"قطايف الصباح 3" تحليلات رمضانية

أظاهر أن أستاذ فتحي عبد الوهاب صدقني لما قولت، لو طلع في ميت مسلسل في اليوم مش هنزهق بس مش للدرجة دي "طلقة حظ".
اه قبل ما أنسي.. من بين كل ال فتحي عبد الوهاب اللي ظهروا السنة دي، الأفضل فتحي عبد الوهاب "لمس أكتاف" ، "لآخر نفس".
في اليوم اللي حمادة هلال حس بهلاوس، وقال لسوزان نجم الدين أنتوا عايزين تجننوني ولا ايه؟ في "أبن أصول" ، هاني سلامة حس نفس الهلاوس، وقال ليسرا اللوزي أنتوا عايزين تجننوني ولا ايه؟ في "قمر هادي".
أبن أصول: سؤال للمخرج.. أيه الهدف الدرامي من أن حمادة هلال يكون في حد عايز يقتله، في أمه اللي هي سوزان نجم الدين تجيب له 2 بودي جارد يحرسوه، لدرجة إنهم يقعدوا على سريره وهو نايم، طب ما يشطفوه بعد الحمام أحسن.
بدال الحدوتة 3: لو وانت بتتفرج مليت من دنيا سمير غانم وايقاع المسلسل أعرف أن الحلقة التالتة وحشة فعلاً وانت بني آدم طبيعي.
البدال الحدوتة 3: أغنية "تعال تعال" بين هشام جمال ودنيا سمير غانم الحسنة الوحيدة في الحلقة التالتة الحقيقة. البرنسيسة بيسة: لو قدرت تكمل الحلقة وضحكت يبقى انت حاجة من الأتنين، يا من فانز مي عز الدين، يا من أهل مي عز الدين نفسهم، غير كده شكليات.
البرنسيسة بيسة: عملتي سكسكة وبيسة وقولنا ماشي، مش بتضحكي وقولنا مايجراش حاجة، إنما أنك تعملي شير لأنك تريند على تويتر، ليه عبط إحنا ياعصام.
الواد سيد الشحات: محمد عبد الرحمن كل حلقة بيعلى بشكل يخض كأنك بتشوفه لأول مرة. الواد سيد الشحات: من كل أدوار أحمد فتحي في رمضان السنة دي، يبقى دور المهرجا الهندي الأفضل لحد الآن.
الواد سيد الشحات: لما تبقى بتفرش ايفيهات للممثل اللي قدامك أكتر من نفسك تعرف أن ده ذكاء ممثل أسمه أحمد فهمي، بركة: المفأجاة مش أن عمرو سعد بيضحك أكتر من مسلسلات كتير متصنفة على إنها كوميدي، المفأجاة أن المسلسلات الكوميدي بتعمل أكشن وسسبينس علي أساس أننا نضحك وكده.
فاصل إعلاني "أشمعنا أنا يعني" - إعلان "الدين تمام الاخلاق" بين شيرين ونجوى كرم الأجمل كفكرة وأداء وصوت وجملة "الله منتهى الطرق" عظيمة. - بغض النظر عن كم السف والتريقة على ظهور المطرب مصطفى حجاج بقفاه أكتر من وشه في الإعلان، إعلان بنك مصر "أنا أبن مصر" من أكتر الإعلانات اللي فيها طاقة إيجابية السنة دي.
رجعنا لكم تاني "مطلولتش عليكوا زي القنوات صح" زلزال: ظهور حلا شيحة بيحلي أي كادر بتظهر فيه، بس ربنا بستر. زلزال: الأغرب من أن ماجد المصري فلاح ولابس بدلة توكسيدو وهو عازم ناس على العشا في بيته، أنه لما يقولهم ايفيه زي "لأن الفلوس لوحدها متصففش" الناس تضحك عادي.
زلزال: أتمنى نشوف في الحلقات سبب درامي مقنع أن ماجد المصري أول ما يظهر علي الشاشة مع محمد رمضان يتقلب دراكولا غير أنه ماجد المصري بيليق في أدوار الشر.
زلزال: منى عبد الغني أحلى مره شوفتها بتمثل. كلبش3: سليم الأنصاري بعد 3 أجزاء من محاربة الإرهاب الدولي وطلقات تدخل وتخرج منه ويرجع حي، يجي هشام سليم في حلقة واحدة يخليه يستقيل من الداخلية، المصري جبروت برضه ياجدعان. كلبش 3: هشام سليم ما عاش ولا كان اللي يقول عليك old wolf انت عجوز تمثيل اه، بس بوجه جديد.
كلبش 3: كل حلقة بتبقى أحلى من اللي قبلها، وبرضه أمير كرارة أداء وروح مختلفة. ولد الغلابة: ياجماعة الفرق بين أحمد السقا في فيلم الجزيرة وأحمد السقا في ولد الغلابة، زي الفرق بين الكنافا بالمانجا والكنافة بالنوتيلا، الاتنين حلوين بس مختلفين، براڤو ياسقا.
ولد الغلابة: كريم عفيفي بيثبت أن الممثل الكوميدي ممكن يضحك من كتر الهم والغلب، ومن غير ايفيهات وسماجة عادي جداً. زي الشمس: فعلاً مشهد اعتراف أحمد السعدني بخيانة دينا الشربيني مع أختها ريهام عبدالغفور، أكتر مشهد شوفته من أول رمضان واقعي مكتوب ومتنفذ بطبيعية لدرجة تحرك الحجر.
زي الشمس: خلونا نعترف أن دينا الشربيني بتقولنا بتمثيلها السنة دي، سهل تلاقي حد يساعدك تعملي مسلسل، بس مش سهل يحلو تمثيلك سنة ورا سنة كده.
حكايتي: شوفتوا اللي لسه قايله على دينا الشربيني، بتعمل عكسه بقه على ياسمين صبري. لآخر نفس: كل حلقة بتفرج على المسلسل وأشوف تمثيل ياسمين عبدالعزيز، ببقى عايز أقولها ما أنتي حلوة أهو، أومال كان ليه بقه كل الهري اللي فات ده، ليه ها.
لآخر نفس: المخرج حسام علي بيحقق المقولة اللي بتقول "المخرج اللي يغامر ينجح، أفضل من المخرج اللي يكرر نفسه وينجح". قابيل: محمد فراج الممثل اللي يجبرك تقعد تستني تشوف مشاهده رزق.
قمر هادي: بغض النظر أن هاني سلامة بقاله 3 سنين طاير في السما من طاقة نور، لفوق السحاب، لقمر هادي، بس المسلسل إيقاعه سريع، وقصته الأكثر تماسكاً لحد الآن.
حدوته مره: الحلقة التالتة حلوة مافيش كلام، بس غادة عبد الرازق عامله حبكة لموت عيالها ميعملهاش ظابط في "سي آي إيه" مش فلاحة غلبانة.