اليزيد ماسكة كورة في مشهد وبتقطعها لأخوها الصغير، وقعدت تكلمه دقيقة، وبعد دقيقة يامؤمن الواد يقولها "قطعتيها، قطعتيها" يابني أومال هي كانت بتعمل أيه من أول المشهد، يهده المط وسنينه.