شيماء ذبحت زوجها الجزار

«أنا كل اللى خايفة عليه بنتى جنى، دى لسه صغيرة مش عارفة هتعمل إيه، وهى بقت خلاص لوحدها فى الدنيا بعدما قتلت أبوها، بس ربنا أكيد مش هيسبها لوحدها». تلك الكلمات كانت جزءًا من اعترافات «شيماء.م»، 33 عامًا، ربة منزل، المتهمة بقتل زوجها «عاطف. م»، 38 عامًا، جزار، بعدما سددت له طعنة نافذة بالصدر، سقط على إثرها قتيلًا، إثر خلافات زوجية.

وقالت الزوجة فى اعترافاتها «قتلته ومش ندمانة ولا خايفة، الحاجة الوحيدة اللى مخوفانى أنى هسيب بنتى وأنها هتبقى لوحدها فى الدنيا بعد ما يعدمونى عشان قتلت أبوها، دى لسه طفلة صغيرة ومش عارفة هتعيش إزاى ولا هتعمل إيه ولا إيه هيكون مصيرها بس والله غصب عنى».
وأضافت الزوجة: «عمرى ما حسيت معاه بالراحة ولا بالسعادة، كل يوم كان بيمر عليا معاه كان يومًا أسود فى حياتى، ده ما كنش راجل يتعاشر، استحملت كثيرًا عشان خاطر بنتى لكن خلاص ما بقتش قادرة استحمله ولا عارفة استحمل العيشة معاه».
وتابعت: «عمرى ما حبيته ولا هو كمان، ومكنش بيفوت يوم من غير ما نتخانق فيه والجيران تتفرج علينا، عمره ما ريحنى ولا حاسسنى أنه بيحبنى، ما كنش بيتقى ربنا فيا وعلى طول لسانه وأيده سابقين عقله، وكان دايمًا يهددنى بالسكينة أنه هيذبحنى بها ويخلص علىَّ».
واختتمت الزوجة: «وصلنى لمرحلة أنى قرفت وزهقت من العيشة معاه وخلاص ما بقتش خايفة منه، ومش طايقة له كلمة، خلاص حياتى اتحولت إلى جحيم مستمر معاه كل يوم بيزيد كرهى له، وفكرت أكثر من مرة أنى أنتحر أو أقتله عشان أخلص من العيشة معاه، وفى يوم الواقعة كالعادة طلع من شغله وبدأ يتطاول علىَّ ويسبنى عشان بطلب منه يزود مصروف البيت وعلى طول بدأ يصرخ ويشتمنى وراح المطبخ جاب السكينة اللى بيهددنى بها دايمًا، رحت أنا سبقاه وجبت السكينة وضربته فى صدره فوقع على الأرض غرقان فى دمه، رحت لابسة ونازلة سلمت نفسى فى القسم واعترفت أنى قتلت زوجى».
وكان فريق مباحث قسم بولاق الدكرور وصل إلى الشقة بقيادة العميد طارق حمزة، مفتش مباحث غرب الجيزة، حيث تبين أن جثة المجنى عليه بها جرح قطعى بالصدر.
وبسؤال ابنة المجنى عليه، جنى 10 سنوات، أقرت أنه حال تواجدها بغرفتها سمعت أصوات مشاجرة بين والديها، ولدى خروجها شاهدت والدتها ممسكة بسكين وأحدثت إصابة والدها، كما أكد شقيقا المجنى عليه أن الزوجين كانا دائمى التشاجر.
تحرر المحضر اللازم وأحال اللواء هشام العراقى، مساعد وزير الداخلية لأمن الجيزة المتهمة إلى النيابة العامة للتحقيق، وأصدرت النيابة قرارها بحبس المتهمة 4 أيام على ذمة التحقيق.