أمير تادرس للزوجين: ابحثا عن السماء معًا

لكل زوج وزوجة
رجعت هى وولادها بعد يوم طويل
جنازة وعزا ..
جات بنتها بتسألها ..
ماما .. تفتكرى بابا فين دلوقتى
مالقيتش اجابة غير انها سرحت بتفكيرها
وقالت لها .. بعدين نتكلم
دخلت اوضتها وقفلت الباب
وقعدت على الكرسى تفكر
وفجأة افتكرت الظرف اللى كان دايما يقول لها
ماتفتحيهوش غير بعد ما اموت
جريت على المكتب وطلعت الظرف
لقيت جواه جواب
قعدت على الكرسى وابتدت تقرا ...
وانتى بتقرى الجواب ده ..
هاكون انا مش موجود معاكى خلاص ..
انا عارف انك عمرك ما حبيتى طريقتى فى الكلام
عشان كدة كتبت لك اخر حاجة حبيت اقولهالك
انا عارف انك عشتى حياة صعبة معايا ..
كنتى بتضايقى منى فى حاجات كتير ..
طريقة كلامى .. شربى للسجاير
اهمالى للبيت .. بعدى عن الولاد
اوامرى وتحكماتى .. زى مانتى كنتى بتسميها
بس انا كنت دايما بابقى نفسى اقولك
لو فيا حاجة غلط .. ساعدينى اغيرها
بس انتى كنتى دايما عايزانى اتغير لوحدى
بالعكس دانتى ساعات كتير كنتى بتساعدينى
انى اتغير للأسوأ
فاكرة لما كان الشغل هيمشونى ..
وقعدت فترة متضايق
كنت خايف من اللى جى ..
خايف ماقدرش اوفى طلبات البيت
كنت خايف ماقدرش ادفع مصاريف المدارس
فى الوقت ده .. قلتى لى ربنا هيتصرف .. وسيبتينى
كان نفسى كل يوم تيجى تقولى لى ..
ماتخافش .. حتى لو مشيت من الشغل ..
هنرتب ظروفنا وهنعيش
كان نفسى الاقيكى حاسة باللى انا شايله ..
لكن للأسف لقيت نفسى لوحدى ..
ولما عاتبتك .. قلتى لى .. البيت والعيال
طب مانا البيت .. وانا ابو العيال
ولما مالقيتش قدامى غير السجاير
اطلع فيها غلبى .. ابتديتى تلومى عليا اكتر
هو احنا ناقصين مصاريف ..
انت انانى بتدور على نفسك وبس ..
وكان قرارى ..
انى اتحكم فيكى عشان تسكتى ..
ولما جيت عاتبتك .. قلتى لى .. البيت والعيال
طب مانا البيت .. وانا ابو العيال
انتى فاكرة انى كنت باسيب البيت عشان ابسط نفسى
للأسف انتى غلطانة
كان بيبقى نفسى الاقى ولادى بيطلبوا منى حاجة
علطول بيطلبوا منك .. وانتى تيجى تقولى لى
عمرى ماسمعتك بتقولى لهم .. روحوا لبابا واطلبوا منه
واليوم الوحيد اللى لقيتهم جايين
قالولى هات فلوس عشان عيد الام
انا عارف انك بتتعبى ..
بس صدقينى .. انتى يمكن بتعرفى تقولى انك تعبانة
انا ماباعرفش .. وانتى عارفانى
انا عارف ان الكلام دلوقتى مافيش منه فايدة
بس هاقولك اللى كان نفسى فيه
كان نفسى لما تلاقينى بازعق ومتضايق
تقولى لى .. كل ده من ورا قلبك ..
انا عارفاك .. انت اكيد متضايق
بدل ماتقولى لى .. انت خلاص بقيت لا تحتمل
وانا مش مستحملة صوتك
كان نفسى لما تلاقينى حاطط السيجارة فى بقى
تمدى ايدك وتشيليها .. وتقولى لى .. صحتك بالدنيا
لما تتعب انت .. نعيش احنا ازاى
بدل ماتقولى لى ..
ريحة البيت بقت كلها دخان ..
اشرب فى البلكونة
كان نفسى تحببى الولاد فيا ..
وتكلميهم عنى وانا مش موجود ..
تقولى لهم دابابا بيتعب عشانا ..
تقولى لهم .. اول ما ييجى من شغله ..
قولوا له .. وحشتنا ..
بدل ماتقولى لهم .. لو عايزين فلوس ..
عندكوا بابا اهو .. روحوا اطلبوا منه
الجواب كان قرب يخلص ..
ودموعها كانت غرقت وشها وهدومها
وهى بتقرا اخر حتة فى الجواب
هاقولك على حاجة فى الاخر ..
انتى اخترتينى .. زى مانا اخترتك
ووافقتى عليا .. زى مانا اتمنيتك
وكنتى مستنية يوم جوازنا عشان نعيش سوا
زى مانا كنت باحلم بيه
بس خلاص .. دلوقتى انتى فى مكان وانا فى مكان
والكلام مش هيرجع اللى فات
مافيش فايدة .. مافيش فايدة
وفجأة صوت زعيق جامد ..
مافيش فايدة .. انا قلت مافيش فايدة
خرجت م الاوضة بتجرى
لقيته واقف قدامها ..
اتسمرت مكانها .. ومابقيتش قادرة تمسك دموعها
وهو عمال يشخط .. مافيش فايدة ..
بقالى ساعة بانده عليكى وحضرتك نايمة
انا زهقت ..
ولسه هيطلع السيجارة .. جريت عليه
ومسكت ايده وهى بتعيط وبتقول له
لأ .. فيه فايدة .. فيه فايدة
صحتك بالدنيا ..
لسة جاى يرد عليها
حطت ايديها على بقه وقالت
"وحياة ولادك ما تشربها"
قال لها .. ولادى؟!
انتى اول مرة تحلفينى بيهم
قالت له ..
ماعندهمش اغلى منك
وماعندكش اهم منهم ..
وانا ماعنديش غيركم
جوزك متعب .. والعيشة معاه صعبة؟؟
مراتك مزعجة .. وحياتك معاها مستحيلة؟؟
خدوا عندكوا المفاجأة ..
انتو الاتنين مسئولين توصلوا بعض السما
اعمل حسابك يوم ما ربنا فى الاخر يسألك ..
مراتك فين؟
وانتى كمان اعملى حسابك يوم ما ربنا يسألك ..
ماجبتيش جوزك فى ايدك ليه؟
من حكاوى كتاب
‫#الكلام_ده_حقيقى_جدااا_‬...