- قابيل: المخرج "كريم الشناوي" ، مدير التصوير " أحمد جبر" ، موسيقى تصويرية " خالد الكمار" المؤلفين محمد عز، مصطفى صقر، أشرف نصر، كريم يوسف، هم أبطال المسلسل لحد الآن. - قابيل: الظهور الأول لأمينة خليل في الحمام ل محمد ممدوح، والظهور الأول لأحمد كمال ومحمد ممدوح بيراقبه. - قابيل: هو ليه محمد ممدوح بيعامل "على الطيبي" على أنه نقيب شرطة الصبح، ومهندس صيانة أجهزة بعد الضهر، لحد ما يجيبوا مهندس صيانة في المسلسل. - قابيل: لو هتزعلوا على ممثل مات في مسلسلات رمضان، أزعلوا من قلبكوا على "روزالين البيه" تستحق الزعل والله ياجماعة.
- مملكة الغجر: المقدمة اللي قبل تتر المسلسل بصوت "سناء شافع" على مشاهد "حورية فرغلى" وهي راكبة الحصان مكتوبة حلو، بس حورية نفسها قفلتني مع أول مشهد في المسلسل وهي راكبة فيه الموتوسيكل. - مملكة الغجر: هو ماحدش قال لبنت "فيفي عبدة" أن الردح بالطريقة بتاعة "يامرة ياسيلكون، ياشدة على 28 ونافخة خدودك بلالين ، وشوباش" دي خلصت من أيام ما ويندوز 98. - مملكة الغجر: طب أنا هراضي ضميركم، عسكري ماسك حرامية اللي هي بنت فيفي عبدة، قوم حورية فرغلي داخلت عليه لابسة هدوم خيالة، ونازلة من موتوسيكل، وعاملة فيها ظابط شرطة، وبتضربها، لأ والعسكري صدق وفكها، ده فرغلى بتاع العصير ذات نفسه مايعرفش يعمل الكوكتيل ده ياكفرة.
فاصل إعلاني - إعلان شركة أورانج وأغنية "فرق كبير" لتامرحسني ونانسي عجرم ،تقليدية ومتوقعة لدرجة أنك نزهق منها من بعد أول مشهد.
- إعلان فودافون وأغنية "جمع حبايبك" لعمرودياب مبهجة وفكرة نستولوجيا عمرو وبدايته مع عزت أبوعوف ،وأشرف عبدالباقي تخطف القلوب بشكل مش طبيعي.
- إعلان مدينتي: كم التريقة والسف على أغنية أصالة أوفر الصراحة، بس السؤال المهم دلوقتي، لازم نعرف مين صاحب الفكرة العبقرية أنه يخاطب المصريين في رمضان باللغة العربية الصفحى لأ وفي إعلان عقارات بملايين.
- إعلان أتصالات: محمد رمضان شاطر وموهوب لدرجة أن أقنع "فان دام" اللي تقريباً ضرب كل نجوم العالم في أفلامه، أنه يضربه ويعلم عليه في الإعلان ويخليه يرقص بعدها ويبقى مبسوط كمان، صحيح الفلوس مش كل حاجة. رجعنا لكم تاني - كلبش3: أشرف مصليحي ممثل موهوب لم ينصفه الحظ، واختياره في دوره ظابط شرطة في محله، تعديل.. بس ليه يطلع في دور ظابط برضه في "ولد الغلابة". - كلبش3: أحمد عبد العزيز بيثبت إنه مش ممثل كبير وبس لأ، ده بيثبت إنه يستحق كلمة "كل هولاء يلتقون معه". - كلبش3: الحقيقة بيتر ميمي مختلف كأنه عامل كل حلقة فيلم مستقل بذاته، وأمير كرارة أدائه عمال يحلى سنة ورا سنة. - كلبش3: باهر دويدار كاتب حوار ونقلات مشاهد سهلة بين الحاضر والفلاش باك تمتع العين، وتفهمك الحكاية من غير أي فزلكة الصراحة. - كلبش3: من أول رمضان أهو، بقول أستنوا السنين اللي جاية مخرج مهم أسمه "خيري سالم".
- زلزال: الأغرب من ظهورمحمد رمضان عريان كالعادة هو ظهور "ماجد المصري" الدائم على موسيقى"والله يازمن لا بأيدينا رزعنا الشوك" عشان يحسسك أنه ظالم من أول مشهد، حتى لو كان مشهد محمد رمضان بيدفعله فيه فلوس عادي يعني.
- علامة إستفهام: محمد رجب تختلف أو تتفق معاه، بس هو عامل مسلسل من بدايته كده يستحق نديله فرصة ونشوفه.
- ولد الغلابة: مشهد الفصل وربط الخديو وعرابي بالعبيد والغلابة حلو ومكتوب بحرافية تبشر بالخير للمسلسل ده. - ولد الغلابة: الحقيقة ظهور تامر حسني في المسلسل علم مع الناس ودخل قلوبهم أكتر من ظهوره في إعلان أورانج.
- واللي في دراعك ده من أيه؟ من قلة أصل الدنيا كأنها مستخسره فينا الصبر اللي هيدخلنا الجنة.. تامر حسني، وأحمد السقا "ولد الغلابة".
- لآخر نفس: لازم نعترف أن "ياسمين عبد العزيز" ممثلة قوية، بس اللي أقنعها تعمل مسلسل تشويق السنة دي هو اللى أقوى ولازم نشكره. - لآخر نفس: الحق يتقال فتحي عبد الوهاب ممثل يمتعك حتى لو هتشوفه في ميت مسلسل في يوم واحد.
- فكرة بمليون جنية: الظهور الأول للممثل "طارق عبدالعزيز" وحد بيقوله "حمد ع السلامة ياسليم بيه" ، وفي نفس اليوم يظهر "سليم الأنصاري" في مسلسل كلبش 3 ، وحد بيقوله "أبو دجانة المهاجر".
- بدال الحدوتة 3: دويتو دنيا سمير غانم، وبيومي فؤاد، ومحمد سلام، هايل والضحك بينهم هما التلاتة مخلي أسم المسلسل على مسمى. - بدال الحدوتة 3: أيمن وتار كل سنة بيأكد أنه صاحب أفضل ورشة كتابة سيناريو رمضان بعد رمضان. - بدال الحدوتة 3: أحمد أمين ظهوره لوحده كفاية يضحكك من غير أي إيفيهات.
- الزوجة 18: الصراحة شابوه للي أقنع نجلاء بدر، إنها تغير جلدها للمرة الأولى، وتعمل دور زوجة بتحب جوزها عادي، بس ليه كوميدي ليه ها. - الزوجة 18: جايبين أجنبية خاطفة حسن الرداد وبتكلمه عربي مافيش مشكلة، بس ليه تقعد دقيقة كاملة بتقوله أصحى بقه أصحى حبيبي، وهو مبرق لها عينيه أساساً، حد يقولها الراجل صاحي وربنا ياجماعة، المط الجميل. - الواد سيد الشحات: مبدئياً كده أغنية تتر البداية "Money Talk" بصوت ابو الليف كالعادة حاجة جديدة ع الودان، خصوصاً لما تكون كلمات "أيمن بهجت قمر". - الواد سيد الشحات: أحمد فهمي وهنا الزاهد جمال مع بعض على الشاشة وخفه دمهم مخليه المسلسل من أول مشهد ممتع بجد.