- أحمد صلاح حسني بيحب ياسمين عبد العزيز بس هي مش بتحبه في "آخر نفس"، ربنا عوضه ب ياسمين صبري تحبه في "حكايتي".
- لآخر نفس: الدويتو اللي بين الممثل أحمد سليم وأسماعيل شرف من أجمل دويتوهات الشر السنة دي.
- كلبش3: الحقيقة الوحدة السرية اللي بيشتغل فيها مدنيين دي، لو واحد صاحبي شافها هيتاكد أن مراته شغالة فيها بعد اللي بتعمله فيه. - أصل المتخلف اللي يقف في صف الحمار، مش في صف اللي راكبة.. هشام سليم "كلبش3". - مشكلتي مع سليم الأنصاري أنه كويس لدرجة أنه خسارة يبقى عدوي، وعنيد لدرجة أنه صعب يبقى من فريقي هشام سليم "كلبش3".
- ولد الغلابة: المشهد اللي ضرب فيه احمد السقا نفسه بقالب طوب أحمر ومناخيره جابت دم، ما ستبعدوش أبداً يكون حلف علي محمد سامي الطوبة تكون بجد ومش دوبلير. - ولد الغلابة: النهاردة الاستاذ هادي الجيار دخل على مي عمر وابتسام لها وبعدين قشر ووشه قلب، قولت خلاص هيروح رزعها بالقلم زي كل حلقة، بس الحمدلله عدت علي خير مكتوبالك يابولين. - ولد الغلابة: كان نفسي أكمل ضحك، بس للأسف مشهد موت صفاء الطوخي من صدقه، وجعني وفكرني باأمي الله يرحمها. - ولد الغلابة: أغنية بهاء سلطان "أغلى الناس" للمرة التانية أجمل ما في حلقة النهاردة. يغلب الأيام اللي يرضى بيها أحمد السقا "ولد الغلابة".
- قمر هادي: أسلام حافظ هيبقى واحد من أهم كتاب رمضان 2019 . - قمر هادي: هاني سلامة تمثيله جميل وكل حاجة بس مش لازم في قفله كل حلقة يبرق لنا عشان يبان أن الحلقة مشوقه وكده.
- لمس أكتاف: أراهن أن حنان مطاوع لبسها من غير قصد روح "عدولة" في مسلسل أرابيسك اللي قدمته الفنانة الكبيرة "سهير المرشدي"، عشان تطلع بحلاوة وجمال دور "عايدة" السنة دي. - لمس أكتاف: لما تشوف فتحي عبد الوهاب وحنان مطاوع في كادر كله حب وغيرة وشغل وتجارة ومطبخ واكل ومخدرات، وكل ده في مشهد واحد يبقى أنت قدام حلقة كاملة مش مشهد حلو.
- حكايتي: ياسمين صبري مخطوفة في مشروع، أحمد صلاح راكب مرسيدس قوم يشوفها وهي بتصرخ ويقرر ينقذها، ويضرب العيال الوحشين ، فا تحبه، ويتجوزوا ويعيشوا في تبات ونبات ويخلفوا صبيان وبنات. - حكايتي: في المشهد اللي بعده أحمد صلاح حسني في عيادة وبيتعالج بعد مع السواق ضربه بحاجة على راسه وهو بينقذ الست ياسمين صبري، فالدكتور يقولها هو حضرتك المدام ، ترد تقوله لا والله العظيم ولا اعرفه، حد يقولها ده دكتور مش ظابط في قسم العجوزة. - حكايتي: كل ما بشوف مشهد للممثل "أحمد بدير" ببقى عايز أقوله صحيح اللي قادر يعمل من كم هذا الفسيخ شربات عبقري. - حكايتي: أجمل حاجة في المسلسل من بدايته كادرات إسكندرية وشوراعها، وروح البحر اللي بتنط من كل مشهد.
- زلزال: رقاصة متجوزة مدير فرقتها يطلقها الحمش جوزها 3 مرات، وتجيب شاب صغير يتجوزها محلل عشان نملى الأحداث ودي بتجيب مع الناس لأ الفكرة جديدة الصراحة. - زلزال: حلا شيحا بتسأل محمد رمضان هى كلية تجارة اللي بتدرس فيها بتطلع أيه؟ قالها بتطلع محاسبين بيشتغلوا كاشير في محل كشري قد الدنيا، في التسيعنيات المحاسبين كانوا لسه بيلاقوا شغل في بنوك وشركات عادي ياأستاذ محمد. - أنا مش هسيب حقي حتى لو حساب قلبي محمد رمضان "زلزال".
- مملكة الغجر: اللي أعرفه عن الغجر أنهم بيعيشوا في القري والصحراء ، أول مره أعرف أنهم واخدين حي فيلل في التجمع الخامس وعايشين فيه.
- هوجان: مشاهد كريم محمود عبد العزيز الأجمل على الإطلاق في المسلسل ده.
- على فكرة قبل ما أنسى في مسلسل حلو أسمه "دفعة القاهرة" أتفرجوا عليه.