"قطايف الصباح 4".. تحليلات رمضانية

-في اليوم اللي كان فيه حد بيراقب محمد رمضان وبنت ماجد المصري، وهما بيتقابلوا في الغيط، كان فيه حد بيراقب محمد ممدوح وفاطمة ناصر وهما بيتقابلوا في كافية.
-الأفضل من أحمد فتحي شقة فيصل هو وأحمد فتحي في الواد سيد الشغال.
-من كريم عفيفي ولد الغلابة وكريم عفيفي فكرة بمليون جنية، أكيد كريم في ولد الغلابة.
-من كريم محمود عبد العزيز شقة فيصل، وكريم محمود عبد العزيز "هوجان" الأتنين حلوين .
-أما محمد ممدوح ولد الغلابة ومحمد ممدوح قابيل، في الأتنين عفاريت تمثيل وركبوا محمد ممدوح، والعاقل اللي يتفرج ويستمتع بالأتنين.
-لكن بصراحة صلاح عبد الله شقة فيصل وصلاح عبد الله هوجان الأتنين ملهمش لازمة ومش عارف ماله الحقيقة.
-كلبش 3: للمرة الأولى أشوف أداء ممثل بيعمل دور عيل صايع وشبح في نفسه من كرموز، بكل تفاصيله وحركاته بالحلاوة دي عن "أحمد العوضي" أتحدث.
-الطبيعي هو اللي بيموت من غير ما يسيب اي علامة في الدنيا ، أما اللي مش طبيعي واللي زيي بيكتب التاريخ هشام سليم "كلبش 3".
-لمس أكتاف: صدق اللي قال اللي يعيش ياما يشوف ، واللي يتفرج على حنان مطاوع في "لمس أكتاف" يشوف تمثيل وحلاوة وجمال أكتر .
-لمس أكتاف: مشهد فتح الكوتشينة بين فتحي الوهاب وشريف دسوقي ، شوط حلو بين أتنين عتاولة تمثيل، في ماتش نهائي.
-ولد الغلابة: صدق اللي قال "المشهد اللي يوجعك يلمسك، والأغنية اللي تلمسك تألمك" صوت بهاء سلطان وأغنية صفحة النسيان.
-ولد الغلابة: أنجي المقدم، ثم أنجى المقدم، ثم أنجي المقدم، ثم يأتي الآخرون.
-ولد الغلابة: بمناسبة أنجي المقدم، مشهد محمد ممدوح معاها النهاردة حلو حلاوة تقشعر البدن والروح.
-زلزال: الأغرب من أن حلا شيحا تطلب مهرها من محمد رمضان في الحلم رمان، أن محمد رمضان يفرط الرمان في كفها بالسهولة دي، ماكنش حد غلب.
-زلزال: هو بنت ماجد المصري اللي بتحب محمد رمضان بتاخد القلم وتقع ع الأرض، وتنام شوية وبعدين تستني ماجد المصري يصحيها ويضربها قلم تاني ليه؟ ها .
-الوقت بيستنى الحبايب محمد رمضان "زلزال".
-مملكة الغجر: سامح الصريطي في مشهد بيكلم واحد خليجي فيديو كول ، بس تقريباً الخليجي مش واخد باله وبيكلمه مكالمة العادية في الناحية التانية. بس برضه متظلمهوش ياجماعة.
-مملكة الغجر: يعني جايبين هاكر في 2019، وبيفك شفرة ومافيا عالمية وخيول بملايين، ومقعد الهاكر علي كمبيوتر بسلك في المشهد، يهده ال Low Budget
-شقة فيصل: دمك خفيف وكل حاجة حلوة تقومي قايله ايفيه زي ده "اه أختها من بعيد من ناحية دمياط ساعتين بالميكروباص كده" مش قولنا ميت مره نبطل قلش رخيص يا أيتن ياعامر .
-شقة فيصل: كريم محمود عبد العزيز كل يوم كل مشهد بيمثله بيثبت أن أبن الساحر "حاوي تمثيل".
-قابيل: اللي متفاجئ أن محمد ممدوح في شخصية الظابط هو قابيل القاتل السفاح، يبقى نسى شابوهات يوسف الشريف وتويستاته.
-قابيل: بمناسبة محمد ممدوح اللي لسه متضايق وشايف أن صوته مش مفهوم وعامله صداع ياحرام، أحب أقوله ياريت يبقى عندنا في رمضان 3 بيمثلوا زيه بنفس مشاكل الصوت وبعدين يتكلم.
-هوجان: رغم أن محمد أمام واخد من أداء الزعيم كتير في شعبان شايل سيفه، بس حلو ودمه خفيف الصراحة.


-سوبر ميرو: حلقة كاملة، 2 ايفيه لحمدي الميرغني، 3 ايفيهات لأيمي سمير غانم، 5 ايفيهات لسمير غانم والحلقة برضه مش بضحك خير إن شالله حد يطمنا.

-بدال الحدوتة 3: مشهد دنيا سمير غانم مع دلال عبد العزيز والعريس اللي بيتقدم لها في السجن مكتوب كويس وجديد.

-بدال الحدوتة 3: كلاكيت تاني مره مشاهد عمرو وهبة مع شيماء ودنيا سمير غانم أكتر مشاهد بتضحك في المسلسل.

-هو الأهبل بيزفوه ليه؟ عشان أهبل، واللي بيتجوز بيزفوه ليه؟ عشان أهبل برضه، دنيا سمير غانم "بدال الحدوتة 3".